Dosa nu toSodomo
19
1 Awetu roomo malaeka anu rodua aretu mensopi si Burahima, mopapulo sira polumakoara, lau sira i kota Sodomo. Dongka sira i kota Sodomo ina madedimo. Ni tempo etu, i Looti tongona momeso i boboka pesuangaa i kota Sodomo. Awetu naita tau rodua aretu, lau nadupa sira. Awetu ia dongka si sira, molingkudu ia 2 mpane nauli, “Komi anu kuadai, ane madota komi, mensopi komi i tombiku, mpane mobakosi paami ai mosambengi, i neiledamo madondo-dondo mpane nipapulo polumakoami.”Agaiana mesono sira, raulira, “Kiuli maisi kalompena, i se ei ngkimo kami mosambengi i lapanga anu i rara nu kota.”
3 Agaiana nakeningka naperade tulungina mpii ni Looti, madotamo sira mensopi mpane mosambengi, mewali mesuamo sira simbela-mbela i rara nu tombina. I Looti mopatimama pangkoni anu matomo, mpane motunu ia roti i kasondo-sondona rakonira, mpane mangkoni sira.
4 Agaiana lako baria mani sira lau maturu torare ni Looti aretu, ope-ope tomoane anu ria i Sodomo, mepuu lako i pamuda, duduuna sira tomana-tomoane, lau sira motoleliki tombi ni Looti. 5 Rangangaira i Looti mpane rapekunera, raulira, “Imbamora sira tau anu mai mosambengi i tombimu? Popensuwu sira mai bona kipake sira!”
6 Mensuwu i Looti lako i rara nu tombina mai, natuko mpesola boboka nu tombina etu, 7 mpane mololita ia, nauli, “Poka-pokaku, kuperade tulungi mpii si komi ope-ope. Inee kowo nibabei babeia anu madaa etu, si sira. 8 Nipetingaito sala. Ria anaku towawine rodua, anu baria mani sira manginsani tomoane. Ane niunde, sira ngkimo anu kususuka komi, ba apa sira nibabeika komi wopae, agaiana inee nipopangkia torareku arei, lawi sira arei tongona i rara nu paleku, mewali sangangaa kukampai.”
9 Agaiana nauli nu toSodomo aretu si Looti, “Pogea! Iko etu tau anu mesua ngkida i se ei, baria iko makuasa moparentai kami. Ane baria iko madota, ina maruminsi kadaana anu kibabeika iko, mpane lako i tau anu rodua aretu.” Rarukora i Looti, ina ragentasira boboka nu tombi ni Looti. 10 Agaiana torare ni Looti anu rodua aretu, modii i Looti rapopesuara i rara nu tombi, mpane ratukora boboka nu tombi etu. 11 Roo awetu rapakabilora ope-ope tau anu ria i raoa nu tombi ni Looti etu, mewali bariamo rainsanira kaimbana boboka nu tombi etu.
I Looti natudu nu malaeka bona mopalengi kota Sodomo
12 Torare ni Looti anu rodua aretu mololita si Looti, raulira, “Ane ria anamu tomoane ba anamu towawine, awetu mbui ane ria maniamu ba pokamu anu ntanina anu meari i rara nu kota ei, keni sira mensuwu lako i rara nu kota ei, 13 lawi kota ei ina kipakaropu. Babeiara anu madaa nainsanimo ni PUE, etumo mpane Natudumo kami mai, bona mopakaropu kota ei.”
14 Roo ia napololitaka nu torarena aretu, laumo ia mampomberumpaka rodua anantomoane sampomanu nu anana aretu, mpane nauli, “Maliga komi mensuwu lako i rara nu kota ei, lawi kota ei ina Napakaropu ni PUE.” Agaiana lolita ni Looti etu, nipenokara ba wule mowadi-wadi mbotoda i Looti.
15 Awetu gompi mabaamo, malaeka anu rodua aretu mosusumpei i Looti, raulira, “Kalambumode maliga, keni towawinemu ai anamu towawine rodua lako i se ei, bona baria komi mamate ane kota ei rapakaropu.” 16 Ni tempo etu, tongo ni Looti mampomaleka mani, malaeka anu rodua aretu modii sira, mensuwu lako i rara nu kota Sodomo etu, nakeningka napokaasina sira ni PUE Ala.
