Powutu ni Yusupu lau sira i tana Masiri mobaluki gandu
42
1 Awetu naepe ni Yako kariana gandu i tana Masiri, napololitakamo sira anana, nauli, “Mangkiada mpane roo-roo ngkida komi? 2 Niepeku i tana Masiri ria gandu. Laumode komi i Masiri mobaluki gandu bona ntena kita mamate malaluara.” 3 Mewali lau mpuumo sira powutu ni Yusupu anu sampulu etu i Masiri, mobaluki gandu. 4 Agaiana i Yako baria mopaliu i Benyami toi woto ni Yusupu lau simbela-mbela ai powutuna sira, lawi napokaeka ni Yako masurewupae luwu ia.5 Nakeningkaorona i tana Kanaan, ana ni Yako ai tau wori anu ntanina lau sira mobaluki gandu i tana Masiri. 6 Anu mampobalu gandu i tau anu dongka mai lako i sumalele dunia, iamo i Yusupu, gubernur i tana Masiri. Etumo mpane lau sira molingkudu motumpa i liona. 7 Awetu naita ni Yusupu powutuna sira, nainsani mboto ka sirana, agaiana ni tempo etu, ewa anu baria nainsani sira. Mewali nakasarai sira napekune, nauli, “Komi toapa?”
Mesono sira, raulira, “Kami toKanaan. Mai kami mobaluki pangkoni.”
8 Nauda nainsani ni Yusupu kapowutuna mboto sira, agaiana powutuna sira baria rainsanira ka i Yusupuna etu toira mboto. 9 Mewali ni tempo etu, nakaendo ni Yusupu pangipina kono si sira powutuna, mewali mololita ia, nauli, “Komi ei tau anu mai molele-lele mata ba imba kaledeana tanaki ei.”
10 Mesono sira, raulira, “Baria kowo kami ewa ee. Kami ei mai, wule mai mobaluki pangkoni. 11 Kami ei tau sampoka sadua tuamaki. Kami ei tau malompe, ai baria ria tunggaiaki mai molele-lele mata tanami ei.”
12 Mololita i Yusupu si sira, nauli, “Dongkomi! Mai komi molele-lele mata imba kaledeana nu tanaki ei!”
13 Mesono sira, raulira, “Tua, kami ei mopoka sampulu rodua, sadua ngkida tuamaki i tana Kanaan. Sadua pokaki mepalengimo, ai toiki anu kaopeana ei-ei mamporangai tuamaki.”
14 Mesono i Yusupu, nauli, “Kalawiana mamonso apa anu kuuli, komi ei tau anu mai molele-lele mata tanaki. 15 Ina kupampeitai pololitami etu. Mosumpa aku i rara nu sanga ni datu, baria komi ina pensani mopalengi tana Masiri ei, ane toimi anu torapotoi mpii etu, baria mai i se ei. 16 Sadua lako si komi sangangaa mesola, lau mai mandoa toimi, mpane komi anu sasio ina kutaha i se ei, bona tongawa mpuu kamonsona pololitami. Ane baria, mopinda aku i rara nu sanga ni datu, komi ei iwaliki, mai komi molele-lele mata tanaki ei.” 17 Mewali napasua sira ni Yusupu i rara nu tombi pesukua tolu eo kasaena.
18 I katolu eona, mololita i Yusupu si sira, nauli, “Aku ei tau anu menomba si Pue Ala. Pensani komi kupopensuwu lako i rara nu tombi pesukua ei, agaiana sangangaa nipeulai peundeaku, 19 bona kuinsani mpuu ka komina ei tau anu manoto, mewali sangangaa sadua lako si komi baria kupaliu lambu, rasuku ia i rara nu tombi pesukua ei, ai anu ntanina pensani mesola i tana Kanaan, mangkeni gandu anu nibalukika pokami, anu tongora mantodisa oro. 20 Agaiana awetu komi mai mpesola i se ei, sangangaa nikeni mai toimi anu torapotoi mpii si aku, bona kuinsani kamonsona pololitami etu, mewali bariamo luwu komi ina kusuku duduumi mamate.”
Rapokonora pobotusi nu gubernur i tana Masiri etu. 21 Mololita sira sadua ai sadua, raulira, “Kita ei rasuku nakeningkamasalata i toita ni banimpia. Merade tulungi ia agaiana baria tapetingai nauda ia toita mboto, mapari mpuu kowo naepe. Eimo wuana mpane kita ei-ei mansumba pantodisa ewa ei.”
