I Isaki rapangkadeloka sambokona
24
1 Ni tempo etu, i Burahima matinuwu mpiimo ia, ai nawati ia ni PUE i sinangka nu katuwuna. 2 Sambela tempo, mololita i Burahima i sadua batuana anu tepatorapowutu lako i ope-ope batuana, ai anu napotuu mokadipuraka sinangka anu-anuna. Nauli ni Burahima si ia, “Dampa mai palemu i patua nu timpuku mbai i lio.a 3 Podandimode i rara nu sanga ni PUE, tumpu langi ai dunia, baria ina nukadeloka i Isaki anaku, sadua towawine anu ina nasamboko, lako i olo nu towawine anu ria i tana Kanaan ei. 4 Agaiana sangangaa lau iko i tana kabubua nu raaku, mangkadeloka i Isaki sambokona lako i olo pemulea nu pokaku sira.”5 Roo awetu mekune batuana etu si ia, nauli, “Adiwa, ane towawine anu kusumba etu baria ia madota mangula aku mai i tanata ei? Sangangaa kukenipae lau i Isaki mesola i tana anu nakabubui nu raamu?”
6 Agaiana nasonoi ni Burahima, “Inee iko mangiangi! Inee mpuu ia nukeni mesola lau sidulau! 7 I PUE tumpu langi, anu monini aku mensuwu lako i tombi nu tuamaku, ai lako i tana nu pokaku sira, modandimo si aku, tana ei ina natumpui nu pemuleaku. Ai i PUE saduduaNa anu ina motudu malaekaNa bona motulungi iko, bona nusumba ngkia sadua towawine lako si dou mai, anu mewali nasamboko nu anaku luwu. 8 Agaiana ane towawine anu nusumba etu baria ia madota meula mai si iko, tepawiamo iko lako i sumpamu. Nauda ba adiwa inee nukeni i Isaki lau sidulau.” 9 Roo sira mololita awetu, naboli mpuumo nu batuana etu palena i patua nu timpu nu tuana mbai i lio, mpane ia modandi ina mangula ia peundea ni Burahima.
10 Nadoamo nu batuana etu sampulu mbaa onta, napopangkeni mampopengaa anu-anu ni Burahima anu masuli balukina, mpane mangoka ia lau i pearia ni Nahor anu karao mpii lako i se etu, i tana Aram mbai moure nu Mesopotamia. 11 Awetu ia dongka i tana anu natunggai etu, napopengkaroomo onta aretu, gompi i sambua tibubu i raoa nu kota etu. Ni tempo etu eo ina malimpamo, ai ewa saweweina temponamo sira towawine lau manombu ue. 12 Awetu sira mengkaroo, mekakaemo batua ni Burahima si PUE, nauli, “PUE anu napenombai nu tuaku i Burahima, Nutulungi aku bona apa anu kupobago ei ina mewali i eo ei, ai Nupatongawamo asiMu si Burahima tuaku. 13 Nuita aku meongko gompi i tibubu ei. Bariamo masae, ina dongka sira anantowawine anu lako i kota mai, mai sira manombu ue i tibubu ei. 14 Ina mololita aku luwu i sadua anantowawine etu, ina kuulika ia, ‘Ane maasi iko, popendolu pearia nu uemu, mpane nupanginui aku.’ Ane nasonoi aku nauli, ‘Panginumode, ai onta-ontamu mbui ina kupanginui sira!’ Towawine etumo anu napelisi ni PUE ina mewali samboko ni Isaki batuaMu. Ane awetu luwu pewalina, ina kuinsani mpuumo adiwa petulungi ni PUE si Burahima tuaku.”
15-16 Tongona mekakae, sadua anantowawine anu merae anu baria mani manginsani tomoane sangana i Ribka, dongka i tibubu etu mosimbu pearia ue. I Ribka etu ana ni Betuel, tumpu ni Nahor tomoane ni Milka. I Nahor etu powutu ni Burahima. Nanontosi ni Ribka tibubu etu mpane naisiimo pearia nu uena mpane ia mesola. 17 Mewali batua ni Burahima etu, melangka lau mogompilisi i Ribka, mpane napololitaka, nauli, “Merade tulungi aku, nukiraka aku ue anu i gumbamu etu kuinu.”
18 Mesono anantowawine etu, nauli, “Panginumode.” Mpane napopendolu maliga pearia uena lako i golopina, mpane nakandoka batua ni Burahima etu nainu. 19 Awetu batua ni Burahima etu roo manginu, nauli nu anantowawine etu si ia, “Ina manombu mpesola aku ue bona ontamu sira kupanginui mbui, sukana pebukuara manginu.” 20 Ni se etu, napalinta ue lako i pearia nu uena, i panginua nu onta, mpane ia melangka mesola mpesola lau i tibubu manombu ue bona maisi mpii, duduuna ope-ope onta aretu totosa sira manginu ue. 21 Natotoki ngkida nu batua ni Burahima etu apa anu nababei ni Ribka, baria nakambaroka mogalo santepo pololitana, pekirina ba natulungi mpuu ia ni PUE mampopolumako bagona ba baria.
