I Yako sampoanaka ai tauna sira mesola i Betel
35
1 Sambela tempo, i Pue Ala mololita si Yako, Nauli, “Akumo i Pue Ala anu mampatongawamo wotoKu si iko i Betel, tempomu melangka mampokaeka powutumu i Esau. Mewali, pesolamode maliga i Betel. Pearimode si dou, mpane nuwangu saogu potunua popenomba, nupake menomba si Aku.”2 Mewali mololitamo i Yako, i ope-ope tau anu ria i rara nu tombina, ai i ope-ope tau anu simbela-mbela ai ia, nauli, “Nitendemode watutau anitumi anu ria i tongo-tongomi, mpane nibakosi wotomi nipasuru pesampimi. 3 Mampasilolongamo kita lau i Betel, ina mobabei aku potunua popenomba si Pue Ala si dou, anu mosonoimo aku, i tempona aku mapari, ai anu mamporangaimo aku i dala anu kupodalai.” 4 Awetu raepera pololita ni Yako etu, rasusukara i Yako ope-ope parewara anu nipoanitura ai dali anu ria si sira. Ope-ope parewa aretu, natau ni Yako i puu nu kau anu mabose gompi i kota Sikem.
5 Tempo ni Yako sampoanaka, ai ope-ope tauna mangoka, nababei ni Pue Ala bona ope-ope tau anu ria i kota-kota etu, mewali maeka si sira, bona ntena sira mowulai i Yako ai anana sira. 6 Mewali dongka mpuumo sira i tana Kanaan i kota Betel anu ni banimpia rasanga Lus. 7 Ni se etu nawangu ni Yako potunua popenomba, mpane nasanga pearia etu “El Betel.” Lawi ni se etu i Pue Ala mampatongawa wotoNa si ia, i tempona melangka mampokaeka i Esau powutuna. 8 Ni se etu mbui i Debora, towawine anu mokadipuraka i Ribka lako kokoi, mamate mpane wotowatana rapaiwura i puu nu kau anu mabose, mbai monsau kota etu. Etumo mpane puu nu kau etu rasanga “Kau Potumangia”.
I Pue Ala mowati i Yako i Betel
9 Awetu i Yako mesola lako i Mesopotamia, Napatongawa mbuimo ni Pue Ala wotoNa si Yako i Betel mpane Nawati, 10 nauli, “Bariamo iko raronde i Yako, agaiana rarondemo iko i Saraeli.” Mewali nasanga mpuumo ia ni Pue Ala i Saraeli. 11 Mpane mololita mbui i Pue Ala, Nauli, “Akumo i Pue Ala anu makuasa. Pemule-mulemode duduuna maisi pemuleamu! Pemuleamu sira ina mewali basangkia ntina tau anu mawori, ai ina mewali iko ulububu nu datu-datu sira. 12 Tana anu nikirakaKumo i Burahima ai i Isaki, ina Kukiraka iko ai pemuleamu sira.” 13 Roo awetu, Napalengimo ia ni Pue Ala. 14 I pearia ni Pue Ala mololita ai ia, nawangu ni Yako saogu watu i se etu, bona mewali sambua pepopainga, mpane nakando anggoro ai lana saitun i wongkona napopenomba si Pue Ala. 15 Pearia etu nasanga “Betel”.
Kamate ni Raheli
16 Roo awetu, i Yako ai tauna sira lambumo lako i Betel. Awetu bariamo gaga karao sira lako i boea Efrata, dongkamo tempo ni Raheli moana, agaiana poanana etu mapari. 17 Tongona mensuwu mai anana, mololitamo sando anu mampopoana ia etu, nauli, “Pakaroso raramu, Raheli, anamu ei tomoane.” 18 Lako baria mani ia mangkabotu, nasanga anana etu Ben-Oni. Agaiana i Yako mosanga i Benyami.
19 Awetu i Raheli mamate, wotowatana rapaiwu i wiwi nu dala lau i Efrata, anu ei-ei sangana Beteleme. 20 Nadoa ni Yako saogu watu, mpane napatogo mewali sambua pepopainga. Duduuna ei-ei talumba ni Raheli rapekatandai mani ai watu etu. 21 Mpane napapulo ni Yako polumakoana, moliu solompio Eder mpane nababei bambaruna, i sambua pearia i sambali nu solompio Eder. 22 Tongora meari ni se etu, i Rube mamperou i Bilha, anu natenda nu tuamana nasamboko. Awetu naepe ni Yako, maruminsi kasodona.
Ana ni Yako anu tomoane sira
Ana ni Yako anu tomoane sampulu rodua. 23 Anana anu lako si Lea: anu torapowutu iamo i Rube, mpane toina sira iamo i Simeo, i Lewi, i Yehuda, i Isakar, mpane i Sebulo. 24 Anana si Raheli, iamo: i Yusupu ai i Benyami. 25 Anana si Bilha, batua ni Raheli, iamo: i Dan ai i Naftali. 26 Anana si Silpa, batua ni Lea iamo: i Gad ai i Aser. Ope-ope sira etu, ana ni Yako anu tomoane, anu rapemuleka i Mesopotamia.a
Kamate ni Isaki