22 Nauli ni Rube, “Bariapae roomo niuliku ni banimpia, bona toita inee rapapadiwaka. Agaiana baria aku nipetingai. Mewali ei-ei, kamate nu toita mewali taposurunga.”
23 Nainsani ni Yusupu lempona basara, agaiana baria rainsanira kaewa etuna, lawi ane mampololitaka sira i Yusupu, mopakeda sira sadua guru basa. 24 Napalengi sira ni Yusupu mpane lau ia motumangi. Awetu malompemo rarana, nabuku mbuimo mololita, lau mbuimo ia mampomberumpaka powutuna sira, mpane nadoamo i Simeo napopesilu i lio-lio nu pokana sira.
Powutu ni Yusupu mesola lau i tana Kanaan
25 I Yusupu moparentai tauna sira bona sinangka karu anu nakeni nu powutuna sira, raisiira gandu, mpane doira sadua ai sadua anu nipopobalukiramo gandu, raunsa mpesola i karura, mpane nikiraka sira bokura i dala. Parenta etu rapeulai nu tauna. 26 Roo sira rakiraka apa anu naparentaika sira ni Yusupu i tauna, powutuna aretu, mampopensawimo sira keniara i kalidera, mpane mesolamo sira lau i tana Kanaan.
27 I posambengiara i dala, sadua lako si sira mobungkasi karuna, ina mopakoni ia kalidena. Agaiana nisumbanada doina i bobo nu karuna etu. 28 Naulika sira pokana, “Doiku rapopesola ngkida, nipeita ei mboto i rara nu karuku!” Rapotingkarara ai rapokaekara, etumo mpane mombepekune sira sadua ai sadua, raulira, “Apada tunggaia ni Pue Ala si kita?”
29 Awetu sira dongka i Kanaan, rapololitara i tuamara sinangka anu mewali si sira, raulira, 30 “Gubernur i tana Masiri mokasarai kami, narai kami tau anu molele-lele mata tana Masiri. 31 Mesono kami, kiuli, ‘Kami ei tau anu malompe, baria kami mai molele-lele mata tanami ei. Kami ei tau anu manoto. 32 Kami sampoka sampulu rodua, sadua tuamaki, pokaki sadua mepalengimo. Ria mani toiki anu torapotoi mpii mamporangai tuamaki i Kanaan.’ 33 Nauli nu gubernur i Masiri etu, ‘Ina kupampetandakai komi, ba mamonso mpuu komi ei tau anu manoto. Mewali sadua lako si komi sangangaa i se ei, baria pensani mesola, mpane anu ntanina pensani mesola mangkeni gandu i pokami, anu tongora mantodisa oro. 34 Ai awetu komi mesola mpesola mai luwu, sangangaa nikeni mai toimi anu torapotoi mpii, lako kupotuuda komi ei tau anu manoto, baria komi tau anu mai molele-lele mata tanaki ei. Ai pokami anu kutaha ei, lako kupopesolakada komi, ai pensani komi meari ai mobalu-balu i tana Masiri ei.’” 35 Roo rapadongkara i tuamara sinangka anu mewali si sira, rapakansoara karura sadua-sadua, rasumbara batutura anu moisi doi ria i rara nu karura. Etumo mpane sira ai tuamara maruminsi kaekara. 36 Roo awetu, mololita tuamara, nauli, “Nakeni nu babeiami ope-ope, mpane nasumba anaku bariamo ria. I Yusupu bariamo ria, ai i Simeo mbui bariamo ria, ai ei-ei i Benyami mbuimo ina nikeni. Maruminsi mpuu pantodisaku!”
37 Mololita i Rube i tuamana, nauli, “Uma, nupaliu lau i Benyami kukeni. Aku mboto anu ina mangkeni mpesola ia mai. Ane baria ia mesola, rodua anaku tomoane pensani napopate ni uma.”
38 Agaiana nauli nu tuamana, “Inee! Baria pensani i Benyami nikeni. Powutuna anu santawuni ai ia mamatemo. Ei-ei iadamo saduduana anu matuwu, adiwamo luwu ane masurewu ia i polumakoa. Aku ei matuamo. Kapari anu ina dongka, nakeni nu babeiami etu, ina mewali kupomate, nakeningkawiorana raraku.”