Nasola ni Pue Ala modandika i Burahima sadua anakoi tomoane
18
1 I PUE mampatongawa wotoNa si Burahima gompi i puu nu kau anu mabose, penombaa ni Mamre. Eo mapana gaga mewali i Burahima momeso i lio nu bambaruna. 2 Awetu ia mengowa, naita tolu dua tau. Mewali melangkamo ia mogagu tau aretu, ai awetu ia dongka si sira, molingkudu ia 3 mpane mololita, nauli, “Komi anu kuadai, inee kowo niliu bambaruku, ane pensani mensopi sala komi, ai ane niunde ina kurora komi. 4 Pomeso komi i puu nu kau ei mopakaosa wowemi. Ina lau aku mandoa ue saudi ina kupopobakosi paami. 5 Ai ina kupatimamaka komi pangkoni, bona maroso ngkia komi mopapulo polumakoami, ai teadai aku kuepe lawi madotamo komi mensopi i bambaru nu batuamu ei.”Mesono sira, raulira, “Nakeningkalompe nu raramu si kami, ina mensopi kami i bambarumu.”
6 Roo awetu, kasaliu mesua i Burahima i rara nu bambaruna etu, mpane naulika i Sara, “Nudoa tampu sangkusaua anu malompe mpii, mpane nubabei roti moliogu.” 7 Mpane melangka ia lau i pearia nu pinatuwuna, napelisi sambaa ana japi anu marudu, mpane naposawaaka sira batuana bona mosambale ana japi etu, mpane kasaliu radakara. 8 Roo awetu nadoa ni Burahima susu anu mabokumo, mpane nadoa mbui bau anu roomo radaka etu, napasilolongaka sira pangkonira i puu nu kau etu, mpane natudu sira mangkoni. Tongora mangkoni, i Burahima meongko i se etu matimama liliu ia morora sira.
9 Roo awetu, rapekunera i Burahima, raulira, “Imbara i Sara towawinemu?”
Nasonoi sira ni Burahima, nauli, “Dou mbotora i rara nu bambaru.”
10 Sadua lako i tau anu tolu aretu, manguli, “Sasio mbula mani, mesola mpesola Aku mai, ai i tempo etumo luwu, i Sara towawinemu moanamo ia sadua anakoi tomoane.” Tongona mololita awetu, naepe ni Sara, lawi i Sara tongona momeso i boboka nu bambarura i taliku nu torarera aretu. 11 Ni tempo etu, i Burahima ai Sara matinuwumo sira, ai i Sara bariamo dongka wulana. 12 Etumo mpane mantawa ia i rarana, mpane nauli nu rarana, “Aku anu matinuwumo ewa ei, madota manipae aku merou ai tomoaneku? Apa mani tomoaneku matinuwumo mbui.”
13 Mewali ni tempo etu, napekune ni PUE si Burahima, Nauli, “Mangkiada mpane mantawada i Sara, ai mangkiada mpane baria mesua i akalana kapensanina mani moana nauda matinuwumo ia? 14 Riapae anu baria mesua i akala anu Nababei ni PUE? Anu ewa niuliKumo ni mpongone, pae mai ina mesola mpesola Aku mai i se ei, ai i tempoKu mai mpesola etu, i Sara ina moana ia sadua anakoi tomoane.”
15 Nakeningkaeka ni Sara, nasapuaka, nauli, “Baria aku mantawa.”
Agaiana nauli ni PUE, “Kalawiana mantawa iko ni mpongone.”
I Burahima merade asi si PUE bona kota Sodomo baria Napakaropu
16 Roo awetu tau tolu aretu mopapulomo sira polumakoara, lau napatiati sira ni Burahima. Mewali dongkamo sira i sambua pearia, ai lako i pearia etu, raitara ngkaraomo kota Sodomo. 17 Nauli ni PUE i raraNa, “Baria Aku madota mowunikai tunggaiaKu si Burahima, kono i apa anu ina Kubabei. 18 Bariapae, i luwuna pemuleana sira ina mewali santina tau anu mawori mpane makuasa sira i dunia? Bariapae nakeningka iana, ope-ope tina i dunia mansumba pewatiKu?b 19 Kupelisimo ia bona moparenta ia anana sira ai pemuleara, bona meula sira si Aku, mpane mampopolumako sira anu malompe ai anu manoto sintoto ai peundeaKu. Ane ope-ope aretu raulakaira, ope-ope dandiKu si Burahima ina Kupabukei.”
