I Isaki meari i Gerar
26
1 I tana anu napearii ni Isaki etu, mewali mbuimo oro, ewa oro anu mewali ni tempona mani i Burahima natuwu. Etumo mpane, i Isaki lau si Abimele datu nu toPelisiti i Gerar, mpane ia metompa meari i Gerar. 2 Meari ia i se etu, lawi i PUE mampatongawa wotoNa si ia, mpane Nauli, “Inee iko lau i Masiri, pearimode i tana ei ewa anu niulikaKumo iko. 3 Aku saduduaKu anu mokampai iko ai mowati iko, ope-ope tana ei ina Kukiraka iko ai pemuleamu sira, ai ina Kupabukei dandiKu si Burahima tuamamu. 4 Ina Kupopemule-mule iko, ai pemuleamu ina ewa kaisi nu betue i langi, ai ope-ope tana ei, ina Kukiraka sira pemuleamu ratumpuira. Ope-ope tau i dunia ina mekakae si Aku, bona Kuwati sira adiwa ka Kuwatina pemuleamu. 5 Ina Kuwati iko, lawi tuamamu i Burahima mampeulaimo sinangka sawaaKu.”6 Mewali meari mpuumo i Isaki i Gerar. 7 Awetu rapekune nu toGerar kono si Ribka, nasonoi sira ni Isaki, nauli, “I Ribka etu toina, baria towawinena,” lawi maeka ia napopate nu toGerar bona morampaki i Ribka towawinena, lawi melumbu peraena. 8 Sambela tempo, awetu masaemo sira meari i se etu, Datu Abimele metotoki lako i pelogaana mai, mewali naita i Isaki ai i Ribka tongora mombepokakaia. 9 Mewali ni tempo etu, narondemo i Isaki napekune, nauli, “Bariapae towawinemu towawine dou? Mangkiada mpane nuuli towawine dou toimu?”
Mesono i Isaki, nauli, “Kupekiri, ane kuuli ia towawineku, ina rapopate aku nu tau i se ei.”
10 Nauli ni Abimele, “Apada anu nibabeikamu kami? Adiwa ane ria parentaku mamperou towawinemu? Ai ane mewali ewa etu, iko saduduamu anu moparia kamasalaki etu.”
11 Roo awetu, napopaingaaka ni Abimele ope-ope tau anu naparenta, nauli, “Ima ngkida anu mosalempori i Isaki, ba towawinena, ina kusuku mamate.” 12 Ni tempo etu, i Isaki mosawu tinuda, ina natuda i tana etu, ai awetu ia mopupu wua nu tuda-tuda, wuana anu napupu etu, mewali sangatu mbela kaisina lako i tinuda anu natuda etu, lawi powiana etu, nawati ni PUE. 13 Kapebukuna kalalaua tetambai, ai mewalimo ia tau anu pebuku mpii i tana etu. 14 ToPelisiti masina sira si Isaki, lawi maisi batuana, maisi dimbana, awetu mbui japina. 15 Mewali nakeningkasinara si ia, ratabusingira mpesola ope-ope tibubu anu nikae nu batua ni Burahima sira, lako natuwu mani i Burahima.
16 Mewali nauli ni Abimele si Isaki, “Kalambumode lako i tanaki ei. Melumbumo kamakuasamu mpane kami.” 17 Mewali mensuwu mpuumo i Isaki lako ni se etu, lau ia mobabei bambaruna i lembo Gerar, ai ni se etumo ia meari basangkia kasaena. 18 Nakae mpesola ope-ope tibubu anu nikae ni tempona mani tuamana natuwu, anu nitabusingimo nu toPelisiti, awetu i Burahima mamate. Tibubu aretu nasanga napasimbela ai posanga nu tuamana.
19 Tempona batua ni i Isaki mokae tibubu i Gerar etu, tibubu aretu maisi mpii uena. 20 Agaiana toporewu i tana Gerar mobungka ai toporewu ni Isaki. Nauli nu toporewu i tana Gerar etu, “Ue ei, ueki.” Etumo mpane nasanga ni Isaki tibubu etu, Esek.
21 Mokae mbuimo sira tibubu anu ntanina, agaiana tibubu etu, rapobungkaira mbuimo, etumo mpane nasanga ni Isaki tibubu etu, Sitna. 22 Roo awetu melimba ia lako ni se etu, mpane nakae mbuimo tibubu anu katolu oguna. Tibubu anu katolu oguna etu, bariamo rapobungkaira, etumo mpane tibubu etu nasanga ni i Isaki, Rehobot, ai nauli ni Isaki, “Ei-ei i PUE anu mopatumbeikamo kita, meari i tana ei, ai i se eimo katuwuta ina malompe.”
23 Lako ni se etu, mangoka ia lau i Berseba. 24 Awetu ia dongka i Berseba kawengi etu, i PUE mampatongawa wotoNa si ia, mpane i Pue Ala mololita, Nauli, “Akumo i Pue Ala anu napenombai nu tuamamu i Burahima. Inee iko maeka, baria iko ina Kukalambasi, ina Kuwati iko, ai ina Kubabei pemuleamu anu kaworira baria pensani teimba, lawi awetu dandiKu i batuaKu i Burahima.” 25 Mewali nababei ni Isaki potunua popenomba i se etu, mpane ia menomba si PUE. Meari mbuimo ia i se etu, mpane batuana sira mokae mbuimo tibubu.
Podandi ni Isaki ai i Abimele
26 Sambela tempo, dongkamo i Abimele i Berseba lako i tana Gerar, simbela-mbela ai i Ahusat sadua tau anu naongko mewali topepatuduna, ai i Pikol tadulako nu surudadona, tunggaiara bona mampomberumpaka i Isaki. 27 Mewali napekune sira ni Isaki, nauli, “Mangkiada mpane mai komi mampomberumpaka aku ei-ei, molentano ni banimpia nikasisi aku mpane niliwu aku meloso lako i tanami?”
28 Mesono sira, raulira, “Ei-ei kiinsanimo iko sadua tau anu nanini ni PUE, sintoto ai pampekiriki malompe ane mobabei kita podandi. 29 Podandimode, kabariana ina ria babeiamu anu madaa si kami, awetu mbui kami baria kami ina sambela mobabei babeia anu madaa si iko. Babeiaki anu malompe kipopetudokamo si iko, lawi awetu iko mopalengi tanaki, baria iko kipopangkia, ai ei-ei manotomo ka Nawatimu ni PUE.” 30 Roo awetu narora sira ni Isaki, pangkoni ai panginu. 31 Ewa ineilena madondo-dondo, sadua-sadua sira modandi rapakarosora ai mosumpa, mpane mesolamo sira. Awetu sira ina mesola nauli ni Isaki si sira, “Malompe-lompe komi i dala.” Mpane mogaa lompe sira.
32 Ni eo etu mbui, batua ni Isaki lau sira si Isaki rapetumbuira kono i tibubu anu nikaeramo, raulira, “Kisumbamo ue.” 33 Mewali nasanga ni Isaki tibubu etu, “Tibubu posumpaa.” Ewa etumo mpolinguruna mpane kota etu rasanga, Berseba.