28
1 Roo awetu, naronde ni Isaki i Yako mpane nawati, naulika, “Inee iko mosamboko ai towawine anu lako i tana Kanaan. 2 Laumode i Mesopotamia i poka ni Betuel, tutuamu, posambokomode ai sadua ana nu omumu i Laban, poka nu tinamu. 3 Kuperade si Pue Ala anu makuasa, bona mowati posambokomu, mpane Napakawori pemuleamu. Mewali, ina mewali iko ulububu nu tau wori basangkia ntina! 4 Kuperade mbui si PUE bona nawati iko ai pemuleamu, adiwa ka Nawatinamo i Burahima, ai kuperade mbui ina motumpui iko tana anu nupearii ei, anu nakirakamo ni Pue Ala si Burahima.” 5 Mewali napopangoka mpuumo i Yako lau i Mesopotamia, lau si Laban ana ni Betuel toAram etu. I Laban iamo powutu ni Ribka, i Ribka tina ni Yako ai i Esau.I Esau motombi mpesola
6 Lako ni se etu, naepe ni Esau powati ni Isaki i Yako, mpane napopeongko lau i Mesopotamia mangkadelo sambokona si dou. Mpane napopaingaaka, bona inee ia mamposamboko towawine toKanaan. 7 Nainsani ni Esau, napeulai ni Yako sawaa nu tinana ai tuamana, ai laumo ia i Mesopotamia. 8 Mewali nainsanimo ni Esau, kamonsona i Isaki tuamana baria ia mangunde towawine toKanaan, 9 etumo mpane laumo i Esau si Ismael ana ni Burahima, mpane mosamboko ia ai ana ni Ismael anu rasanga i Mahalat, toi ni Nebayot.
Pangipi ni Yako i Betel
10 Mewali mangokamo i Yako lako i Berseba, lau ia i Haran. 11 Awetu malimpamo eo, dongka ia i sambua pearia, mewali mosambengi ia i se etu. Awetu ia maturu ina maleta, mampolonga ia saogu watu. 12 Mewali ni kawengi etu mangipi ia, naita sambua oda anu meongko i dunia ei, wuntu nu oda etu teduu i langi, mewali naita sira malaeka ni Pue Ala mendolu mpane mempone i oda etu. 13 Mpane i tumbirina naita i PUE meongko, mololita, Nauli, “Akumo i PUE anu napenombai ai natoia ni Burahima ai i Isaki, ina Kukiraka iko ai pemuleamu tana anu nupaturui ei. 14 Pemuleamu ina maisi adiwa kaisi nu awu i tana, ai ina mopakaemba sira peariara kaimba-imbaana, ai nakeningka ikona ai pemuleamu sira, ope-ope tina i dunia ina Kuwati. 15 Inee malinga raramu, baria iko ina Kukalambasi imba ngkida iko lau, ina Kukeni mpesola ngkida iko mesola i tana ei. Baria iko ina Kupalengi, duduuna Kupabukei sinangka dandiKu si iko.” 16 Roo awetu, momeso i Yako mpane mololita, nauli, “I PUE ria i se ei, i pearia ei, agaiana lako ei-eida ka kuinsanina!” 17 Mewali maeka ia mpane mololita, nauli, “Mepakaeka mpuu pearia ei! Manotomo ei tombi ni Pue Ala, boboka nu suruga.” 18 Ewa ineilena madondo-dondo, momesomo ia, mpane nadoa watu anu nipolongana, napatogo watu etu mewali sambua pepopainga. Nabubu lana saitun i wongko nu watu etu, mewali popenombana si Pue Ala. 19 Pearia etu rasanga Betel. Ni banimpia sanga nu kota etu Lus. 20 Mpane modandi ia si PUE, nauli, “Ane Natulungi ai Nakampai aku ni PUE, i rara mpolumakoku ei, mpane Nakiraka mbui aku pangkoni ai pesampi, 21 duduuna mesola aku i tombi nu tuamaku i rara nu kalompe-lompe, modandi aku, mewali Iko PUE anu kupenombai. 22 Ai ina kukiraka i PUE, sampulu parasee lako i sinangka anu nakirakamo aku ni PUE. Watu pepopainga anu kupatogo ei, ina mewali pearia menomba si PUE.”