I Yusupu ai towawine ni Potipa
39
1 I Yusupu nikenimo nu toIsmael samporangaa anu mobalu-balu, lau i tana Masiri, mpane rapobaluramo si Potipa sadua toMasiri anu mobago i tombi kadatua, motadulakoi topokampai tombi kadatua. 2 Tempo ni Yusupu meari si Potipa, tongawa mpuu petulungi ni PUE si ia. Etumo mpane ope-ope bago anu napobago, malompe pewalina. 3 Tongawa i petotoki ni Potipa, petulungi ni PUE si Yusupu, nakenimpewali lompena sinangka bagona. 4 I Potipa matono rarana si Yusupu, mewali naongko i Yusupu mewali topokadipuraka sinangka anu-anuna. 5 Mepuu lako ni tempo etu, nakeningka i Yusupuna, i PUE mowati katuwu ni Potipa toMasiri etu, ai sinangka kapebukuna, malompe anu i tombina, awetu mbui anu i bondena. 6 Sinangka anu-anu ni Potipa nakirakamo i Yusupu mokadipuraka. Etumo mpane i Potipa bariamo mampekiri sinangka bago anu i rara nu tombina, ngkalina ngkida pangkonina baria nakadipuraka ni Yusupu.I Yusupu sadua anantomoane anu maroso ai makara, 7 etumo mpane towawine ni Potipa mampokailu ia, mpane nabawai i Yusupu, nauli, “Maingkomode maturu simbela-mbela kita.” 8 Agaiana i Yusupu baria madota, nauli, “Inee kowo awee pampekirimi, aku tau anu napotuumo nu tuaku mokadipuraka ope-ope anu-anuna. Bariamo ia mampekiri ba apa mani i rara nu tombi ei. 9 I tombi ei, simbela kamakuasaku ai kamakuasana. Baria ria anu natumpui anu teliu kukadipuraka, ngkalina ngkida baria ria kuasaku si iko sambokona. Baria aku pensani mobabei babeia anu madaa etu, anu kupodosa i lio ni Pue Ala.” 10 Naudapae, eo-eona towawine ni Potipa etu, mokelo-kelo liliu ia i Yusupu, agaiana i Yusupu baria madota mampeulai peundeana, maturu simbela-mbela ai ia.
11 Sambela tempo, awetu i Yusupu mesua i rara nu tombi, ina lau mampobago bagona, ai ni tempo etu baria ria tau anu ntanina ni se etu, 12 mewali towawine ni Potipa kasaliu modii juba ni Yusupu, mpane nauli, “Maingkomode merou kita.” Agaiana baria madota i Yusupu, etumo mpane mengkawonsui ia lako i jubana, mpane melangka ia lau i raoa. Mewali jubana anu tongona napatoro nu towawine etu, napalengi. 13 Awetu naita nu towawine ni Potipa, i Yusupu melangka mopalengi jubana anu tongona napatoro, 14 towawine etu moronde tau sira anu ria i se etu, mpane nauli, “Nipeitato! ToIbrani anu nakeni nu tomoaneku i tombi ei, mai kita napakadaa. Mesua ia i rara nu lontaku mopaso aku sawoto-woto, agaiana kupasimbuku monganga-nganga, 15 etumo mpane melangka ia lau i raoa, mewali jubana ei teboli.”
16 Mewali juba etu, naboli nu towawine ni Potipa mampegia pesolana mai tomoanena. 17 Awetu mesola mai tomoanena, kasaliu napololita apa anu mewali, nauli, “Batua toIbrani anu nikenimu mai dulau mesua i rara nu lontaku ina mosilakai aku. 18 Agaiana awetu aku monganga-nganga, melangka ia lau i raoa, mewali teboli jubana, ei mboto woe!”
19 Awetu naepe ni Potipa pololita nu towawinena, maruminsi kasodona. 20 Etumo mpane napopesoko i Yusupu, ai napopesua i rara nu tombi pesukua, posukua nu tau anu masala si datu.
21 Agaiana i PUE mamporangai ai mampokaasi i Yusupu, etumo mpane tadulako nu tombi pesukua mangunde ia. 22 Mewali ni tempo etu, tadulako nu tombi pesukua mampotuu i Yusupu mokadipuraka ope-ope tau anu rasuku, ai sinangka bago anu i rara nu tombi pesukua etu. 23 Topotadulakoi nu tombi pesukua etu, bariamo mokampai ope-ope bago anu nakirakamo i Yusupu napobago, lawi naporangai liliu ia ni PUE, etumo mpane ope-ope anu napobago malompe pewalina.