22 Roo i Ribka mopanginui ope-ope ontana, napatimama nu batua ni Burahima etu dali bulawa, kala bulawa anu ina napataka i onge ai i pale ni Ribka. 23 Mpane napekune, nauli, “Ulito ima sanga nu tuamamu, ai ba pensani mbotoda kami mosambengi i tombina?”
24 Mesono i Ribka, nauli, “Sanga nu tuamaku i Betuel, ana ni Nahor ai Milka. 25 I tombiki ria mboto posambengia, awetu mbui pangkoni binata maisi si kami.”
26 Ni se etu molingkudu batua ni Burahima etu motumpa menomba si PUE, 27 nauli, “Kutoia Iko PUE, anu napenombai nu tuaku i Burahima, manoto i PUE baria sambela mokalambasi tuaku, nanini aku ni PUE duduuku teduu i pokana sira.”
28 Roo awetu, anantowawine etu melangka ia lau i tombi nu tinana mpane napololitamo sinangka anu mewali etu. 29-30 I Ribka ria powutuna, sangana i Laban. Naepe ni Laban pololita ni Ribka kono i apa anu napololita nu tau etu, mpane naita mbui dali bulawa i onge ni Ribka, mpane kala bulawa i pale ni Ribka. Mewali kasaliu melangka i Laban lau i raoa, lau ia mampomberumpaka batua ni Burahima etu, anu tongona mani meongko gompi i tibubu i raoa nu kota etu ai ontana sira. 31 Mololita i Laban, nauli, “Iko tau anu nawati ni PUE! Inee iko meari i raoa nu kota ei, maingko lau kita i tombi, nipatimamakakumo iko lonta anu ina nipaturui, awetu mbui pearia nu ontami sira.”
32 Mewali meula mpuumo batua ni Burahima etu, mpane mesua sira i rara nu tombi. I Laban mampopendolu kenia nu onta aretu, mpane sira napakoni. Roo awetu nadoa ue nakenika nu batua ni Burahima etu ai rangana sira, rapopobakosira paara. 33 Awetu rasusuka sira pangkonira, nauli nu batua ni Burahima etu, “Baria mani aku ina mangkoni, ane baria mani kupadongka tewai anu kukeni mai ei.” Nauli ni Laban, “Nipadongkamode.”
34 Mewali mololita mpuumo ia, nauli, “Aku ei batua ni Burahima. 35 Tuaku i Burahima, tau anu nawati ni PUE, etumo mpane pebuku ia, nakiraka ia ni PUE dimba, towau, japi, onta, kalide, awetu mbui bulawa, pera, mpane batuana tomoane ai towawine. 36 Towawinena i Sara, moana ia sadua tomoane i katuaanamo. I anara etumo napopalimbai nu tuaku ope-ope anu-anuna, mewali natumpui. 37 Natudu aku modandi i rara nu sanga ni PUE, bona mangula aku sawaana, nauli, ‘Inee nupelisika anaku anantowawine anu lako i tana Kanaan ei, anu ina nasamboko. 38 Agaiana nupelisikada ia anantowawine anu lako i pokaku sira mbai i potuamaaku. Mewali laumode maliga i tana anu nakabubui nu raaku.’ 39 Roo awetu mekune aku si ia, kuuli, ‘Adiwa ane anantowawine anu kusumba etu baria ia madota mangula aku mai?’ 40 Nasonoi aku, nauli, ‘I PUE anu kupenombai anu ina motudu malaekaNa motulungi iko, bona bago anu kuposawaaka nupobago malompe pewalina. Ina nusumba luwu sadua towawine anu ina nasamboko nu anaku, lako i ana nu pokaku mbai potuamaaku. 41 Agaiana ane baria iko radokora, lako tepawiada iko, lako i posumpamu si aku.’ 42 Mewali awetu aku dongka i tibubu mpongone, mekakae aku i raraku, kuuli, ‘PUE anu napenombai nu tuaku i Burahima, kuperade tulungi bona Nuwati bago anu tongona kupopolumako ei. 43 Meongko liliu aku gompi i tibubu ei, awetu dongka mai sadua anantowawine mai manombu ue, ina kuperade si ia bona napanginui aku. 44 Ane madota ia mopanginui aku, mpane naperade mbui bona mopanginui ia ontaku sira, manotomo i raraku ka iana etumo anu napelisi ni PUE, anu ina mewali nasamboko nu ana nu tuaku i Burahima.’ 45 Baria mani aku roo mekakae i raraku, dongkamo mai i Ribka mosimbu pearia nu ue, mpane ia manombu ue i tibubu etu. Roo awetu lau aku mampololitaka ia, kuuli, ‘Merade tulungi aku bona nupanginui aku.’ 46 Mewali ni se etu kasaliu napopendolu gumba anu tongona nasimbu, mpane nauli, ‘Panginumode, ai awetu mbui ontamu sira ina kupanginui mbui.’ Mewali manginu mpuumo aku, mpane napanginui mbui ontaku sira. 47 Roo ia mopanginui ontaku, mekune aku si ia, kuuli, ‘Ima tuamamu?’ Mesono ia, nauli, ‘Tuamaku sangana i Betuel, ana ni Nahor ai Milka.’ Mewali kudoa dali bulawa kupataka i ongena, mpane kudoa kala bulawa kupataka i palena. 48 Mpane molingkudu aku motumpa menomba ai motoia i PUE, i Pue Ala anu napenombai nu tuaku i Burahima, anu moninimo aku mai i se ei, i poka nu tuaku i Burahima, mpane kusumba sadua towawine anu ina nasamboko nu ana nu tuaku i Burahima. 49 Mewali ei-ei, ane niunde mopakatono rara nu tuaku i Burahima, nipabukei pamperadena, lawi ia saduduana pokami, nisonoimo aku ane nipokono, niuli nipokono. Ane baria niuli baria, bona kuinsani apa anu ina kubabei.”
