I Isaki mowati i Yako
27
1 Sambela tempo, awetu tinuwu ni Isaki matuamo ai matana mawuraumo, moronde ia i Esau anana anu torapowutu, mpane mololita ia, nauli, “Anaku!”Mesono i Esau, nauli, “Io uma.”
2 Nauli, ni Isaki, “Nuinsani mboto aku ei matuamo ai babila bariamo aku masae tuwu. 3 Mewali laumode doa panamu, mpane laumo iko moasu i pada, 4 ai awetu iko morasi, nudaka nupakatomo ewa anu saweweina kuunde kukoni, mpane nukeni mai si aku. Awetu aku roo mangkoni luwu, ina kupalimba pewati anu ria si aku ei si iko, lako baria mani aku mamate.”
5 Pololita ni Isaki ai i Esau ni tempo etu, naepe ni Ribka. Mewali awetu i Esau mangoka lau moasu, 6 mololitamo i Ribka si Yako, nauli, “Lako roo aku mangepe pololita nu tuamamu si Esau nauli ewa ei: 7 Lau iko mai moasu, mpane nukeni mai sambaa binata, mpane nudaka nupakatomo bona kukoni, ai awetu aku roo mangkoni anu nudaka etu, i lio ni PUE ina kupalimba si iko pewati anu ria si aku, lako baria mani aku mamate. 8 Mewali anaku, nupetingai ai nuula apa anu kuulika iko ei. 9 Laumode i pearia nu pinatuwuta, nupelisi mai rombaa ana nu towau anu marudu, bona kudaka adiwa daka bau anu naunde nakoni nu tuamamu saweweina. 10 Mpane ane roomo kudaka, nukenimo si ia bona nakoni, lawi ane roomo ia mangkoni, pewati anu ria si ia, ina napalimba si iko lako baria mani ia mamate.”
11 Agaiana nauli ni Yako i tinana, “Tina, adiwamo luwu, i Esau wotona mowulu aku baria? 12 Lawi ane narera luwu wotoku, mpane nainsani ka kupodongkokana, baria luwu aku nakiraka pewati anu ria si ia, agaiana naganeda luwu aku.”
13 Nasonoi ia nu tinana, nauli, “Inee iko maeka anaku. Aku mboto luwu anu mamposurunga ane nagane. Peulai ngkimode apa anu kuuli, laumode mai doa towau aretu.” 14 Mewali lau mpuumo i Yako mandoa rombaa towau anu marudu, mpane nakenika nu tinana, mpane nadaka ni Ribka, mangula peundea ni Isaki ewa saweweina. 15 Roo i Ribka modaka, nadoa pesampi ni Esau anu merae mpii anu naboli ni Esau i tombi, mpane pesampi etu nabaduika i Yako. 16 Pale ai tambolo ni Yako anu baria mowulu etu, nawewesi nu tinana ai kolimba nu ana nu towau. 17 Roo awetu, nakiraka i Yako daka bau anu matomo etu, ai roti anu roomo nibabeina.
18 Mpane laumo i Yako i tuamana mpane ia mololita, nauli, “Uma!”
Mesono tuamana, “Io, ima iko! I Esau, ba i Yako?”
19 Mesono i Yako, nauli, “Aku i Esau, ana ni uma anu torapowutu, anu naposawaaka aku ni uma roomo kubabei. Pomesomode ai pangkonimode daka bau anu kukeni mai ei, anu kuporasi moasu, bona pensani i uma mopalimba pewati etu si aku.”
20 Nauli ni Isaki, “Maliga mpuu ka nusumbana, anaku!”
Mesono i Yako, nauli, “I PUE anu napenombai ni uma anu motulungi aku.”
21 Nauli ni Isaki, “Kagompi mai bona pensani iko kurera, ba i Esau mpuu iko ba baria.” 22 I Yako lau mengkagompi i tuamana bona narera nu tuamana, mpane nauli, “Wambamu ewa wamba ni Yako, agaiana palemu ewa pale ni Esau.” 23 Baria nainsani ni Isaki ka i Yakona, lawi palena mowulu ewa pale ni Esau. Agaiana awetu i Isaki ina mopalimbamo pewatina si Yako, 24 mekune mani ia sambela, nauli, “Mamonsopae iko ei i Esau?”
Mesono i Yako, nauli, “Io aku ei i Esau.”
25 Mewali nauli ni Isaki, “Kiraka aku mai daka bau etu, awetu aku roo mangkoni daka bau etu, mpane lako kupalimbada pewati anu ria si aku si iko.” Nakiraka ni Yako tuamana daka bau etu, ai saudi anggoro nainu. 26 Mpane nauli nu tuamana, “Kagompi mpii mai anaku, mpane nuiki aku.” 27 Awetu i Yako mengkagompi mpiimo i tuamana mpane naiki, naenga ni Isaki engaa ni Esau i badu ni Esau anu napake ni Yako, mewali nawati mpuumo i Yako, nauli,
“Engaa nu anaku anu malompe kuenga,
ewa engaa nu pada anu nawatimo ni PUE.
