I Yusupu ai poka-pokana
37
1 Awetu i Isaki tuama ni Yako mamatemo, i Yako meari i tana Kanaan, pearia nu tuamana etu. 2 Mewali eimo lolitakana pemulea ni Yako.Tempona tinuwu ni Yusupu sampulu pitu mpae, mamporewumo ia towau ai dimba simbela-mbela ai powutuna sira tomoane, iamo ana ni Bilha ai Silpa anu nasamboko mbui nu tuamara. Ni tempo etu, i Yusupu mampetumbui i tuamana babeia nu pokana sira anu madaa.
3 I Yako maruminsi pampokakaiana i Yusupu mpane lako i ope-ope anana anu ntanina, lawi i Yusupu napoanaka i katuaanamo tinuwuna. Nakeningka napokakaiana, napopedauka i Yusupu juba anu merae mpii. 4 Awetu raita nu poka-pokana sira, maruminsi pampokakaia nu tuamara i Yusupu mpane lako sira, mewali rakasisiramo i Yusupu, ai bariamo rapololitakara lompe.
5 Sambela tempo ni kawengina, i Yusupu mangipi, mpane pangipina etu natuntuka sira pokana, 6-7 nauli, “Nipetingai, mangipi aku, ope-ope kita tongota i bonde moboke gandu. Ganduku meongko togo i tongo, mpane gandumi motoleliki ganduku, mpane motumpa i ganduku.”
8 Awetu natuntu pangipina i poka-pokana sira, tetambaimo karakasisina. Rakambarokara i Yusupu, raulira, “Nipenokamupae, ina mewali iko datu ai makuasa iko si kami?” Mewali ni tempo etu, nakenimpotuntuna pangipina, tetambai mpiimo pokasisira i Yusupu.
9 Baria masae lako ni tempo etu, mangipi mbuimo i Yusupu, mpane pangipina etu natuntu i poka-pokana sira, nauli, “Mangipi mbuimo aku. Niitaku eo, wula, ai sampulu saogu betue motumpa si aku.”
10 Pangipina etu napololita mbui i tuamana, mewali nakambaroka ia nu tuamana, nauli, “Pangipi apa etu? Nipenokamupae, aku, tinamu ai poka-pokamu sira, ina mai motumpa si iko?” 11 Etumo mpane poka-poka ni Yusupu masina sira, agaiana tuamara batena mampempekiri liliu pangipi etu.
I Yusupu rapobalu mpane rakeni lau i tana Masiri
12 Sambela tempo, awetu powutu ni Yusupu lau mamporewu towau ai dimba nu tuamara i Sikem. 13 Mololita i Yako si Yusupu, nauli, “Laumode i Sikem, i porewua nu poka-pokamu.”
Mesono i Yusupu, nauli, “Io, uma.”
14 Nauli nu tuamana, “Nupeita ba adiwa sira poka-pokamu, towau ai dimbara, mpane mesola iko mai nupadongka si aku.” Kaawetuna mpuumo, napalengimo ni Yusupu lembo Hebron.
Basangkia kasaena ia molumako dongkamo ia i Sikem.
15 Tongona wilau wimai mangkadelo pokana sira i pada, momberumpa ia ai sadua tau, napekune ia nu tau etu, nauli, “Apa anu nukadelo?”
16 Nasonoi ni Yusupu, nauli, “Poka-pokaku anu tongora mamporewu towau ai dimba, babila nuinsani mbotoda ba imba kariaara?”
17 Mesono tau etu, nauli, “Lambumo sira lako i se ei. Niepeku niulira ina lau sira i Dotan.” Mewali napapulomo polumakoana mampeula poka-pokana aretu, mewali nasumba mpuumo sira i Dotan.
