Pewalina 31

I Yako mensila lako si Laban

1 Naepe ni Yako pololita nu erana sira, raulira, “Nadoamo ni Yako ope-ope anu-anu nu tuamata, ope-ope kapebukuna puuna lako i tuamata.” 2 Ai naita mbui ni Yako i Laban bariamo gaga sadiwana pangundena ia ewa ni banimpia. 3 Mewali mololita i PUE si Yako, Nauli, “Pesolamode i tana nu tuamamu ai i pokamu sira. Aku saduduaKu anu ina mamporangai iko.”

4 Roo awetu, natudu ni Yako tau bona mangulika i Raheli ai i Lea, bona mampomberumpaka ia i pada porewua nu dimba ai towauna. 5 Awetu sira dongka, mololita i Yako si sira, nauli, “Kuita tuamami bariamo gaga sadiwana pangundena aku ewa saweweina, agaiana i Pue Ala anu napenombai nu tuamaku anu mamporangai aku. 6 Komi roduami mbui niinsani, adiwa karuminsina pobagoku i tuamami. 7 Agaiana nauda ewa etu pebagiu nu tuamami si aku, dongka sampulu mbela nabaliki pesaro anu nadandika aku. Agaiana baria ia napogeaka ni Pue Ala mobabei daa si aku. 8 Mewali tempona tuamami mololita, nauli, ‘Towau anu mabetuke ina mewali saromu’, mewali nakenimpodandina ope-ope pinatuwuna mampemuleka sira anara anu mabetuke wulura. Tempona mbui mololita, nauli, ‘Towau anu maloba ina mewali saromu’, mewali ni tempo etu mbui ope-ope pinatuwu aretu mampemuleka sira anara anu maloba wulura. 9 Ewa etumo ka Napopewalina ni Pue Ala mandoa binata nu tuamami, rakiraka aku. 10 Ai awetu dongkamo tempona towau ai dimba motomoane, mangipi aku kuita ope-ope towau tuamana anu tongora motowawine, wulura mabetuke ai maloba. 11 Ai malaeka ni Pue Ala mololita si aku i rara nu pangipiku etu, Nauli, ‘Yako!’ Mesono aku, kuuli, ‘Io Pue.’ 12 Mpane nauli mbui nu malaeka etu, ‘Peita, ope-ope towau tuamana anu tongora motowawine ridou, wulura mabetuke ai maloba. Kuoaka mobabei ewa dou, lawi Kuita ope-ope anu nababei ni Laban si iko. 13 Akumo i Pue Ala anu mampatongawa wotoKu tempomu ni Betel. Ni si dou nupopenombamo saogu watu anu mewali sambua pepopainga, mpane nubumbusi lana saitun i wongkona. Ai ni si dou mbui iko modandi si Aku. Ei-ei pangkadipurakamode ai pesolamode i tana kabubua nu raamu.’”

14 Mewali mesono i Lea ai i Raheli, raulira, “Bariamo ria anu-anu nu tuamaki anu nagakika kami, anu ina mewali kipososora. 15 Kami ei naimbamo kami tau anu mesua. Napoposamboko kami ai iko, mpane balukiki anu nadokomo nu tuamaki, napaope asamo. 16 Agaiana ope-ope kapebuku anu nadoamo ni Pue Ala lako i tuamaki, kamonsona kami tumpuna ai anaki sira. Mewali peulaimode apa anu nasawaaka iko ni Pue Ala.”

17-18 Mewali mangkadipuraka mpuumo i Yako ina mesolamo ia i tuamana i tana Kanaan. Napopempone towawinena sira ai anana sira i tumu nu onta, mpane nairi sira ope-ope towau ai dimbana, ai ope-ope anu-anuna, anu nisumbana ni Mesopotamia. 19 Ni tempo etu, i Laban tongona i pada mogundiki wulu nu dimbana sira, ai ni tempo etumo i Raheli mopanangka parewa nu tuamana, anu rapopewalira anitu mokampai sira santina. 20 Pangokara ni tempo etu, i Yako moakalangi i Laban, baria napopainsanika pangokana. 21 Nadoa sinangka anu-anuna, mpane lambu ia maliga moweta ue Efrat, mpane lau ia i tana anu mobulu-bulu i Gilead.

