I Burahima ai i Abimele
20
1 Sambela tempo, i Burahima melimba lako i Mamre meari i tana Kanaan mbai monsau i olo nu Kades ai Sur, i tana Gerar. I se etu ia tosandarena. 2 Pearina i Gerar, napololita i tau sira, i Sara towawinena etu, iamo toina, etumo mpane datu nu toGerar anu rasanga i Abimele, motudu ia tauna bona mandoa i Sara rakenira si ia. 3 Agaiana ni kawengina, i Pue Ala mampatongawa si Datu Abimele i rara nu pangipina, Naulika ia, “Ina mamate iko, nakenimpandoamu towawine etu, lawi towawine etu riamo tomoanena.”4 Agaiana i Abimele baria mani mamperou i Sara, etumo mpane nauli ni Datu Abimele, “Pue, baria aku masala! Ina Nupakaropupae aku, simbela-mbela ai tau anu kuparenta sira? 5 I Burahima saduduana manguli towawine dou toina, ai awetu mbui nauli nu towawine dou, mewali anu kubabei ei, lako i kabula-bula nu raraku, mewali baria aku anu masala.”
6 Nasonoi ia ni Pue Ala i rara nu pangipina, “Kalawiana Kuinsani mboto, babeiamu etu lako i kabula-bula nu raramu. Etumo mpane, baria iko Kupaliu mobabei dosa si Aku, ai baria iko Kupatumbeika motui towawine etu. 7 Mewali ei-ei, nupopesolamo ia i tomoanena. Tomoanena sadua nabi, ai ina napekakaeka iko bona baria iko mamate, agaiana ane baria ia nupopesola i tomoanena, bona nuinsani, iko ai ope-ope tau anu nuparenta ina mamate!”
8 Ewa neilena madondo-dondo, naronde ni Abimele ope-ope tauna sira anu mobago i tombi kadatua etu, mpane naulika sira ope-ope anu mewali si ia. Mewali ope-ope sira maruminsi kaekara. 9 Roo awetu naronde ni Abimele i Burahima mpane napekune, nauli, “Mangkiada mpane ewa etu babeiamu si kami? Apa salaku si iko, mpane nu paria dosa anu mabose si aku ai i ope-ope parentaku? Kamonsona, baria malompe ane ewa etu babeiamu si aku. 10 Mangkiada mpane nubabei ewa etu, apa tunggaiamu?”
11 Nasonoi ni Burahima, “Nipenokaku, i se ei baria ria tau anu maeka si Pue Ala, lawi maeka aku rapopate nu tau anu mampokailu towawineku, ane rainsani katowawineku ia. 12 Ai kamonsona, ia dulau toiku lawi aku ai ia tuamaki sadua. Tinaki ngkida anu mogaa, awetu kami mabose mosamboko kami. 13 Ai awetu Natudu aku ni Pue Ala mopalengi tombi nu tuamaku molulumako i tana nu tau, mololita aku i towawineku, kuuli, ‘Nupatongawamo pepokakaiamu si aku, nupololita i tau sira, aku ei powutumu.’”
14 Roo i Burahima mololita ewa etu, napopesola ni Abimele i Sara si ia, ai ni tempo etu mbui nakiraka ni Abimele i Burahima basangkia dua batua, dimba ai japi. 15 Mpane nauli ni Abimele si Burahima, “Ope-ope tana ei, aku tumpuna, pelisimode ope-ope tana ei, imba anu nuunde nupearii.” 16 Roo awetu, mololita mbui ia si Sara, nauli, “Powutumu roomo kukiraka sansobu mpeka doi pera, bona nainsani nu tau, iko etu monso-monso tau anu baria masala.”
17-18 Nakenimpandoa ni Abimele i Sara towawine ni Burahima, etumo mpane ope-ope towawine anu i rara nu tombi kadatua etu, napakalalo sira ni PUE. Mewali mekakae i Burahima si Pue Ala. Pekakaena etu napetingai ni PUE, etumo mpane napakaosa ni Pue Ala i Abimele, towawinena, batuana towawine, mewali pensani mpesolamo sira memule.