I Yako dongka i tombi ni Laban
29
1 Napapulo ni Yako polumakoana, lau ia i tana anu mbai mataeo tana Kanaan. 2 Tongona molumako, ungangkidamo naita saogu tibubu i pada etu, ai i wiwi nu tibubu etu naita tolu ntobu towau ai dimba, anu paka rapanginui i se etu. Tibubu etu tetuko ai watu anu mabose. 3 Ane opemo towau ai dimba tegulu i tibubu etu, radulimo nu toporewu sira watu petuko nu tibubu etu, mpane rapanginuiramo towau ai dimbara. Roo awetu, ratukora mpesola mbuimo tibubu etu. 4 Mekune i Yako i toporewu sira anu ria i se etu, nauli, “Poka-poka, komi ei lako imba?”Mesono sira, “Kami ei lako i Haran.”
5 Napekune mbui ni Yako, nauli, “Babila niinsani mbotoda i Laban tumpu ni Nahor?”
Mesono sira, raulira, “Io, kiinsani mboto.”
6 Mewali nauli ni Yako, “Malompe-lompe mbotopae ia?”
Mesono sira, raulira, “Malompe-lompe mboto ia. Totoki! Dumai mboto woe anana towawine, sangana i Raheli. Mai mangkeni towau ai dimba nu tuamana.”
7 Nauli ni Yako, “Eo togo mani, baria mani tempona towau ai dimba rapasua i gimpura. Mangkiada mpane baria sira nipanginui ai nipakoni mpesola?”
8 Mesono sira, raulira, “Ane opemo sira dongka i se ei, lako pensanida sira kipanginui, ai ane petuko nu tibubu dou tedulimo.” 9 Tongo ni Yako mololita ai toporewu aretu, teduumo i Raheli mangkeni towau ai dimba nu tuamana, anu tongona sira naporewu. 10 Awetu naita ni Yako i Raheli ai towau ai dimbana aretu, mengkagompimo i Yako i tibubu etu, ai awetu ia dongka i se etu, nabungkasimo ni Yako watu petuko nu tibubu etu, mpane napopanginu towau ai dimba anu nakeni mai ni Raheli aretu. 11 Roo awetu, nakeningkamaruminsina katono nu rarana, lau nagompilisi i Raheli mpane naiki, ai tongona naiki motumangi ia. 12 Mololita ia si Raheli, nauli, “Aku ana ni Ribka, toi nu tuamamu.” Mewali awetu naepe ni Raheli pololitana etu, kasaliu melangka i Raheli mesola lau i tombina, lau napadongkaka tuamana. 13 Awetu naepe ni Laban bambari kono si Yako, pinoanana etu, kasaliu melangka mbui ia lau mampomberumpaka i Yako. Awetu ia dongka si Yako, nakalupui i Yako mpane naiki, roo awetu, nakeni lau mesua i rara nu tombina. Awetu sira i rara nu tombi, napololitamo ni Yako si Laban, sinangka anu mewalimo si ia. 14 Nauli ni Laban, “Kalawiana kita ei sararaa.” Mewali mearimo i Yako si Laban sambula kasaena.
I Yako mobago si Laban bona mosamboko ia i Raheli
15 Sambela tempo, mololitamo i Laban si Yako, nauli, “Naudapae iko pinoanaku, baria malompe ane mobago ntoo-ntoo ngkida iko si aku. Ane kusaro iko, sangkia peundeamu saro anu kukiraka iko?” 16 I Laban rodua anana towawine, anu torapowutu sangana i Lea, mpane toina sangana i Raheli. 17 I Lea merae matana, agaiana i Raheli merae wotona mpane merae liona. 18 Etumo mpane napokailu ni Yako i Raheli. Mewali nasonoi pekune ni Laban, nauli,
“Madota aku mobago i rarana pitu mpae, agaiana nukiraka aku mosamboko i Raheli.”
19 Nauli ni Laban, “Aginamo iko kukiraka mamposamboko mpanena tomoane ntanina, mewali pearimode i se ei.” 20 Mewali mobago mpuumo i Yako i rarana pitu mpae, bona mamposamboko i Raheli, ai naudapae pitu mpae kasaena, tempo etu baria masae naepe, nakeningkamaruminsina pampokailuna i Raheli. 21 Awetu sopomo kapitu mpaena, mololitamo i Yako si Laban, nauli, “Liumo pitu mpae, ane pensani kupotombikamo ana ni omu.” 22 Mewali lako ni se etu, nababeimo ni Laban sambua susa pebua, mpane moronde ope-ope tau anu ria i kota etu, bona lau sira mamposusai karabuana anana. 23 Agaiana ni kawengina etu, anu nakeni lau ni Laban mamperou i Yako, baria i Raheli agaiana i Leada, ai ni kawengi etu, sawoto-wotomo sira. 24 Mpane nakiraka ni Laban sadua towawine bona napobatua ni Lea sangana i Silpa. 25 Mewali ewa ineilenadamo, lako nainsanida ni Yako anu nisambokona baria i Raheli agaiana i Leada, etumo mpane lau ia si Laban mpane, nauli, “Mangkiada mpane ewa eida ka nubabeina si aku omu? Bariapae i rarana pitu mpae mobagomo aku, bona mosamboko aku i Raheli? Mangkiada mpane nupodongkokada aku?”
26 Mesono i Laban, nauli, “Mangula ada mposamboko i se ei, torapotoi baria pensani mampeilodongi torapowutu. 27 Pegiamode sala tapaliu pitu eo pebua ei, mpane lako kukiraka mbuida iko i Raheli nuposamboko, asala madota mani iko mobago si aku i rarana pitu mpae mani.” 28 Napomakono ni Yako pamperade ni Laban si ia, mewali awetu liumo pitu eona pebua etu, nakiramo mbui ni Laban i Raheli nasamboko ni Yako. 29 Mpane nakiraka mbui ni Laban sadua towawine anu rasanga i Bilha napobatua ni Raheli. 30 I Yako sawoto-woto mbui ai i Raheli, mpane napokakaia mani i Raheli mpane i Lea, ai roo awetu, mobago mani ia pitu mpae kasaena.
Ana ni Yako
31 Naita ni PUE, i Yako baria gaga mampokakaia i Lea ewa pampokakaiana i Raheli, mewali anu napopemule ni PUE i Lea ngkida, i Raheli baria. 32 Mewali mampaiwotomo i Lea, ai awetu dongkamo tempona moana, moana ia sadua tomoane. Mewali nauli ni Lea, “Napeitamo ni PUE kapariku, ai ei-ei tomoaneku ina mampokakaia aku.” Etumo mpane anana etu nasanga i Rube. 33 Basangkia kasaena mampaiwoto mbuimo i Lea, mpane moana ia sadua tomoane. Mewali nauli ni Lea, “Nakiraka mbuimo aku ni PUE moana karoduana, lawi Nainsani baria aku napokakaia nu tomoaneku.” Etumo mpane nasanga anana etu i Simeo. 34 Basangkia mbui kasaena, mampaiwoto mbuimo i Lea mpane moana ia sadua tomoane. Mewali nauli, “Ei-ei tomoaneku ina napokakaia mpiimo aku, lawi tolu duamo anaku tomoane.” Etumo mpane nasanga anana etu i Lewi. 35 Mampaiwoto mbuimo i Lea, mpane moana ia sadua anakoi tomoane. Mewali nauli, “Ei-ei sangangaa motoia aku i PUE.” Etumo mpane nasanga anakoi etu i Yehuda. Roo awetu, i Lea bariamo moana.