30
1 Ni tempo etu i Raheli baria mani moana. Etumo mpane masina rarana si Lea powutuna, mewali mololita ia si Yako, nauli, “Nupopemule kowo aku, ane baria ina mamate aku.” 2 Mangepe pololita ni Raheli ewa etu, marumpu i Yako si ia, nauli, “Aku ei baria i Pue Ala, mpane baria iko moana! I Pue Ala anu baria mampopoana iko.”3 Ni se etu, mesono i Raheli, nauli, “Ei batuaku i Bilha, peroumode ia, bona moana ia. Lawi ane moana ia, anana etu kupoana.” 4 Mewali nakirakamo i Bilha si Yako, mpane sawoto-wotomo sira. 5 Mewali mampaiwotomo i Bilha, mpane moana ia sadua anakoi tomoane. 6 Nauli ni Raheli, “Napatongawamo ni Pue Ala kabariaku masala, Napetingaimo pekakaeku, mpane Nakirakamo aku sadua anakoi tomoane.” Mewali nasangamo anakoi etu, “Dan”. 7 Mampaiwoto mbuimo i Bilha, mpane ia moana sadua anakoi tomoane. 8 Mewali nauli ni Raheli, “Nauda mapari kuepe moewa powutuku, agaiana kunangi ia.” Etumo mpane nasanga anakoi etu i Naftali. 9 Awetu nainsani ni Lea kabarianamo pensani moana, mewali nakiraka i Yako i Silpa nasamboko. 10 Posamboko ni Yako ai Silpa, mampemuleka sira sadua anakoi tomoane. 11 Mewali nauli ni Lea, “Morasi aku.” Mpane nasanga anakoi etu i Gad. 12 Moana mbuimo i Silpa sadua anakoi tomoane. 13 Nauli ni Lea, “Masana mpuu kuepe! Ei-ei ope-ope towawine ina manguli aku tau anu masana kuepe.” Etumo mpane nasanga anakoi etu i Aser. 14 Tempo nu tau mampepae gandu, i Rube lau ia i pada, mpane mansumba ia sampangka pinambula anu pensani rapopakuli nu towawine, bona pensani sira mampaiwoto. Mewali nakeni pinambula etu si Lea tinana. Awetu naita ni Raheli, naperade ni Raheli si Lea, nauli, “Nukiraka aku saudi pinambula anu nisumba nu anamu etu.”
15 Mesono i Lea, nauli, “Baria manipae nuposondoka, nudoamo tomoaneku? Ei-ei nupetandaka mbuimo mandoa pinambula anu nisumba nu anaku.”
Nauli ni Raheli, “Ane nuunde, pensani iko merou ai i Yako i kawengi ei, agaiana nukiraka nsalaa aku saudi pinambula anu nisumba nu anamu etu.” 16 Pamperade ni Raheli etu, naunde ni Lea, mewali awetu sindulaumo eo, i Yako mesolamo lako i pada mai, nidupa ia ni Lea mpane mololita ia, nauli, “Kawengi ei, aku anu nuperou, lawi roomo nibaiariku si Raheli ai pinambula anu pensani rapopakuli anu nisumba nu anaku.” Mewali merou mpuumo sira kawengi etu. 17 Nasonoi ni Pue Ala pekakae ni Lea, etumo mpane mampaiwoto ia, mpane moana ia sadua anakoi tomoane, anana anu kalima. 18 Nauli ni Lea, “Nakirakamo aku ni Pue Ala saroku, lawi kukiraka i Silpa nasamboko nu tomoaneku.” Etumo mpane nasanga anakoi etu i Isakar. 19 Mampaiwoto mbuimo i Lea, mpane moana ia anana anu kaaono. 20 Mololita ia, nauli, “Nakiraka ntoo aku ni Pue Ala. Ei-ei tomoaneku ina moadai aku, lawi moanamo aku aono dua tomoane.” Etumo mpane nasanga anakoi etu i Sebulo. 21 Roo awetu moana i Lea sadua anakoi towawine mpane nasanga i Dina.
22 Lako ni se etu, nakaendomo ni Pue Ala i Raheli, mpane Napetingaimo pekakaena, ai Napopemulemo i Raheli. 23 Mewali mampaiwoto mpuumo i Raheli, mpane moana ia sadua anakoi tomoane. Nauli ni Raheli, “Napakatontomo ni Pue Ala eaku. 24 Etumo mpane nasanga anakoi etu, i Yusupu. Mpane mekakae nauli, kuperade mani si PUE, bona moana mani aku luwu sadua anakoi tomoane.”