20 Roo awetu, nauli ni PUE si Burahima, “Kuepemo pekakae nu tau anu manguli, madaa mpuu babeia nu toSodomo ai toGomora, ai kalawiana maisi gagamo babeiara anu madaa. 21 Etumo mpane ina mendolu Aku, lau Kupeita bona Kuinsani ba mamonso ba baria.”
22 Lako ni se etu mangoka sira rodua tau aretu moilodo lau i Sodomo, agaiana i PUE ni se etu mani simbela-mbela ai i Burahima. 23 Lau nagompilisi ni Burahima i PUE mpane mekune, nauli, “Mamonsopae PUE ina Nupakaropu tau anu malompe simbela-mbela ai tau anu madaa? 24 Adiwa ane ria mani lima mpulu dua tau anu malompe babeiara i kota ndou, ina Nupakaropupae ope-ope kota ndou? Bariapae ina nupatongawa asiMu i kota ndou, nakeningkalima mpulu duana tau aretu? 25 Baria mesua i akala, ina Nupopate tau anu malompe babeiara simbela-mbela ai tau anu madaa babeiara. Baria mesua i akala, ane Iko Topobotusi kara-kara anu manoto i dunia ei, botusiaMu baria sintoto!”
26 Nauli ni PUE, “Ane ria mani Kusumba lima mpulu dua tau anu malompe babeiara i kota Sodomo ndou, baria Kupapulo peundeaKu mopakaropu kota ndou. Nakeningka sirana, Kuampuni ope-ope tau i kota ndou.”
27 Mololita mbuimo i Burahima, nauli, “Inee aku Nukarumpui Pue ane kupapulo mani pololitaku. Aku ei wule awu nu tana ngkida, ai kamonsona baria aku pensani mampololita apa ngkida. 28 Agaiana adiwa ane iba mpulu lima dua taudamo anu malompe babeiara, bariamo lima mpulu dua, Nupapulo manipae tunggaiaMu mopakaropu ope-ope kota ndou, nakeningkakurana lako i lima dua tau anu malompe babeiara?”
Nasonoi ia ni PUE, “Kota ndou baria ina Kupakaropu ane lawi ria mani iba mpulu lima dua tau anu malompe babeiara.”
29 Mololita mbuimo i Burahima, nauli, “Adiwa ane iba mpulu dua ngkida tau anu malompe babeiara?”
Nasonoi ia ni PUE, Nauli, “Nakeningkaiba mpulu duana tau anu malompe babeiara etu, baria ina Kupapulo tunggaiaKu.”
30 Napapulo ni Burahima mololita, nauli, “Inee Iko marumpu PUE, ane kupapulo mani pololitaku. Adiwa ane wule tolu mpulu dua ngkida tau anu malompe babeiara?”
Nauli ni PUE, “Ane Kusumba tolu mpulu dua tau anu malompe babeiara, baria ina Kupapulo tunggaiaKu mopakaropu kota ndou.”
31 Mololita mani i Burahima si PUE, nauli, “Inee aku Nukarumpui Pue ane kupapulo mani pololitaku ei. Adiwa ane rompulu dua ngkida tau anu malompe babeiara?”
Nasonoi ia ni PUE, Nauli, “Ane ria mani Kusumba rompulu dua tau anu malompe babeiara, kota ndou baria ina Kupakaropu.”
32 Kasopoana mololita i Burahima, nauli, “Inee kowo aku Nukarumpui Pue, sambela mani aku ina mololita. Adiwa ane tesumba wule sampulu dua ngkida tau anu malompe babeiara?”
Nauli ni PUE, “Ane ria sampulu dua tau anu malompe babeiara, baria ina Kupakaropu kota ndou.”
33 Roo sira mololita, Napalengimo ni PUE i Burahima, mpane i Burahima mesolamo ia lau i peariana.