50 Nasonoi ia ni Laban ai i Betuel, raulira, “Lawi apa anu mewali ei baria lako i manusia, agaiana nakenimpeundea ni PUE, mewali apa manipae kiuli. 51 Kenimode lau i Ribka, bona nasamboko nu ana nu tuamu i Burahima, lawi ope-ope ei, sintoto ai apa anu natudokamo iko ni PUE.” 52 Awetu naepe nu batua ni Burahima etu pololita ni Laban ai Betuel, molingkudu ia mpane motumpa menomba si PUE. 53 Roo awetu, napopensuwu nu batua ni Burahima etu pesampi, parewa bulawa ai pera, mpane ope-ope aretu nakiraka i Ribka, mpane awetu mbui powutuna ai tinana, nakiraka sira anu-anu ni Burahima anu masuli balukina. 54 Roo awetu, lako mangkonida sira mpane sira mosambengi ni se etu. Ewa ineilena, batua ni Burahima etu mololita, nauli, “Ane pensani metompamo kami ina mesola lau i tuaku i Burahima.”
55 Agaiana ni tempo etu, nauli nu powutuna ai tinana, “Pogeakamode sala i Ribka meari si kami, ane baria saminggu kasaena ba sampulu eo, mpane lako lauda ia.”
56 Agaiana nauli nu batua ni Burahima etu “Inee aku nisombo mesola i tuaku i Burahima. Nawatimo ni PUE apa tunggaiaku.” 57 Mesono sira, raulira, “Taronde sala i Ribka, bona tapekune ba adiwa peundeana.” 58 Mewali rarondera mpuumo i Ribka mpane rapekunera, raulira, “Madotapae iko meula i tau ei?” Nasonoi ni Ribka, nauli, “Io, madota aku.”
59-60 Mewali rapaliura mpuumo i Ribka ai towawine anu mokadipuraka ia lako kokoi, lau simbela-mbela ai batua ni Burahima ai tauna sira. Ni se etu, lako baria mani sira mangoka, rawatira i Ribka, raulira,
“Taperade si PUE bona mewali iko tina nu pemuleamu anu baria teimba kaisina!
Ai pemuleamu sira luwu monangi iwalira.”
61 Roo awetu, mangkadipurakamo i Ribka simbela-mbela ai basangkia anantowawine, anu mewali batuana, mpane mensawi sira i onta mangula batua ni Burahima etu.
62 Ni tempo etu, i Isaki meari i tana Negeb, pesolaanamo mai lako i tibubu anu rauli, “Lahai-Roi”. 63 Mewali basangkia eo kasaena, tempo etu ni sindulau eo, tongo ni Isaki molulumako i pada, naita ria sira onta dongka. 64 Awetu naita ni Ribka i Isaki, mendolu ia lako i ontana, 65 mpane napekune i batua ni Burahima etu, nauli, “Ima tomoane i bonde dou anu mai modupa kita?”
Mesono batua ni Burahima etu, nauli, “Ia dou mai tuaku i Isaki.” Mewali nadoa ni Ribka bobo nu woona mpane natuko liona.
66 Mewali awetu sira momberumpa ai i Isaki, napololitamo nu batua etu si Isaki sinangka anu nipobagonamo. 67 Roo awetu nadoa ni Isaki i Ribka, mpane nakeni mesua i rara lonta nu tinana tempona natuwu mani, mpane nasambokomo i Ribka. I Isaki mampokakaia i Ribka, mewali malenemo rarana anu mawiora nakenimpepalengi nu tinana i Sara.