Pombetawari ni Yako ai i Laban
25 Awetu roomo i Raheli mampemuleka i Yusupu, mololita i Yako si Laban, nauli, “Metompa aku bona nupaliu aku mesola i tanaku. 26 Ai nupogeaka aku mangkeni rodua towawineku, ai anaku sira. Sira etu ria nakenimpobagoku si omu, nuinsani mboto, karuminsina pobagoku.”
27 Nauli ni Laban, “Kuperade bona meari liliu komi i se ei, mampobagoka aku. Kuinsani nakeningka ikona mpane aku nawati ni PUE. 28 Uli ngkimode sangkia saromu anu nuperade.”
29 Mesono i Yako, nauli, “Iko saduduamu nuinsani mboto karuminsina pobagoku, pinatuwumu sira kalalaua maisi nakeningka kukadipurakana. 30 Lako baria mani aku mai, anu-anumu baria gaga sadiwana, agaiana ei-ei pebukumo iko. Nawatimo iko ni PUE nakeningka akuna. Ei-ei temponamo aku mampobagoka towawineku ai anaku sira.”
31 Nauli ni Laban, “Mewali apa kamonsona anu ina kukiraka iko?”
Mesono i Yako, nauli, “Ineemo iko mokiraka ba apa-apa si aku, pinatuwumu sira batena ngkida kukadipuraka, agaiana ane sintoto i rara ni omu pamperadeku ei: 32 Nupaliu aku i eo ei, molumako i tongo-tongo nu pinatuwumu sira, ewa towau ai dimba, mpane kupatani sinangka dimba anu maeta, ai sinangka ana nu towau anu maloba ai anu mabetuke wulura, mewali etu ngkida saro anu kuperade si iko. 33 Bona sambela tempo, awetu i omu lau mokumisi saroku anu lako si omu, mpane naita ni omu ria towau anu baria maloba ba baria mabetuke wulura, awetu mbui dimba anu baria maeta wuluna, nainsani ni omu pinatuwu aretu pinatuwu anu kupanangka.”
34 Nasonoi ni Laban, nauli, “Kupokono! Tapeulai apa pamperademu etu!” 35 Agaiana ni eo etu, i Laban mopatani ope-ope towau tuamana anu wulura mabetuke ai maloba, ai ope-ope towau tinana, anu maloba ai anu mabetuke, ba anu wulura ria anu bulana i wotora, mpane napatani mbui ana dimba anu maeta wulura, mpane natudu sira anana mamporewu binata aretu. 36 Lako ni se etu, malambumo i Laban ai anana sira lau mangkeni binata ni Yako anu rapataniramo, kakaraona lako i se etu tolu eo kasaena rapolumakoi. Labina aretu, iamo towau ai dimba ni Laban nakadipuraka ni Yako. 37 Roo awetu, nadoa ni Yako tolu mpangka daa nu kau anu motawe mpane nalonsiki santongo kolimbana, mewali daa nu kau aretu mewali maloba raita. 38 Naboli daa nu kau aretu i lio nu towau aretu i panginuara, lawi binata aretu raundera moranga i tempora ina manginu. 39 Mewali ane towau aretu motomoane mampombelioka sira daa nu kau, ane moana sira anara mewali maloba ba mabetuke. 40 Mpane nadoa ni Yako dimba aretu, napopelio i towau anu mabetuke ai anu maeta wulura. Lawi awetu ka nababeina, nasumba binatana saduduana, mpane naoloki lako i binata ni Laban. 41 Awetu binata anu maroso tongora motomoane, naboli ni Yako daa nu kau anu nilonsina santongo aretu i liora i rara nu panginuara. 42 Agaiana daa nu kau etu, baria naboli i lio nu binata anu baria maroso, sinangka binata anu mabula aretu baria sira maroso, ai sira etumo pinatuwu ni Laban, agaiana sinangka binata anu maeta, maloba, ai mabetuke, maroso sira, ai sira etumo pinatuwu ni Yako. 43 Etumo mpane i Yako mewali tau anu pebuku mpii, maisi towau ai dimbana, ontana, awetu mbui kalidena, ai maisi mbui batuana.