I Yehuda ai i Tamar
38
1 Ni tempo etu, i Yehuda mopalengi pokana sira, mpane meari ia simbela-mbela ai i Hira sadua tomoane anu lako i kota Adulam. 2 Ni se etu, i Yehuda mombekaisanga ai sadua towawine toKanaan, ana ni Sua, duduura mosamboko. 3 I rara mposambokora, anara anu torapowutu tomoane, nasanga nu tuamana i Er. 4 Anu kadua, tomoane mbui sangana i Onan. 5 Anu katolu anara tomoane mbui, sangana i Sela. Tempo ni Sela rapoanaka, tuamana baria ria ni se etu, tongona ria i Kesib. 6 Awetu anana anu torapowutu anu rasanga i Er manginaomo, napoposambokomo ai i Tamar. 7 I Er tau anu baria malompe adana, etumo mpane marumpu i PUE si ia. Mewali nadoa ni PUE inosana. 8 Awetu mamatemo i Er, mololita i Yehuda si Onan toi ni Er, nauli, “Laumode si Tamar bemba nu powutumu, mpane nuperou ia, nupabukeimo apa anu sintoto mangula ada agamata si ia i rara mposambokomi, lawi iko toi nu tomoanena, ai bona ria ngkia pemulea nu powutumu.” 9 Agaiana nainsani ni Onan, anana luwu baria ia anu mampoana. Mewali bela-belana ia sawoto-woto ai bemba nu powutuna etu, ue nu katomoanena natende i raoa ngkida, bona baria ria pemulea nu powutuna. 10 Babeiana etu, baria naunde ni PUE, mewali Nadoa mbui ni PUE inosana. 11 Ni se etu mololita i Yehuda si Tamar maniana, nauli, “Tongomu mabemba mani pesolamode sala meari i tomanamu, nupegia kabose ni Sela, mpane lako kupoposambokoda iko ai ia.” Ewa etu pololita ni Yehuda, lawi maeka ia inee mpuupae i Sela ina napopate mbui ni PUE ewa powutuna anu rodua. Mewali mesola mpuumo i Tamar i tomanana. 12 Basangkia kasaena lako ni se etu, mamatemo towawine ni Yehuda. Awetu liumo tempona motumangisi wotowata towawine ni Yehuda, naronde ni Yehuda i Hira rangana anu lako i Adulam etu, lau sira i Timna pearia nu dimbana sira ragundi wulura. 13 Naepe ni Tamar bambari pomanianana i Yehuda ina mai i Timna, mai mogundiki wulu nu dimbana sira. 14 Mewali napasuru pesampi kabembana ai pesampi anu ntanina. Liona natuko ai bana anu napobobo, mpane ia lau momeso i boboka pesuangaa i kota Enaim, anu rapoliungi lau i Timna. Nainsani mpuu ni Tamar i Sela ana ni Yehuda anu torapotoi mpii mabosemo, agaiana baria mani ia rapopotombi ai i Sela sintoto ai dandi ni Yehuda si ia. 15 Awetu i Yehuda mangita i Tamar, nipenoka ni Yehuda towawine etu sadua towawine anu paka mampobalu wotona, lawi liona tetuko. 16 Mewali nagompilisi ni Yehuda towawine i wiwi nu dala etu, mpane naperade, nauli, “Mai iko maturu simbela ai aku.” Baria nainsani, towawine etu maniana. Mesono i Tamar, nauli, “Ane awetu, apa anu ina nukiraka aku?” 17 Nauli ni Yehuda, “Ina kukiraka iko sambaa towau anu mangura mani.” Mesono towawine etu, nauli, “Pensani mboto, agaiana ria nsalaa pempatoroaku anu nukiraka aku, lako baria mani mai nupakatu towau etu.” 18 Napekune ni Yehuda, nauli, “Apamo anu mewali pempatoroamu?” Mesono i Tamar, nauli, “Kirakamode aku penemu, simbela-mbela ai soona, mpane nukiraka mbui aku lintokomu.” Mewali nakiraka ni Yehuda anu naperade aretu, mpane sira sawoto-woto, ai nakeningkasawoto-wotora ni tempo etu, i Tamar mampaiwoto. 19 Roo awetu, mesola i Tamar i tombina, mpane nabungkasi bana anu napopotuko liona mpane napake mpesola pesampi kabembana. 20 Baria masae olona lako ni tempo etu, i Yehuda motudu i Hira mangkenika towawine etu sambaa towau, mpane mamperade mpesola parewa anu nakiraka towawine etu mewali pempatoroana. Agaiana awetu nakadelo ni Hira, baria ria nasumba ni Hira towawine etu. 21 Napekune ni Hira i tau sira i Enaim, nauli, “Imba pearia nu towawine anu mampobalu wotona, anu paka momeso i wiwi dala ei?” Mesono sira, raulira, “Baria sambela ria towawine anu mampobalu wotona i se ei.” 22 Mewali mesolamo i Hira si Yehuda mpane napadongka, nauli, “Baria ria kusumba kukadelo towawine etu. Ane panguli nu tau si dou sira, baria ria towawine anu mampobalu wotona si dou.” 23 Nauli ni Yehuda, “Pogeakamode parewa aretu, iamo tumpuna, ineemo takadelo liliu bona baria kita nasumba maea, lawi saweekumo bona kubaiari ia, agaiana baria ia nusumba.” 24 Tolu mbula lako ni se etu, naepe ni Yehuda nauli nu tau kono si Tamar maniana, sadua towawine anu mampobalu wotona ai mampaiwotomo. Mewali natudu ni Yehuda tauna sira, naulika, “Lau nidoa ia mpane nisuwe duduuna mamate!” 25 Tongo ni Tamar rakeni mensuwu lau i raoa, napakatu parewa aretu i pomanianana ai natewai, nauli, “Niulika ia, anu mopakantimi aku, ei parewana anu nikirakana aku. Niparesa ima kamonsona tumpu nu pene ai soona, ai lintoko ei?” 26 Awetu nadoko ni Yehuda parewa aretu, naparesa, mewali nainsanimo parewa aretu ia tumpuna. Etumo mpane, nauli, “Towawine dou baria masala, akuda anu masala, lawi baria ia kupoposamboko ai anaku i Sela.” Ai bariamo nasola ni Yehuda mamperou i Tamar. 27 Awetu temponamo i Tamar moana, ni se etu tongawamo anana moropa. 28 Tongona mampakaroso moana, sadua anakoi anu moropa etu palena sambali mensuwu ilodo, mewali sando anu mepopoana etu, napatoro pale nu anakoi etu, mpane napopatakai lero mawaaga, mpane, nauli, “Anakoi ei anu ilodo mensuwu.” 29 Agaiana anakoi etu, nadii mpesola palena, agaiana samporopanada anu ilodo mensuwu. Mewali nauli nu sando etu, “Mewali ewa etudapae babeiamu bona mensuwu iko!” Mewali anakoi anu mensuwu ilodo etu, nasanga i Peres. 30 Mpane lako mensuwuda toina anu nipopatakai lero mawaaga palena. Rasanga ia i Sera.