28 Kuperade si Pue Ala bona Napopendoluka iko uda lako i langi,
bona Nababei sinangka tana anu i bondemu marudu!
Ai kuperade si Pue Ala bona Nawati tuda-tudamu,
ewa gandu ai anggoro ina maisi powuara!
29 Kuperade si Pue Ala,
bona mawori ntina tau ina mewali batuamu,
ikomo anu sangangaa makuasa i pokamu sira,
ai kuperade si Pue Ala bona ope-ope pemulea nu pokamu sira mengkoru si iko,
ai kuperade mbui si Pue Ala, bona ima anu mampopantodisa iko, ia mbui ina Napopantodisa ni Pue Ala,
ai ima anu mowati iko, ina Nawati mbui ni Pue Ala.”
I Esau merade pewati si Isaki
30 I karoona ngkida i Isaki mowati i Yako, i Yako kasaliu lambu, ai awetu i Yako lambu, powutuna i Esau dongkamo mai lako moasu. 31 Mewali nadaka mbui daka bau napakatomo, mpane nakenika nu tuamana, mpane nauli, “Pomesomode uma ai konimode daka bau anu kukenika mai i uma, bona pensani i uma mopalimba pewati si aku, anu ria si uma.”
32 Agaiana napekune nu tuamana, nauli, “Ima iko?” Mesono i Esau, nauli, “Aku i Esau ana ni uma anu torapowutu.”
33 Mewali morada-rada woto nu tuamana mpane napekune, nauli, “Ane awetu, imada anu lau moasu mpane nakenika aku mai daka bau ni mpongone? Daka bau etu roomo nikoniku lako baria mani iko dongka. Mpane nikirakakumo ia pewati anu ria si aku anu kaopeanamo, ai ei-ei pewati anu nikirakumo etu, iamo anu motumpui duduuna kasae-saeana.”
34 Awetu naepe ni Esau pololita nu tuamana etu, maruminsi kawiorana, mpane motumangi ia monggaro-nggaro, nauli, “Uma nupalimbaka mbui aku pewati anu ria si uma!”
35 Nauli nu tuamana, “Toimu maimo, mampodongkoka aku. Nidoanamo pewati, molentano kamonsona pewati etu ina kupalimba si iko.”
36 Nauli ni Esau, “Ei, karombelanamo aku nabagiu. Sintoto mpuu ai sangana i Yako. Nadoamo katowutuku, mpane ei-ei nadoa mbuimo pewati anu ina rapalimba si aku. Bariamopae ria pewati anu ntanina bona napalimba ni uma si aku?”
37 Mesono tuamana, nauli, “Kupopewalimo ia tuamu, mpane ope-ope pokana sira mewalimo sira batuana. Kupopewalimo gandu ai anggorona. Mewali ei-ei, bariamo ria ba apa anu pensani kupalimba si iko anaku!”
38 I Esau baria ia mengkaroo merade pewati lako i tuamana, nauli, “Wule sampangkadapae pewati anu ria si uma? Nupalimba mbui kowo pewati si aku uma!” Mpane motumangi mbuimo ia.
39 Roo awetu, nauli ni Isaki si Esau,
“Baria ina ria uda anu mendolu lako i langi mai si iko.
Baria ina marudu tana i bondemu.
40 Ina tuwu iko lako i gumamu,
nauda awetu ina mewali iko napobatua nu toimu.
Agaiana ane meewa iko si ia,
ina tepalewa iko lako i ka napobatuamu.”
41 Mewali nakasisi ni Esau i Yako, lawi tuamana mokirakamo i Yako pewati anu ria si ia. Mewali mololita ia saduduana, nauli, “I uma bariamo masae ina mamate, mewali awetu liumo luwu tempo motumangisi wotowata ni uma, i Yako ina kupopate!”
42 Awetu nainsani ni Ribka tunggaia ni Esau anu baria malompe si Yako, natudu tau moronde i Yako, ai awetu dongka i Yako si ia mololita ia si Yako, nauli, “Petingai, powutumu i Esau baria malompe tunggaiana si iko, ina mosurungi ia kadua nu rarana ina napopate iko. 43 Mewali nupeulai apa anu ina kuulika iko ei. Pangokamode maliga, lau i powutuku si Laban i Haran, 44 meari iko si ia, mpane nupegia duduuna powutumu bariamo gaga marumpu si iko, 45 ai ane malingamo rarana i babeia anu nibabeikamumo ia, kutududamo tau mangkeni mpesola iko mai. Baria aku madota i rarana saeoa ngkida komi roduami bariamo ria.”
46 Roo awetu mololita i Ribka si Isaki, nauli, “Baria matono raraku, ai malutamo aku mangita towawine ni Esau aridou, anu lako i tosandarena. Ane i Yako mbui luwu mosamboko ai toHet, aginamo aku mamate ngkimo.”