I Yusupu mopakanoto lempona pangipi nu datu i Masiri
41
1 Awetu liumo rompae, mangipimo datu i Masiri. I rara nu pangipina, meongko ia i wiwi ue Nil. 2 Ungangkidamo naita pitu mbaa japi anu marudu ai wotora malompe, mensuwu sira mai lako i rara ue Nil, mensore sira mpane mangkuku i wiwi nu ue Nil etu. 3 Roo awetu, mensuwu mbui pitu mbaa japi anu ntanina lako i rara ue Nil. Japi aretu mempisoso, mensore mpane meongko sira i tumbiri nu japi anu marudu aretu. 4 Mpane japi anu mempisoso aretu, moome japi anu marudu aretu. Roo awetu, tepampangimo i datu.5 Baria ia masae tepampangi, maleta mpesola mbuimo ia, mpane mangipi mbuimo ia. I rara nu pangipina, naita sangkau gandu anu mopenga pitu mbuli anu mamongko ai mapore poisira. 6 Mpane naita mbui sangkau gandu mopenga pitu mbuli anu mawara, lawi kapa nawui nu pambui anu marameda, anu lako i pada lori mai. 7 Naita pitu mbuli gandu anu mawara aretu, moome pitu mbuli gandu anu mapore poisira aretu. Roo awetu, malikemo i datu ai lako nainsanida pangipina mbotodawei.
8 Awetu ia memata madondo, baria malompe rarana mampekiri pangipina etu, etumo mpane napoperonde ope-ope topopanginsani, ai tau anu mapande i tana Masiri. Dongkamo sira ope-ope tau aretu, napololita pangipina si sira, agaiana mogalo sadua sira baria ria anu manginsani lempo nu pangipina etu.
9 Roo awetu, anu mororaka i datu panginuna mololita, nauli, “Eo ei sangangaa kupololita mpesola kamasalaku ni banimpia. 10 Ni tempo etu, i datu marumpu si aku ai i tau anu mororaka roti si datu, nakeningkamasalaki, etumo mpane rapasua kami i rara nu pesukua i tombi nu tadulako topokampai tombi kadatua. 11 Sambela tempo ni kawengina, kami roduaki mangipi, ai lempona pangipiki etu baria simbela. 12 Sadua anantomoane toIbrani ria si dou, rasuku simbela-mbela ai kami ni tempo etu. Ia batua nu tadulako topokampai tombi ni datu. Awetu kituntu pangipiki si ia, napakanotoka kami lempona pangipiki etu. 13 Manoto ope-ope anu mewali sintoto ai apa anu napololita. Lempona pangipiki iamo: Aku napopesola mpesola ni datu i bagoku anu ni banimpia, agaiana tau anu mororaka i datu roti, ratoe duduuna mamate.”
14 Awetu naepe ni datu pololita nu tau anu mororaka ia panginuna etu, napopedoa i Yusupu, mewali kasaliu rapopensuwu ia lako i rara nu tombi pesukua. Rakou woona, napasurungi pesampina mpane ia rakeni lau mampomberumpaka i datu. 15 Mololita i datu si ia, nauli, “Mangipi aku, ai pangipiku etu baria ria mogalo sadua tau anu pensani mopakanoto lempona pangipiku. Ria anu mobambarika aku, ka ikona anu pensani mopakanoto lempona pangipi.”
16 Mesono i Yusupu, nauli, “Baria kowo aku, datu. Agaiana i Pue Ala anu ina mopakanoto lempona pangipi etu, anu mopakatono i datu.”
17 Roo awetu, nauli ni datu, “Mangipi aku, tongoku meongko i wiwi ue Nil. 18 Kuita mensuwu mai lako i rara nu ue Nil etu, pitu mbaa japi anu marudu ai anu malompe wotora. Mensore sira mpane mangkuku i wiwi ue Nil. 19 Roo awetu mensuwu mbui mai pitu mbaa japi anu ntanina anu mempisoso. Baria mani sambela kuita japi anu ewa etu pempisosona, i tana Masiri ei. 20 Japi anu mempisoso aretu, moome sira pitu mbaa japi anu marudu mpongone. 21 Agaiana nauda roomo sira moome pitu mbaa japi anu marudu mpongone, japi anu mempisoso aretu, batena ngkida mempisoso sira. Mewali ni se etu, tepampangimo aku. 22 Baria masae, maleta mbuimo aku, mpane mangipi mbuimo aku. Niitaku sangkau gandu anu mopenga pitu mbuli anu mamongko ai mapore poisira. 23 Mpane tuwu mbui sangkau gandu mopenga pitu mbuli anu mawara, lawi kapa nawui nu pambui anu marameda anu lako i pada lori mai. 24 Pitu mbuli gandu anu mawara etu moome pitu mbuli gandu anu mapore poisina mpongone. Ai roomo kutuntu i tau sira anu mopanginsani, agaiana baria mogalo sadua anu manginsani mopakanoto lempona pangipiku etu.”