17 Awetu sira mensuwumo lako i rara nu kota Sodomo, malaeka anu sadua etu mololita si sira, nauli, “Pelangkamode komi, nipatuwu wotomi, inee komi membalili i talikumi, ai inee komi mengkaroo i lembo. Melangka komi lau i bulu bona baria komi mamate!”
18 Agaiana nauli ni Looti, “Komi anu kuadai, inee kowo kami nitudu melangka lau i bulu. 19 Kalawiana melumbumo petulungimi mopatuwu kami, agaiana mapari raraku lawi bulu dou mai karao gaga, mole baria manipae kami dongka luwu i bulu dou mai, mamatemo kami nakeningka nipakaropuna kota Sodomo ei. 20 Ane pensani, dou mai ria saogu kota anu kokoi baria gaga karao lako i se ei, si dou ngkimo kami melangka bona tuwu ngkia kami.”
21 Nasonoi sira nu malaeka etu, nauli, “Baria mboto mangkia pelangkamode komi sindou, kota anu kokoi dou, baria ina Kupakaropu. 22 Maliga pelangkamode komi! Lawi baria mani pensani Aku mobabei ba apa, ane baria mani komi dongka si dou.”
Kota etu rasanga Soar, lawi nauli ni Looti kota etu kokoi.
Karopu nu kota Sodomo ai Gomora
23 Awetu mensibemo eo, dongkamo i Looti i kota Soar. 24 Ni tempo etumo, i PUE mampopendolu apu watu belerang lako i langi ewa uda, i kota Sodomo ai Gomora. 25 Kota anu roogu etu ai ope-ope lembo Yarade napakaropu ni PUE ai sinangka anu ria i rarana. 26 Agaiana tempo ni PUE mopakaropu kota Sodomo ai Gomora, towawine ni Looti membalili ia mampeita apa anu mewali, etumo mpane mewali ia watu bure anu ewa lense nu tau.
27 Ewa ineilena madondo-dondo, nagagu ni Burahima lau i peariana meongko i lio ni PUE ni wengi. 28 Ni se etu, natotoki kota Sodomo ai Gomora ai ope-ope lembo anu ria i se etu, naita rambu nu apudamo anu maruminsi porumukuna lako i wongko nu tana etu. 29 Ewa etumo i Pue Ala mopakaropu kota Sodomo ai Gomora i lembo Yarade, mewali Nakaendo ni Pue Ala i Burahima, etumo mpane Napopensuwu i Looti lako baria mani Napakaropu kota etu.
Lolitakana ulububu nu toMoab ai toAmon
30 Nakeningkaeka ni Looti meari i kota Soar, etumo mpane lau ia i bulu simbela-mbela ai rodua anana anu towawine, mpane meari sira i sambua pearia i balamba watu. 31 Sambela tempo, anana anu torapowutu mololita i toina, nauli, “Tuamata matuamo, ai i tana ei baria ria tomoane ntanina anu ina mamposambokoka kita. 32 Mewali tapakalangu tuamata mpane taperou, bona ria pemulea nu tuamata.” 33 Mewali ni kawengina etu, rapanginuiramo tuamara ai anggoro, ai awetu tuamara laumo maleta malangumo nababei nu anggoro, laumo anana anu torapowutu mamperou tuamana, baria nainsani nu tuamara kaapana anu mewali ni kawengi etu nakeningkamaruminsina kalanguna. 34 Ewa ineilena, mololita mbuimo anana anu torapowutu etu i toina, nauli, “Ni ngkunuwia, meroumo aku ai tuamata! I luwui kawengi tapakalangu mbuimo tuamata, ai awetu ia malangu laumo iko mamperou ia, bona ria pemulea nu tuamata.” 35 Awetu karombengina, rapanginuira mbuimo tuamara ai anggoro, ai awetu tuamara laumo maleta lawi malangu nababei nu anggoro, laumo mbui anana anu torapotoi mamperou ia, ai nakeningkalangu nu tuamara etu, baria mbui nainsani kaapana anu mewali ni kawengi etu. 36 Baria masae lako ni se etu, ana ni Looti anu rodua aretu, mampaiwotomo sira nakenimpamperoura tuamara. 37 Awetu dongkamo tempora moana, anana anu torapowutu moana ia sadua anakoi tomoane, rasanga ia i Moab. Ia etumo anu mewali ulububu nu toMoab anu tuwu mani duduuna ei-ei. 38 Mpane anana anu torapotoi moana ia sadua tomoane mbui, rasanga ia i Ben-Ami. Ia etumo ulububu nu toAmon anu tuwu mani duduuna ei-ei.