I Yako mampatimama ina momberumpa ai i Esau
32
1 Napapulo ni Yako polumakoana, mpane basangkia malaeka ni Pue Ala mampomberumpaka ia. 2 Awetu naita ni Yako malaeka aretu, mololita ia, nauli, “Ei pearia nu surudado ni Pue Ala.” Etumo mpane pearia etu nasanga Mahanaim. 3 Roo awetu, natudu ni Yako basangkia dua sira tau moilodo lau i tana Seir pearia nu toEdom, bona mampomberumpaka i Esau powutuna. 4 Lako baria mani sira mangoka, mololita i Yako si sira, nauli, “Nipadongka tewaiku si Esau tuaku, niuli: tewai nu batuamu i Yako: Mepuu lako i kalambuku ni banimpia, ni tempo etu, meari aku si Laban. 5 Ei-ei riamo japiku, kalideku, dimbaku, towauku, ai batuaku sira. Mopakatu aku tewaiku i tuaku, pesarumakaku bona matono rara nu tuaku, ai nadoko lompe aku.”6 Awetu tau anu natudu ni Yako aretu mesola mai si ia, mololita sira, raulira, “Nalaumo kami si Esau powutumu, nipadongkakimo tewaimi si ia, ai ei-ei tongona i dala, mai ia mampomberumpaka komi, mai ia simbela-mbela ai tauna, kaworira iba atu dua.” 7 Mangepe bambari etu, maruminsi kaeka ni Yako ai mapari rarana, etumo mpane ope-ope tau anu ria si ia, nagaa mewali rontutuma, awetu mbui dimbana, towauna, japina, ai ontana. 8 Nauli nu pekirina, “Ane dongka mai i Esau mpane nabungka tauku anu santutuma, babila tauku anu santutuma, baria nasumba nabungka, ai pensani sira melangka.” 9 Mpane mekakae i Yako si PUE, nauli, “O Pue Ala anu napenombai nu tutuaku i Burahima, ai tuamaku i Isaki, Nupetingai pekakaeku! Nutudumo aku bona mesola i tanaku, ai i pokaku sira. Mpane Iko saduduaMu anu modandimo si aku anu ina mokadipuraka lompe katuwuku. 10 Baria aku sintoto modoko ope-ope pepokaasiMu, ai peniniMu anu baria mabotu i rara nu katuwuku. Tempoku mai meongko ni banimpia moweta ue Yarade, baria mogalo apa anu kukeni, batena lintokoku ngkida. Agaiana ei-ei i pesolaku, tauku kugaa sira kuparontutuma. 11 Kuperade PUE, Nutulungi aku lako i powutuku i Esau. Maeka aku ane dongka ia mobungka ai mampopate aku, towawineku sira ai anaku sira. 12 Nukaendo PUE dandiMu si aku, ina mokadipuraka lompe sinangka-nangkana si aku, ai Nupopemule-mule aku. Baria mogalo sadua anu nabuku moimba kaworira. Lawi kaworira ewa kaisi nu wungi i wiwi nu tasi.”
13-15 I Yako mosambengi i se etu. Ewa ineilena madondo, nadoamo ni Yako binatana sira santongo, anu ina nakiraka i Esau, iamo rongatu mbaa towau tinana, rompulu mbaa towau tuamana, rongatu mbaa dimba tinana, mpane rompulu mbaa dimba tuamana, tolu mpulu mbaa onta anu tongora mopasusu ante anara, iba mpulu mbaa japi tina, mpane sampulu mbaa japi tuamana, rompulu mbaa kalide tinana, mpane sampulu mbaa kalide tuamana. 16 Nagaa-gaa binata aretu mewali basangkia gaana, mpane nakiraka sira batuana, mololita ia si sira, nauli, “Laumode komi moilodo, nikampai olo nu tutumami, bona baria mombegompilisi.” 17 Napololitaka ni Yako batuana sira anu ina moilodo mpii, nauli, “Ane komi anu ilodo napomberumpaka ni Esau powutuku, mpane napekune ima tuami? Ina imba komi lau, ai ima tumpuna binata anu niiri aretu? 18 Nisonoi ia, niuli, ‘binata arei batuamu i Yako tumpuna, napakatu mai ei nakiraka iko, tuana, ai ia saduduana dumai mbotora i talikuki.’” 19-20 Awetu mbui naulika sira batuana anu karontutumana, katolu ntutumana, ai i ope-ope sira tau anu moiri binatana aretu. Lawi nauli nu pekirina, babila madota mbotoda i Esau kupakalompe pekirina ai binata anu ina kukiraka ntoo si ia, bona awetu kami momberumpa, bariamo aku napairara. 21 Etumo mpane napakatu binata anu nasusuka i Esau etu, agaiana ia saduduana ni kawengi etu, mosambengi mani ia i bambaruna.
I Yako mombelule ai i Pue Ala
22 Mewali ni kawengi etu mbui momeso ia lako i paturuana, mpane nakeni rodua towawinena ai rodua batua nu towawinena anu rakiraka mbui nasamboko, ai sampulu isa dua anana anu tomoane nawetaka sira i ue Yabok. 23 Awetu limbamo towawinena ai anana sira i sambuteka, mesola ia mpane nadoa mbui sinangka anu-anuna, nawetaka mbui lau i sambuteka. 24 Awetu opemo napopoweta, saduduanadamo ni se etu. Mewali tongona ni se etu, dongka mai sadua tomoane, mewali mombelule sira, duduuna eo ina mensibemo. 25 Awetu naepe nu tomoane etu, kabariana ina menangi i rara pombelulera etu, nirugiina kumbia ni Yako, duduuna kumbia ni Yako salaoi. 26 Mpane mololita tau etu, nauli, “Nupawia aku, lawi eo ina mensibemo.” Mesono i Yako, nauli, “Baria iko ina kupawia, pensani iko kupawia ane nuwati nsalaa aku.”
27 Napekune nu tau etu, nauli, “Ima sangamu?”
Mesono ia, nauli, “Sangaku i Yako.”
28 Nauli nu tau etu, “Sangamu bariamo i Yako, rabalikimo sangamu i Saraeli. Lawi roomo iko mombelule ai i Pue Ala ai manusia, ai menangi iko.”
29 Mololita i Yako, nauli, “Nuulika aku sangamu.”
Agaiana tau etu mesono, nauli, “Baria ria bunduna nupekune kaimana sangaku!” Mpane Nawatimo i Yako.
30 Roo awetu, mololita i Yako, nauli, “Mombeliomo aku ai Pue Ala, ai tuwu mani aku.” Etumo mpane nasanga pearia etu Peniel. 31 Awetu eo mensibemo, napalengimo ni Yako pearia etu, polumakona mokakuda, lawi kumbiana salaoi. 32 Etumo mpane duduuna ei-ei, toSaraeli baria sira mangkoni isi nu binata anu mbai kumbiana, lawi napakasalaoimo ni PUE kumbia ni Yako.