Pemulea ni Burahima ai i Ketura
25
1 I Burahima mosamboko mbui ai sadua towawine anu rasanga i Ketura. 2 Towawinena etu, moana ia iamo i Simran, i Yoksan, i Medan, i Midian, i Isbak ai i Sua. 3 I Yoksan mampemuleka i Seba ai i Dedan, mpane pemulea ni Dedan iamo toAsur, toLetus, ai toLeum. 4 Ana ni Midian iamo i Efa, i Efer, i Heno, i Abida, ai i Elda. Ope-ope sira ei pemulea ni Ketura.5 Naudapae ope-ope anu-anu ni Burahima nakiraka i Isaki natumpui, 6 agaiana lako natuwu mani ia, maisi mbui anu-anuna anu nakiraka anana anu lako i towawinena sira anu ntanina, mpane natudu sira anana aretu melimba mbai mataeo nu tana Kanaan, bona karao sira lako si Isaki.
Kamate ni Burahima ai karapaiwuna
7-8 I Burahima matinuwu mpiimo, mamate ia i tempona tinuwuna sangatu pitu mpulu lima mpae. 9 Rapaiwu ia nu anana: i Isaki ai i Ismael i balamba watu anu rasanga Makpela, i bonde anu ria mbai mataeo Mamre, anu ni banimpia bonde etu, anu ni Efron ana ni Sohar toHet. 10 Agaiana nibalukimo ni Burahima lako si Efron, ai i Sara towawinena, rapaiwu i balamba watu etu mbui. 11 Awetu i Burahima mepalengi, i Pue Ala mowati i Isaki. Ni tempo etu, i Isaki meari gompi i tibubu anu rauli, “Lahai-Roi.”
Pemulea ni Ismael
12 I Ismael ana ni Burahima lako si Hagar, towawine anu lako i tana Masiri anu mewali batua ni Sara. 13-16 Ana ni Ismael sampulu rodua, sangara mepuu lako i torapowutu duduuna dongka i anana anu kaopeana iamo: i Nebayot, i Kedar, i Adbeel, i Mibsam, i Misima, i Duma, i Masa, i Hadad, i Tema, i Yetur, i Napis, ai i Kedma. Pemulea ni Ismael anu sampulu rodua areimo anu mewali ulububu nu tau anu sampulu rontina, mpane boea ai pobambaruara rasangara mangula sangara santina-santina. 17 Kamate ni Ismael tinuwuna sangatu tolu mpulu pitu mpae. 18 Pemuleana sira, meari i tana anu ria i olo nu Hawila ai Sur, mbai mataeo tana Masiri, ai baria sira meari simbela ai pemulea ni Burahima anu ntanina.
Karapoanakana i Esau ai i Yako
19 Eimo lolitakana katuwu ni Isaki ana ni Burahima. 20 Tinuwu ni Isaki iba mpulu mpae tempona mosamboko ai Ribka toi ni Laban, ana ni Betuel toAram lako i Mesopotamia. 21 I Posambokora etu, baria sira memule, etumo mpane i Isaki mampekakaeka towawinena bona moana ngkia sira, mewali pekakaena etu nasonoi ni PUE, etumo mpane i Ribka mampaiwotomo. 22 Tempo ni Ribka mampaiwoto, anu napaiwoto etu moropa sira, ai lako napaiwoto mani sira, mombegiu-giumo sira, mewali nauli ni Ribka, “Mangkiada mpane ewa eida pewalina i wotoku?” Mewali mekakae ia si PUE, bona napakanotoka ia ni PUE.
23 Mololita i PUE si ia, Nauli,
“Rodua anakoi anu tongona nupaiwoto etu,
ina mewali sira tau rontina,
ina nupoanaka sira, ai i rara nu katuwura,
baria sira ina mosintuwu,
anu torapotoi melumbu karosona mpane lako i powutuna
mpane anu torapowutu ina mewali batua nu toina.”
24 Dongkamo tempona i Ribka moana, mewali moanamo ia rodua anakoi tomoane moropa. 25 Anu torapowutu kolimbana mawaga-waga ai mowulu, etumo mpane rasanga ia i Esau. 26 Tempora rapoanaka, torapotoi mopatoro todea nu powutuna, etumo mpane anu torapotoi rasanga ia i Yako. Tempo etu, tinuwu ni Isaki tuamara aono mpulu mpae.
I Esau mampobalu katowutuna si Yako
27 Anakoi aretu kalalaua mabosemo sira, i Esau mewali topoasu anu mapande ai naunde meari i pada, agaiana i Yako tau anu mandii-ndii ai naunde meari i tombi. 28 Tuamara mampokakaia i Esau, lawi tuamara naunde mangkoni bau anu naporasi ni Esau moasu, agaiana tinara napokakaia mani i Yako mpane lako i Esau.
29 Sambela tempo, tongo ni Yako modaka tambue anu mawaga, dongkamo mai i Esau lako moasu, maoro ia naepe. 30 Mololita ia si Yako, nauli, “Maruminsi kaoroku kuepe. Kuperade saudi daka tambue mawaaga etu.” Etumo mpane rauli mbui Edom.
31 Nauli ni Yako, “Kukiraka mboto iko, agaiana nupalimba nsalaa katowutumu si aku.” 32 Nauli ni Esau, “Kupopangkia katowutu etu, apapae bunduna si aku, mpanena aku ina mamate malaluara!”
33 Mewali nauli ni Yako, “Ane awetu, mosumpa nsalaa iko si aku, kaina nupalimbana si aku katowutumu.” Mewali ni tempo etu, mosumpa i Esau si ia, kono i katowutuna napalimba i toina si Yako. 34 Roo awetu nakiraka ia ni Yako roti, mpane nagaakika ia ni Yako daka tambue anu mawaaga etu. Roo i Esau mangkoni ai manginu, lambumo ia. Ewa etumo pewalina, mopakoi ia katowutuna, napekiri baria ria bunduna si ia.