I Laban mowulai i Yako

22 Awetu katolu eona, rabambarika i Laban, i Yako melangkamo. 23 Mewali nagulu ni Laban tauna sira, mowulai i Yako, pitu eo kasaena rapolumakoi, mpane lako dongkada sira i tana anu mobulu-bulu i Gilead. 24 Awetu kawengi i Pue Ala mampatongawa si Laban i rara nu pangipina, mpane mongkora, Nauli, “Inee iko mangiangi mopakaeka i Yako, nauda wule santepo ngkida pololitamu.” 25 Ni tempo etu, i Yako mobabeimo ia bambarura i sambua bulu. Ai awetu dongka mbui i Laban ai tauna sira, mobabei mbui sira bambarura i sambua bulu anu ntanina i Gilead. Awetu i Laban ai i Yako momberumpa, 26 mololitamo i Laban si Yako, nauli, “Mangkiada mpane nupodongkoka aku, mpane nupelangkaka sira anaku, ewa tau anu ratawani i rara mpombeala? 27 Mangkiada mpane baria aku nuulika pangokamu, bona kupopangoka iko ai kalompe nu raraku, ai rapoduluaka iko, rapotawuika iko rebana, ai rakawika iko kecapi? 28 Mogalo nukiraka aku tempo, bona moiki aku tumpuku ai anaku sira, bariamo. Madoio mpuu iko! 29 Maroso mani aku mobabei babeia anu madaa si iko. Agaiana ni ngkunuwia i Pue Ala anu napenombai nu tuamamu, mongkora si aku, Nauli, ‘Inee iko mopakaeka i Yako, nauda ai santepo ngkida pololitamu.’ 30 Kuinsani mboto pangokamu, lawi maruminsi ka nuundena mesola. Agaiana mangkiada mpane nupanangkada parewa anu mokampai kami santina?”

31 Mewali nasonoi ni Yako i Laban, nauli, “Mangoka ngkandii-ndii aku, lawi maeka aku nusombo luwu sira anamu. 32 Kono i parewa etu, ane nasumba ni omu i sadua tau i se ei anu mopanangka, sangangaa rasuku ia duduuna mamate. Kadelomode, baria mpuu anu-anumu i se ei. Ane ria, doa ngkimode. Ai pensani rasabiki nu tauta sira.” Baria nainsani ni Yako ka i Rahelina anu mopanangka watutau etu. 33 Mewali mesua mpuumo i Laban i bambaru ni Yako lau nakadelo, roo awetu lau ia i bambaru ni Lea, ai i bambaru nu rodua batuara towawine etu, agaiana parewa etu baria ria nasumba. Kasopoana mesua ia i bambaru ni Raheli. 34 Tongona mesua i rara nu bambaru etu, nawuni ni Raheli watutau etu, i kosika lampi nu onta anu ria i rara bambaruna, mpane napomesoi. Basamo nakadelo ni Laban i bambaru ni Raheli, agaiana baria ria nasumba watutau etu. 35 Mololita i Raheli i tuamana, nauli, “Ineemo iko marumpu uma, baria aku pensani meongko modupa i uma, lawi tongona dongka wulaku.” Nakadelo lompe ni Laban, agaiana baria nasumba watutau etu.

