I Pue Ala mamposawaaka i Burahima bona mampopenomba i Isaki
22
1 Sambela tempo i Pue Ala mampetandaka pepotuu ni Burahima, mpane Naronde i Burahima, Nauli, “Burahima” Mesono i Burahima, nauli, “Ei mboto aku, Pue.”2 Mpane nauli ni PUE si ia, “Doamode anamu anu saduduana etu, anu nupokaasi, iamo i Isaki, keni ia lau i tana Moria, i sambua bulu anu ina Kutudoka iko, mpane nususu ia nupopewali popenombamu anu ratunu si Aku.”
3 Ewa ineilena madondo-dondo, momesomo i Burahima lako i paturuana, lau nalampii kalidena, mpane naronde rodua batuana simbela-mbela ai i Isaki, mpane nabeso kau ina napake motunu popenombana. Roo awetu mangokamo sira lau i pearia anu ina natudoka ia ni PUE. 4 Awetu katolu eonamo sira i polumakoara, naita ngkaraomo ni Burahima pearia anu natudoka ia ni PUE. 5 Naulika sira batuana aretu, “Nipegiamo kami i se ei, simbela-mbela ai kalide ei. Ina pulo aku ai i Isaki, ina lau kami menomba si ndete mai si PUE, mpane mesola kami mai si komi.”
6 Roo awetu, nadoa ni Burahima kau anu ina napake motunu popenombana, mpane napasimbuka i Isaki. Mpane ia mangkeni apu ai ladi, mpane molumakomo sira simbela-mbela. 7 Mololita i Isaki i tuamana, nauli, “Uma.”
Mesono tuamana nauli, “Mangkiada anaku?”
Nauli ni Isaki, “Apu ai kau riamo, agaiana imbamora ana dimba anu ina tapopenomba?”
8 Mesono tuamana, nauli, “Anaku, i Pue Ala saduduaNa anu ina mopatimamaka kita ana dimba anu ina tapopenomba si Ia.” Mpane rapapulora liliu polumakora.
9 Awetu sira dongkamo i pearia anu nitudoka ia ni Pue Ala, nababeimo ni Burahima potunua popenomba, naparampi kau apu etu i wongkona. Mpane nasilu i Isaki, naboli i wongko nu kau apu anu roomo naparampi i wongko nu potunua popenomba. 10 Mpane nadoa ni Burahima ladi anu ina napake mampopate anana. 11 Agaiana naepe wotu nu malaeka ni PUE lako i langi mai, moronde ia masisimbuku, nauli, “Burahima, Burahima.”
Mesono ia nauli, “Ei mboto aku Pue.”
12 Mpane nauli nu malaeka ni PUE etu, “Inee nupopate anakoi etu ai inee ia nupopangkia. Ei-ei Kuinsanimo iko tau anu maeka si Pue Ala, lawi baria nupokabosi anamu anu saduduana nupopenomba si Aku.”
13 Mewali nalelewi mantoleli, naita sambaa dimba tuamana, tonduna tokai i daa-daa nu kau. Mewali nadoa ni Burahima dimba etu napopate, napopewali popenomba anu ratunu si Pue Ala, napopopasuru anana. 14 Pearia etu nasanga ni Burahima, “I PUE anu mopatimama apa anu raparaluu.” Etumo mpane, duduuna ei-ei nauli nu tau, “I wowo bulu ni PUE, i PUE saduduana mopatimama apa anu raparaluu.”
15 Karombelana wotu nu malaeka ni PUE lako i langi mai si Burahima, 16 Nauli, “Modandi Aku i rara nu sangaKu saduduaKu, lawi nauda anamu anu saduduana Kuposawaaka iko bona nupopenomba si Aku, batena nupeulai. 17 Ina maisi anu ina Kuwatika iko, ai ina Kubabei pemuleamu ewa kaisi nu betue i langi, ai ewa kaisi nu wungi i wiwi nu tasi. Pemuleamu sira, ina monangi sira iwalira. 18 Ai ope-ope tau i dunia ina mekakae si Aku bona Kuwati sira adiwa ka Kuwatina pemuleamu, lawi ope-ope sawaaKu nupeulaimo.”
19 Roo awetu, mesolamo i Burahima ai anana lau i batuana anu rodua mpongone, mpane simbela-mbela sira mesola lau i Berseba meari i se etu.
Pemulea ni Nahor
20 I Burahima ria powutuna sangana i Nahor. Mewali awetu mesola ia lako i bulu Moria mai, naepe ni Burahima bambari kono si Milka towawine ni Nahor, walumo anara tomoane, sangara iamo: 21 anu torapowutu i Us, mpane i Bus toina, i Kemuel tuama ni Aram, 22 i Kesed, i Haso, i Pildas, i Yidlaf, ai i Betuel. 23 I Betuel tuama ni Ribka. Etumo sira ana ni Milka pombekadipurakara ai i Nahor powutu ni Burahima. 24 Mpane i Nahor motenda sadua batua anu rasanga i Reuma, pemuleara: i Teba, i Gaham, i Tahas, mpane i Maakha.