I Yako momberumpa ai i Esau
33
1 Karao mani i Esau, naitamo ni Yako simbela-mbela ai iba atu dua tauna. Mewali nagaa-gaa sira anana, si Lea, si Raheli, ai i rodua batua nu towawinena anu rakiraka mbui nasamboko. 2 Mewali anu mbai i lio naboli rodua batua nu towawinena aretu ai anara, mpane i Lea naboli mbai tongo ai anana sira, mpane i Raheli ai i Yusupu naboli mbai i taliku mpii. 3 Mpane ia saduduana molumako i liora, tongona molumako mogompilisi powutuna, molingkudu ai motumpa ngkalako ia, pitu mbela. 4 Agaiana i Esau saduduana melangka ia mampomberumpaka i Yako, ai awetu ia dongka si Yako, nakalupui i Yako mpane naiki. Mpane mombetumangisi sira roduara. 5 Awetu naita ni Esau ope-ope towawine ai anakoi aretu, napekune i Yako, nauli, “Imada sira tau arei anu mamposimbelaka iko?”Mesono i Yako, nauli, “Sira ei anaku, i Pue Ala anu mampopemule aku.” 6 Roo awetu, batua nu towawinena anu rakiraka mbui nasamboko aretu simbela-mbela ai anara, lau sira mogompilisi i Esau, mpane motumpa molingkudu moadai ia. 7 Roo awetu, motumpa mbuimo i Lea ai anana sira moadai i Esau. Mpane anu kasopoana motumpa molingkudu moadai i Esau iamo i Raheli ai i Yusupu. 8 Napekune ni Esau i Yako, nauli, “Apa tunggaiamu ai taumu sira anu nipomberumpakaku ni mpongone?”
Mesono i Yako, nauli, “Tunggaiaku bona mopakalompe raramu.”
9 Agaiana nauli ni Esau, “Sondomo anu-anuku, baria ria bunduna nukiraka ntoo aku anu-anumu.”
10 Mesono i Yako, nauli, “Inee! Ane matonomo raramu si aku, dokomode anu kususuka iko ei. Aku saduduaku, mangita liomu ngkida, simbelamo ai mangita aku lio ni Pue Ala, lawi nudoko lompemo aku. 11 Merade tulungi aku, dokomode anu-anuku, anu nikenikumo mai ei. Napokaasimo aku ni Pue Ala anu mokirakamo aku sinangka-nangkana.” Nakeningka napari-parina liliu ni Yako, mewali kasopoana nadoko ngkidamo ni Esau sinangka anu nakira ni Yako si ia.
12 Mpane mololita i Esau, nauli, “Mampatimamamo kita ina mangoka, aku anu ina molumako mamporangai iko.”
13 Mesono i Yako, nauli, “Nuinsani mboto anakoi arei, baria sira maroso. Aku mbui sangangaa mokadipuraka lompe sira binata anu tongora mopasusu anara. Ane magasi gaga karairira, nauda saeoa ngkida, manotomo ope-ope binata aretu ina mamate. 14 Poilodomode, maole-oledamo aku i taliku, mangula lempa nu binata arei ai lempa nu anaku sira, duduuna kusumbadamo iko i Edom.”
15 Nauli ni Esau, “Ane ewa etu, kupalengika iko basangkia dua tauku, mamporangai iko i dala i rara mpolumakoamu.”
Agaiana nauli ni Yako, “Ineemo aku nuposesa, kalompemu melumbumo si aku.” 16 Mewali ni eo etu, mangokamo i Esau mesola ia i Edom. 17 Agaiana i Yako lau ia i Sukot, mpane napopeongko tombina ni se etu, ai nababei mbui bambaru peongaa nu binatana sira. Etumo mpane pearia etu rasanga Sukot.
18 I rara polumako ni Yako mepuu lako i Mesopotamia, duduuna dongka ia i kota Sikem i tana Kanaan, dongka ia ai kalompe-lompena. Mpane nababei bambaruna i sambua pada gompi i kota etu. 19 Pada anu napobabeingi bambaruna etu, nibalukina i tau, pemulea nu toHemor, tuama ni Sikem, balukina sangatu doi pera. 20 Mpane nababei mbui potunua popenomba i se etu, mpane nasanga, “Pue Ala nu toSaraeli iamo El.”