18 Karao mani mai i Yusupu, raitaramo, mewali raliwoakaramo ina rapopatera. 19 Mololitamo sira sadua ai sadua, raulira, “Totoki tau anu wule mangipi bagona, doumo mai. 20 Hia, tapopate ia, mpane wotowatana tanawu i rara nu tibubu anu mabangi. Tauli luwu i tuamata, ia nasokomo nu sambaa binata anu maseke, tapeita luwu ba mamonso mpuu pangipi-ngipina.”
21 Awetu naepe ni Rube pololitara etu, nakadelo dala ina mopatuwu ia i Yusupu, naulika sira, “Inee ia tapopate. 22 Aginamo tanawu ngkimo i rara nu tibubu i pada dii ei, agaiana inee tarugii ba tabelai wotona.” Tunggaia ni Rube bona mopatuwu i Yusupu ai bona nakeni mesola i tuamara. 23 Awetu i Yusupu dongka i poka-pokana sira, kasaliu rasokora ia, mpane raperampaira jubana anu merae mpii etu. 24 Mpane radiinsosora lau ranawura i rara nu tibubu anu mabangi. 25 Roo awetu, momesomo sira mangkoni. Tongora mangkoni, ungangkidamo raitara toIsmael samporangaa anu mobalu-balu, lako i tana Gilead mai. ToIsmael aretu meari sira i Midea. Onta-ontara rapopangkenira sulo kau, wongi-wongi anu masuli balukina, ai rampa-rampa. Lau sira i tana Masiri. 26 Nauli ni Yehuda, “Apamo bunduna ane toita tapopate, mpane tawunikai ka tapopatena. 27 Tapobalu ngkimo ia i toIsmael ridou, ineemo ia tapapadiwaka, lawi naudapae ba adiwamo, ia etu batena toita.” Lolitana etu rapeulai nu pokana sira. 28 Awetu melempo toIsmael samporangaa anu mobalu-balu, i Yusupu raore nu powutuna sira lako i rara nu tibubu etu, mpane nipobalura i toIsmael samporangaa anu mobalu-balu. Balukina rompulu doi pera, mpane i Yusupu rakenimo nu topobalu-balu aretu lau i tana Masiri.
29 Babeiara etu baria nainsani ni Rube, mewali awetu lau napetiro i Yusupu i rara nu tibubu, bariamo ria i rara nu tibubu, mewali nasepa-sepa baduna nakeningkawiorana rarana. 30 Mesola ia i poka-pokana, mpane nauli, “I Yusupu bariamo ria i rara nu tibubu dou! Apa anu sangangaa kupobago ei-ei?”
31 Roo awetu, mosambale sira sambaa towau, mpane juba ni Yusupu raemera i raa nu towau etu. 32 Mpane ratudura sadua tau mangkenika tuamara juba etu, ratewaira ewa ei, ka nuulina, “Juba ei nisumbaki, nipelensei nsalaato, babila juba nu anamu i Yusupu mbotoda?”
33 Awetu naita ni Yako juba etu, mololita ia, nauli, “Monso ei juba nu anaku! Manoto nasoko nu binata anu masekemo ia. Ee, mamatemo anaku i Yusupu nasepa-sepa nu binata anu maseke!” 34 Mewali kasaliu nasepa pesampina lawi mawiora rarana, mpane mopake ia sampi karu, mopatongawa kawiora nu rarana, ai basangkia eo kasaena motumangisi ia anana i Yusupu. 35 Ope-ope anana, malompe tomoane awetu mbui towawine dongka sira mopakalene rara nu tuamara, agaiana baria ia madota rapakalenera, agaiana niulinada, “Nauda duduuku mamate, batena ngkida kutumangisi anaku.” Awetu mpuumo i Yako, mawiora liliu rarana lawi napekiri mamatemo i Yusupu.
36 Tongo ni Yako mawiora motumangisi anana, toIsmael samporangaa anu mobalu-balu aretu, dongkamo sira i tana Masiri, mewali rapobaluramo i Yusupu si Potipa, topobago i tombi kadatua, anu motadulakoi mokampai tombi kadatua.