36 Mewali masodomo i Yako, nauli, “Omu, babeia apa anu madaa anu nibabeikumo? Apa salaku, mpane nuwuwulai aku? 37 Ei-ei awetu roomo nukadelo i sinangka anu-anuku sira, babila nisumbamo ni omu parewa ni omu? Popensuwumode parewa etu ai boli i se ei, bona tauku ai taumu pensani raitara, mpane mobotusi si kita rodua ima anu makono. 38 Rompulu mpaemo aku meari si omu. Towau ai dimba ni omu maisimo pemuleara, baria mogalo sambaa towau tuamana kukoni, lako i pinatuwu ni omu. 39 Anu mamate nasoko nu binata anu mangkoni rangana, baria sambela kukeni si omu, agaiana aku saduduaku anu mopasuru. Anu rapanangka i tempona mabaa, awetu mbui i tempona kawengi, napeula liliu ni omu bona aku anu mopasuru. 40 Mawori mbela mapana kuepe i tempona mabaa, ai malengi i tempona kawengi. Ai mawori mbela baria aku maleta. 41 Awetumo pewalina si aku i tempoku mobago si omu i rarana rompulu mpaena. Sampulu iba mpae kasaena mobago aku bona mansumba rodua ana ni omu, ai aono mpae mani bona mansumba towau ai dimba. Ai i rarana rompulu mpae etu mbui, i omu mobaliki saroku dongka sampulu mbela. 42 Ane kebaria aku nakampai ni Pue Ala anu napenombai nu tutuaku, iamo i Burahima ai i Isaki, manotomo ka nutuduku lambu ai baria aku nukiraka mogalo apa. Agaiana naitamo ni Pue Ala kapariku i rara nu pobagoku, etumo mpane ni ngkunuwia Nakambaroka iko i rara nu pangipimu.”

Podandi ni Yako ai i Laban

43 Nasonoi ni Laban i Yako, nauli, “Rodua towawine ridou, anaku, ai anara kupotumpu mpane dimba aretu anuku mbui. Kamonsona, sinangka-nangkana anu nuita i se ei, akumo tumpuna. Agaiana baria aku pensani mobabei ba apa-apa bona anaku ai tumpuku si aku. 44 Mewali mobabeimo kita podandi. Moparampi kita watu mewali sambua katongawaana podandita.”

45 Roo awetu, nadoa ni Yako saogu watu, mpane napatogo mewali watu pepopainga. 46 Mpane natudu tauna sira mogulu watu, mpane raparampira. Roo awetu, mangkoni simbela-mbela sira gompi i watu anu raparampira etu. 47 Nasanga ni Laban watu anu raparampi etu Yegar-Sahaduta, agaiana i Yako mosanga Galed. 48 Nauli ni Laban si Yako, “Watu anu teparampi ei mewali pepopainga si kita rodua.” Etumo mpane pearia etu rasanga Galed. 49 Nauli mbui ni Laban, “Taperade bona i PUE anu mampeita liliu kita, tempota mani tuwu mombekaraosi.” Etumo mpane pearia etu rasanga mbui Mispa. 50 Mololita mbuimo i Laban, nauli, “Ane mobabei iko babeia anu madaa i anaku sira, ba mosamboko iko towawine anu ntanina, nauda baria ria anu manginsani lawi mombekaraosi kita, mainga-inga iko, lawi i Pue Ala anu mampeita liliu kita. 51 Mewali eimo watu anu raparampi ai watu anu rapatogo. 52 Watu anu raparampi ai watu anu rapatogo ei, mewali pepopainga si kita, bona ane ria tunggaia nu raraku si iko anu madaa, baria aku pensani liu i watu arei, awetu mbui iko, ane ria tunggaiamu anu madaa, baria iko pensani liu i watu arei. 53 I Pue Ala anu natoia ni Burahima ai anu natoia nu tuamaku i Nahor. Ina mewali topobotusi kara-kara si kita rodua.” Mpane modandi i Yako i rara nu sanga ni Pue Ala anu napenombai ni Isaki tuamana, bona mopabukei dandina. 54 Nasambale sambaa binata, mpane napopenomba i wongko mungku nu tana etu, mpane naronde sira tauna, bona mangkoni simbela-mbela. Awetu roomo sira mangkoni, mosambengi sira i tumu mungku nu tana etu. 55 Ewa ineilena madondo i Laban moiki anana ai tumpuna sira, peiki etu peiki mpogaa, ai nawati sira, mpane mesolamo ia i peariana.