I Burahima mobaluki tana napopaiwui i Sara
23
1 Awetu tinuwu ni Sara sangatu rompulu pitu mpaemo, 2 mamatemo ia i Hebron i tana Kanaan. Maruminsi kawiora rara ni Burahima motumangisi pepalengi nu towawinena etu.3 Tongona mani wotowata ni Sara rapowata, napalengi ni Burahima lau ia i toHet anu meari i tana etu. I se etu mololita ia, nauli, 4 “Aku ei tau anu mesua, meari i se ei simbela-mbela ai komi tumpu boea. Ane pensani nikiraka aku tanami kubaluki, bona pensani ngkia kupaiwu towawineku.”
5 Mesono sira, raulira, 6 “Komi anu kiadai anu mewali tadulako anu maroso i oloki, mewali paiwumode towawinemu i talumba anu malompe mpii anu kitumpui. Matono raraki pensani kami mopatimama talumba anu ina rapopaiwui towawinemu.”
7 Roo awetu, motumpa i Burahima i liora, 8 mpane nauli, “Ane lako i kabulana rarami mopaliu aku ina mopaiwu towawineku i se ei, merade tulungi aku si komi, bona niperadeka aku si Efron, ana tomoane ni Sohar, 9 bona napobaluka aku balamba watu anu rasanga Makpela anu ria i wiwi bondena, ai ane pensani napobaluka aku, i se ei ngkimo napobalu bona nisabiki ope-ope komi, ai basangkia balukina sangangaa kupabukei, bona tana etu kutumpuimo.”
10 Ni tempo etu, i Efron saduduana ria ni se etu, momeso simbela-mbela ai toHet gompi i boboka bente nu kota etu. Mewali mesono i Efron, nasabiki nu ope-ope tau anu ria i se etu, nauli, 11 “Nasabiki nu ope-ope tinaku, bondeku ai balamba watuna kukiraka iko, bona pensani ngkia nupaiwu towawinemu.”
12 Ni se etu, motumpa i Burahima i lio nu toHet aretu, 13 mpane mololita ia si Efron, raepe nu toHet aretu, nauli, “Petingai pololitaku. Kuunde mobaluki ope-ope bonde dou. Dokomode balukina, bona kupaiwu towawineku si dou.”
14 Nasonoi ia ni Efron, nauli, 15 “Awei ngkimo, santobu tana dou balukina iba atu doi pera, agaiana apamopae bunduna si kita rodua? Paiwumode wotowata nu towawinemu si dou.” 16 Napomakono ni Burahima baluki nu tana etu, naimba doi perana sintoto ai ewa panguli ni Efron, iamo iba atu doi pera, doi etu ratimba i timbanga anu rapake nu topobalu-balu, mpane nabaiarimo i Efron nasabiki nu toHet ope-ope anu ria i se etu.
17 Awetu mpuumo pewalina bonde ni Efron anu ria i Makpela mbai mataeo Mamre, natumpuimo ni Burahima. Tana etu tepesua bondena, balamba watu, puu nu kau anu ria i bonde dongka-dongka i puu nu kau anu ria i tompo-tompo nu tana etu. 18 Tana etu nainsani nu toHet ope-ope anu tegulu ni tempo etu, ka i Burahimanamo tumpuna.