I Dina napaso ni Sikem sawoto-woto
34
1 Sambela tempo, ana ni Yako si Lea anu rasanga i Dina, molulumako ia lau mampomberumpaka basangkia towawine toKanaan. 2 Awetu i Sikem ana ni Hemor toHewi anu rapodatura i tana etu mangita i Dina, kasaliu napelangkaka, mpane napaso sawoto-woto ai ia. 3 Agaiana nauda ewa etu, maruminsi pampokailuna i Dina, etumo mpane napari-pari mandoa rara ni Dina bona naunde mbui ia ni Dina. 4 Mololita i Sikem i tuamana, nauli, “Kuperade uma, bona lau nupololitaka tuama nu towawine ei, bona kusamboko ia.”5 Naepe ni Yako anana towawine i Dina napakakerakimo ni Sikem ka anantowawinena. Tempo etu, anana sira anu tomoane tongora mani mamporewu pinatuwu i pada, etumo mpane baria mani ba apa anu nababei lako baria mani dongka sira anana.
6 I Hemor ai i Sikem lau si Yako, mampololita kono si Sikem ai i Dina. 7 Ni tempo etu, ana ni Yako anu tomoane dongkamo sira mai lako i pada. Awetu raepera apa anu mewali etu, tingkara sira ai maruminsi karumpura. Lawi nakeningka napaewa etu ni Sikem toira, i Sikem mopakoimo ope-ope toSaraeli. 8 Nauli ni Hemor si Yako, “Anaku i Sikem, mampokailu anamu ina nasamboko, mewali merade tulungi aku, bona nupaliu anamu nasamboko nu anaku. 9 Ane niunde, tabotusi simbela-mbela, ewa ei: pemuleamu ai pemuleaki pensani sira mosamboko. 10 Ai ane niunde ewa etu, pensani komi meari simbela-mbela ai kami i tana ei, imba ngkida peundeami. Pensani komi mobalu-balu ai meari i tana ei.”
11 Roo awetu, mololita i Sikem i tuama ni Dina ai i powutu ni Dina sira, nauli, “Nipabukeimo pamperadeku ei, ai ane nipabukei, apa ngkida anu niunde niperade si aku, kukiraka komi. 12 Niulimode, apa anu niunde ina kukiraka ntoo komi, mpane nipakanoto ada nu toimi. Ina kukiraka komi apa ngkida anu niperade, agaiana nipaliu aku mosamboko ai toimi.”
13 Nakeningka napakakerakinamo ni Sikem ka anantowawine nu toira i Dina, rapodongkokara i Sikem ai tuamana i Hemor. 14 Mololita sira, raulira, “Maea kami mopaliu toiki nasamboko nu tau anu baria ratindi. 15 Pensani kipabukei pamperademi etu, agaiana nipabukei pamperadeki ei: komi sangangaa ewa kami, lempona ope-ope tomoanemi sangangaa ratindi. 16 Roo awetu, lako kipeulaida peundeamu kono i pemuleaki ai pemuleami pensani sira mosamboko. Roo awetu, baria kami ina lambu lako i se ei, ina mewali kami santina ai komi. 17 Ane baria komi madota mampeulai apa peundeaki ei, ai baria komi madota ratindi, kidoa mpesola toiki etu, mpane kami malambu lako i se ei.”
18 Sintoto i rara ni Sikem ai tuamana pamperadera etu. 19 Mewali kasaliu napabukei ni Sikem pamperadera etu, lawi maruminsi pampokailuna i Dina. I olora santina, i Sikemmo anu raadai ai rapetingaira mpii pololitana.
20 Roo awetu, i Sikem ai tuamana lau sira i pogomboa i boboka pesuangaa i kota etu, mpane rapololitara i tau anu ria i kota etu, raulira, 21 “ToSaraeli aridou simadata, mewali pogeaka sira meari i se ei simbela-mbela ai kita, ai baria sira pensani rasombo imba ngkida raundera lau, lawi tanata ei sondo tapearii nauda ai sira. Pensani kita mosamboko ai anantowawinera, awetu mbui sira. 22 Agaiana tau aridou madota sira meari simbela-mbela ai kita, ai madota mbui sira mewali santina ai kita, agaiana tapeulai peundeara iamo: ope-ope kita tomoane sangangaa ratindi ewa sira. 23 Ope-ope pinatuwura, ai ope-ope anu-anura luwu, mewali tatumpui. Mewali, tapeulaimo peundeara bona madota sira meari simbela-mbela ai kita.” 24 Ope-ope tau anu mogulu i se etu, mampokono apa anu napadongka ni Hemor ai i Sikem si sira. Etumo mpane ope-ope tomoane anu nainsanimo mampekiri anu ria i kota etu, ope sira ratindi.
25 Katolu eona lako i karoora ratindi, mewali madua mani raepera, rodua ana ni Yako powutu ni Dina iamo i Simeo ai i Lewi, radoara gumara, mpane mesua ngkandii-ndii sira i rara nu kota etu, mpane rapopatera ope-ope tomoane i rara nu kota etu, 26 tepesua i Hemor ai i Sikem, mpane radoara i Dina lako i rara nu tombi ni Sikem, mpane malambu sira. 27 Awetu i Simeo ai i Lewi roomo mampopate ope-ope tomoane i kota etu, ana ni Yako anu ntanina sira, lau sira morampaki anu-anu nu tau i rara nu kota etu, mangala suru sira, lawi toira rapakakerakimo ka anantowawinena. 28 Radoara towau, dimba, japi, kalide, ai sinangka anu ria i rara nu kota, awetu mbui anu ria i pada. 29 Anu-anu, anu masuli balukina ope radoara, ratawanira ope-ope towawine ai anakoi, mpane rarampakira ope-ope isi nu tombi anu ria i rara nu kota etu.
30 Mololita i Yako si Simeo ai si Lewi, nauli, “Nipakapari aku, ei-ei ope-ope toKanaan ai toFeris ai ope-ope tauna anu meari i tana ei ina mokasisi aku. Tauta baria maisi, ane mogulu sira moewa kita, mpane rabungkara kita, ope kita rapopatera.”
31 Agaiana mesono sira, raulira, “Baria kipogeaka toiki rababeira ewa towawine anu mampobalu wotona.”