Pemulea ni Esau
36
1 Eimo pemulea ni Esau anu rauli mbui i Edom. 2 I Esau mosamboko ia tolu dua towawine toKanaan iamo: i Ada ana ni Elo toHet, i Oholibama ana ni Ana ai tumpu ni Sibeon toHewi, 3 ai i Basmat ana ni Ismael toi ni Nebayot. 4 I Ada mampemuleka i Elipas, i Basmat mampemuleka i Rehuel, 5 Mpane i Oholibama mampemuleka i Yeus, i Yaelam, ai i Kora. Ope-ope anakoi aretu rapoanaka sira i tana Kanaan.6 Roo awetu, napalengi ni Esau i Yako mpane lau ia i tana anu ntanina, nakeni towawinena sira, anana sira, ai ope-ope tau anu ria i tombina, simbela-mbela ai ope-ope pinatuwuna, ai anu-anuna, anu nisumbana ni tana Kanaan. 7 Mpane ia mepogaaki lako si Yako, lawi maisi gaga anu-anura, etumo mpane baria sira pensani tuwu simbela-mbela. Apa mani i tana anu rapeariira simbela-mbela etu, baria sondo pangkoni nu binatara lawi maisi gaga binatara. 8 Mewali i Esau anu rauli mbui i Edom, meloso ia, lau meari i Seir i tana anu mobulu-bulu.
9 Eimo pemulea ni Esau ulububu nu toEdom. 10-13 Towawine ni Esau anu rasanga i Ada, moana ia sadua tomoane sangana i Elipas. I Elipas lima anana tomoane iamo: i Teman, i Omar, i Sepo, i Gaetam, ai i Kenas. I Elipas mosamboko mbui ia sadua batua nu towawinena anu rasanga i Timna. I Timna etu moana mbui ia, sanga nu anana i Amale. Towawine ni Esau anu rasanga i Basmat, moana ia sadua tomoane sanga nu anana etu i Rehuel. Mpane i Rehuel mampemuleka iba dua tomoane iamo: i Nahat, i Sera, i Siama, ai i Misa.
14 Towawine ni Esau anu rasanga i Oholibama iamo ana ni Ana, tumpu ni Sibeon. Moana ia tolu dua tomoane iamo: i Yeus, i Yaelam ai i Kora.
15 Eimo pemulea ni Esau, anu rapotadulako nu tau santina-santina: I Elipas ana ni Esau anu torapowutu, iamo ulububu nu tau santina-santina, iamo: i Teman, i Omar, i Sefo, i Kenas, 16 i Kora, i Gaetam, ai i Amale. Ope-ope sira ei, pemulea ni Esau lako si Ada.
17 I Rehuel ana ni Esau rapoulububu ia nu tau santina-santina iamo: i Nahat, i Sera, i Siama, ai i Misa. Ope-ope sira ei, pemulea ni Esau si Basmat.
18 Eimo pemulea ni Esau si Oholibama, ana ni Ana, sira eimo anu rapoulububu nu tau santina-santina iamo: i Yeus, i Yaelam, ai i Kora. 19 Ope-ope tau santina-santina aretu, pemulea asa ni Esau.
Pemulea ni Seir
20-21 I Seir iamo sadua toHori, anu meari i tana Edom ni banimpia. Eimo pemuleana anu mewali tadulako nu tau santina-santina iamo: i Lotan, i Sobal, i Sibeon, i Ana, i Disyon, i Eser, ai i Disyan.
22 I Lotan ulububu nu tau santina-santina iamo: i Hori ai i Heman. (Ria toi ni Lotan towawine sangana i Timna.)
23 I Siobal ulububu nu tau santina-santina iamo: i Alwan, i Manahat, i Ebal, i Sepo, ai i Onam.
24 I Sibeon mampemuleka ia rodua tomoane iamo: i Aya ai i Ana. (I Ana eimo anu mansumba mata ue anu makula i pada, tempona mamporewu kalide nu tuamana.) 25-26 I Ana tuama ni Disyon, mpane i Disyon ulububu nu tau santina-santina iamo: i Hemdan, i Esiban, i Yitran, ai i Keran, ai ria mbui anana towawine sangana i Oholibama.
27 I Eser ulububu nu tau santina-santina iamo: i Bilhan, i Sawan, ai i Akan.
28 I Disyan ulububu nu tau santina-santina iamo i Us ai i Aran.
29-30 Sira eimo basangkia ntina toHori anu meari i Edom iamo: i Lotan, i Siobal, i Sibeon, i Ana, i Disyon, i Eser, ai i Disyan.
Datu anu meparenta i Edom
31-39 Lako baria mani ria datu anu moparenta toSaraeli, datu anu arei meparenta sira i Edom mombepapasuru.
Mpolinguruna,
i Bela ana ni Beor lako i Dinhaba.
I Yobab ana ni Sera lako i Bosra.
I Husiam lako i Teman.
I Hadad ana ni Bedad lako i Awit. (Iamo anu monangi toMidian tempora mombeala i Moab).
I Samla lako i Masreka.
I Saul lako i Rehobot i wiwi ue.
I Baal-Hanan ana ni Akbor.
I Hadar lako i Pahu. (Towawinena rasanga i Mehetabeel, ana ni Matret, tumpu ni Mesahab).
40-43 I Esau ulububu nu basangkia ntina tau anu ria i Edom iamo: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel, ai Iram. Pearia anu rapeariira santina-santina rasangara mangula sanga nu ulububura.