25 Roo awetu, mololita i Yusupu si datu, nauli, “Pangipi ni Tua anu rompangka etu, simbela lempona. Napatongawa ni Pue Ala si datu apa anu ina Nababei. 26 Pitu mbaa japi anu marudu aretu, ai pitu mbuli gandu anu mamongko ai mapore poisira etu, lempona simbela, iamo pitu mpae. 27 Mpane pitu mbaa japi anu mempisoso aretu, ai pitu mbuli gandu anu mawara, lempona simbela mbui, iamo ina mewali tempo oro i rarana pitu mpae kasaena. 28 Ewa anu kupololitamo si datu, napatongawamo ni Pue Ala si datu apa anu ina Nababei. 29 Ina mewali i rarana pitu mpae i tana Masiri ei tempo mabosu. 30-31 Roo awetu, ina dongka tempo oro i rarana pitu mpae. Ai i rarana pitu mpae etu, tana Masiri ei ina mabangi, ai bariamo mogalo saudi kakatandaana pepaeaara ni tempora mabosu mani ni banimpia. 32 Pangipi ni datu anu rombela etu, lempona i Pue Ala mopakanotomo peundeaNa ai bariamo masae ina Napopewalimo. 33 Mewali ane malompe, napelisi ni datu sadua tau anu mapande ai manoto rarana, nakiraka ni datu kuasa mokadipuraka tana Masiri ei. 34-35 Ai ane pensani, naongko mbui ni datu tau ntanina, nakiraka sira ni datu kuasa, bona i rarana pitu mpae tempo nu tau mabosu, ragaaki i ope-ope tau rasi nu powiara gandu lima parasee, mpane ragulu i kota-kota ai rakampai. 36 Gandu etu raboli, bona ane dongkamo tempona maoro i tana Masiri ei i rarana pitu mpae, tau sira baria ina mamate maoro.”
I Yusupu raongko mewali tadulako nu topoparenta ni datu i tana Masiri
37 Datu ai ope-ope topobagona mampokono pesumbaa mpekiri ni Yusupu, 38 mpane nauli ni datu, “Ria manipae tau anu ntanina anu simbela ai i Yusupu ei, lawi nanini ia nu Inosa ni Pue Ala?” 39 Roo awetu, mololita i datu si Yusupu, nauli, “I Pue Ala anu mopakanoto ope-ope si iko, mewali manotomo ka ikona tau anu mapande ai matopa lako i tau ntanina. 40 Mewali ina kulanti iko mewali gubernur i Masiri ei. Ope-ope parentaku ina mampetingai sawaamu, ai wule aku saduduakuda anu mewali toiwongkomu.”
41-42 Roo awetu, nawonsui sinsi kadatua lako i karawena, mpane nakalasuaka i karawe ni Yusupu, nauli, “Ei katongawaana kulanti iko mewali gubernur i tana Masiri ei.” Roo awetu, rabaduimo i Yusupu ai santau juba anu malulu, mpane raenui ia ai bulawa. 43 Mpane rakiraka ia saogu kareta kadatuana anu karooguna bona napemponei, mpane topokampai tombi kadatua ni datu aretu, molumako ilodo nu kareta kadatua etu, monganga-nganga sira, raulira, “Gubernur ina moliu! Sangangaa nibila ia!” Ewa etumo polantina i Yusupu mewali gubernur i tana Masiri.
44 Nauli ni datu si Yusupu, “Aku ei datu. Kupadongka i ope-ope tau i tana Masiri, baria sira pensani mobabei apa ngkida ane baria sira metompa si iko. Pensani sira mobabei ba apa, ane nupaliu sira.” 45-46 Roo awetu, nasanga ni datu i Yusupu: Sapana-Paanea, mpane nakiraka sadua towawine anu rasanga i Asnat nasamboko. Towawine etu ana ni Potifera anu motadulakoi tombi penombaa nu toMasiri anu ria i kota On.
Tempo ni Yusupu mepuu mobago mewali tadulako nu topoparenta i tana Masiri, tinuwuna tolu mpulu mpae.
Meongkomo i Yusupu lako i tombi kadatua ni datu, lau ia motoleliki ope-ope boea i tana Masiri. 47 I rarana pitu mpae etu malompe raepera, sinangka pinambulara malompe pewalina, ai maisi mpii powuana. 48 Naposawaaka ni Yusupu parentana sira, bona wua nu gandu ragulu lako i boea-boeana, mpane raboli i rara nu tambaru anu mabose i kota-kota anu gompi i boeara. 49 Nakeningkamaisi gagamo gandu anu ragulu etu, mengkaroomo i Yusupu mosoka gandu.
50 Lako baria mani dongka tempo oro, i Asnat samboko ni Yusupu moanamo ia rodua anakoi tomoane. 51 Mewali nauli ni Yusupu, “Nakeningkalompe ni Pue Ala si aku, bariamo kukaendo sinangka pantodisaku ai ope-ope poka-pokaku ai tuamaku.” Etumo mpane anana anu torapowutu nasanga “Manase”. 52 Mpane mololita mbui ia, nauli, “Nakirakamo aku ni Pue Ala rodua anaku ni tempoku mapari.” Mpane nasanga anana anu torapotoi “Efraim”.
53 Sopomo pitu mpae tempona tau mabosu i tana Masiri, 54 dongkamo tempo oro, sintoto ewa anu napadongkamo ni Yusupu. I sumalele dunia narumpa tempo oro, agaiana i tana Masiri ngkida anu ria pangkoni. 55 Awetu toMasiri mepuumo maoro, laumo sira merade pangkoni si datu, mewali natudu sira ni datu lau si Yusupu, nauli, “Laumode komi si Yusupu, nipeulai ope-ope anu nasawaaka komi.”