I Yusupu mopakanoto lempona pangipi nu toperora ni datu
40
1 Sambela tempo, anu mororaka i datu panginuna, ai anu mororaka roti si datu, mobabei sira sala si datu. 2 Mewali ni tempo etu, marumpu i datu si sira rodua. 3 Etumo mpane napopesuku sira ni datu, i pesukua anu ria i tombi nu tadulako nu topokampai tombi kadatua. I se etu mbui i Yusupu rasuku. 4 Basangkia kasaena sira rasuku, tadulako nu topokampai tombi kadatua, moparentai i Yusupu bona mokadipuraka tau anu mororaka i datu panginuna, ai tau anu mororaka i datu roti.5 Sambela tempo ni kawengina, rodua tau anu rasuku aretu, sadua-sadua sira mangipi, ai lempona nu pangipira baria simbela. 6 Awetu madondo, dongkamo i Yusupu si sira, naita magero liora, etumo mpane nainsani ni Yusupu, kasusana rarara. 7 Mewali napekune sira ni Yusupu, nauli, “Mangkiada mpane masusada rarami eo ei?”
8 Mesono sira, raulira, “Ni ngkunuwia mangipi kami, agaiana baria ria tau anu pensani mopakanotoka kami lempona pangipiki.”
Nauli ni Yusupu, “Batena i Pue Ala ngkida anu mokiraka tau pekiri, lako pensanida mopakanoto lempona pangipi. Nituntuto pangipimi etu.”
9 Nauli nu tau anu mororaka i datu panginuna, “I rara nu pangipiku, kuita sampuu anggoro mbai i lioku. 10 Anggoro etu mopenga tolu, lako mepuu mbotoda motawe rangkana, mensuwumo mai wombona, mpane maisi sesena ai kasaliu mamongko wuana. 11 Ni tempo etu, tongoku mopatoro panginua ni datu, nidoaku wua anggoro etu, nipieku i panginua ni datu etu, mpane kuroraka i datu.”
12 Nauli ni Yusupu, “Eimo lempona pangipi etu: tolu mpenga, lempona tolu eo. 13 Mewali i katolu eona, i datu ina mampopensuwu iko lako i pesukua ei. Ina naampuni kamasalamu, mpane napopobago mpesola iko i bagomu anu ni banimpia, morora i datu. 14 Agaiana, inee malipa raramu si aku ane malompemo katuwumu. Kuperade tulungi bona nupadongka si datu kono i katuwuku ei, bona pensani ngkia aku rapopensuwu lako i pesukua ei. 15 Lawi kamonsona, ni banimpia aku ei tau anu rapelangkaka lako i tana nu toIbrani mai, ai i tana Masiri ei, baria aku sambela mobabei babeia anu madaa, anu sintoto rasukuka aku.”
16 Awetu nainsani nu tau anu mororaka i datu roti, lempona pangipi nu tau anu mororaka i datu panginuna etu malompe, etumo mpane mololita mbui ia si Yusupu, nauli, “Aku mbui mangipi, mosuu aku tolu ogu bingka moisi roti. 17 Bingka anu mbai wongko mpii moisi mampopengaa roti, mpane kukenika i datu, agaiana tongona kusuu, dongka sira tosi mangkoni roti anu tongona kusuu etu.”
18 Nauli ni Yusupu, “Eimo lempona pangipi etu: tolu ogu bingka, lempona tolu eo. 19 I rarana tolu eo ei, i datu ina motudu tau ina motompoki tambolomu, mpane wotomu ina ratoe i sambua arii, mpane tosi sira ina mangkoni isimu.”
20 Tolu eo olona lako i potuntu ni Yusupu, lempona pangipi nu rodua tau aretu, i datu mamposusai tinuwuna. Mobabei ia susa anu mabose, mpane naronde sira ope-ope topobagona. Ni tempo etu naposawaaka sira, bona tau anu mororaka ia panginuna, ai anu mororaka ia rotina, rapopensuwu sira lako i tombi pesukua, mpane rakeni i lio nu ope-ope topobago i tombi kadatua. 21 Toperora panginuna etu napopobago mpesola i bagona anu ni banimpia, 22 agaiana tau anu mororaka ia roti etu rapopate, mpane wotowatana ratoe sintoto ai apa anu nipololitamo ni Yusupu. 23 Agaiana, awetu tau anu mororaka i datu panginuna, malompemo katuwuna, bariamo ia mokaendo i Yusupu, agaiana malipada rarana.