Karapoanakana i Isaki
21
1 I PUE mopabukei dandiNa mowati i Sara, 2 sintoto ai tempo anu napakanotomo ni Pue Ala. Tempona tinuwu ni Burahima matuamo, mampaiwotomo i Sara. Roo awetu, moanamo ia sadua anakoi tomoane. 3 Anakoi etu nasanga ni Burahima i Isaki, 4 ai awetu tinuwu ni Isaki walu eomo, natindimo ia ni Burahima sintoto ai sawaa ni Pue Ala. 5 Tempo ni Isaki rapoanaka, tinuwu ni Burahima sangatu mpaemo. 6 Nauli ni Sara, “Napopantawa aku ni Pue Ala, ai ima ngkida anu mangepe bambari ei sangangaa mantawa ia matono simbela-mbela ai aku.” 7 Mpane nauli mbui, “Ni banimpia baria mogalo sadua anu pebai mangulika tomoaneku, kaina mopasusuku sadua anakoi! Agaiana naudapae tomoaneku matua mpiimo, pensani mani aku moana.”8 Anakoi etu kalalauamo mabose, ai ni tempona mepuu mengkaroo rapasusu, i Burahima mobabei sambua susa anu mabose.
I Hagar ai i Ismael raliwu
9 Sambela tempo, i Ismael ana ni Burahima ai i Hagar toMasiri etu, tongora mowadi-wadia ai i Isaki ana ni Sara. 10 Awetu naita sira ni Sara, mololita i Sara si Burahima, nauli, “Liwumode batua towawine dou simbela-mbela ai anana. Baria pensani anana mansumba kira lako i kapebukumu anu ina natumpui nu anaku i Isaki.” 11 Maruminsi kabariana matono rara ni Burahima mangepe pamperade ni Sara si ia, lawi i Ismael ana wotona mbui. 12 Agaiana mongkora i Pue Ala si Burahima, Nauli, “Inee nuposusa rara kono si Hagar ai i anana etu. Peulaimode peundea ni Sara, lawi pemulea anu nidandikaKu iko, mepuu lako si Isakida. 13 Awetu mbui ana ni Hagar ina Kupopemule-mule mbui ia, bona mewali sira santina, lawi ia anamu mbui.”
14 Ewa ineilena madondo-dondo, nakiraka ni Burahima pangkoni saudi, ai pearia ue. Nakiraka i Hagar rapobokura i dala napaubaka i Hagar mpane natudumo sira lambu. Mewali malambumo i Hagar simbela-mbela ai anana i Ismael, molumako i pada lori Berseba. 15 Awetu ue anu i pearia ue anu nakeni ni Hagar etu opemo, i Hagar mopalengi anana i woi nu kau sira anu maonga, 16 mpane lau ia momeso sangatu mete kakaraona lako i popalengiana i Ismael, nauli nu rarana, “Baria kubuku mangita kamate nu anaku.” Mpane motumangi ia.
17 Naepe ni Pue Ala wotu nu anakoi etu. Etumo mpane malaeka ni Pue Ala mololita si Hagar, nauli, “Apa anu nuposusa rara, Hagar? Inee iko maeka. Naepemo ni Pue Ala wotu nu anamu. 18 Pesolamode i anamu, popeongko ia mpane nupakalene rarana. Ina Kupopewali pemuleana santina tau anu mabose.” 19 Roo awetu, napopeitaka ia ni Pue Ala sambua tibubu, mewali laumo ia i tibubu etu mpane naisiimo pearia nu uena etu, mpane lau napanginuimo anana.
20 Nakenimpenini ni Pue Ala si Ismael, kalalaua mabosemo ia, meari ia i pada lori Paran, mpane mewali ia sadua tau anu mapande moasu. 21 Mpane napopotombi ia nu tinana ai sadua towawine toMasiri.
Podandi ni Burahima ai i Datu Abimele
22 Ni tempo etu, Datu Abimele ai i Pikol tadulako nu surudadona, lau sira si Burahima mpane, raulira, “I Pue Ala mamporangai iko ai modurei iko i sinangka bagomu. 23 Mewali posumpamode i se ei si aku i lio ni Pue Ala, kabariamu ina mobagiu aku ai anaku sira, awetu mbui pemuleaku sira. Ewa kalompe nu raraku anu nipopetudokakumo si iko, nubabei mbui ewa etu si aku, ai i tana anu nupearii ei.”
24 Nauli ni Burahima, “Mosumpa aku si iko i lio ni Pue Ala.” 25 Agaiana ria penonso ni Burahima si Datu Abimele, kono i saogu tibubu anu nirampakimo nu batua ni Abimele sira. 26 Nauli ni Abimele, “Baria kuinsani kaimana anu mobabei etu. Baria sambela aku nuulika, lako eida ka kuepena.” 27 Mewali nakiraka ia ni Burahima basangkia dimba ai japi, mpane mobabei sira podandi. 28 Napatani ni Burahima pitu mbaa ana dimba anu tinana lako i olo nu dimbana sira, 29 mewali napekune ni Abimele si ia, nauli, “Mangkiada mpane nupatani pitu mbaa ana dimba etu?”
30 Nasonoi ni Burahima, nauli, “Dokomode ana dimba pitu mbaa ei, mewali sambua katongawaana pangakumu si aku, ka akuna anu mokae tibubu ei.” 31 Etumo mpane pearia etu rasanga Berseba, lawi ni se etumo i Burahima ai i Abimele mobabei podandi.
32 Roo sira modandi i Berseba, i Abimele ai i Pikol mesola sira i tana nu toPelisiti. 33 Awetu sira mesola, natuda ni Burahima sampuu kau tamariska ni se etu, ai mepuu lako ni tempo etu, pearia etu napake ni Burahima mewali sambua pearia menomba si PUE, i Pue Ala anu baria mokasopoa. 34 Roo awetu, i Burahima masae mani ia meari i tana nu toPelisiti.