Petindi mewali tanda podandi ni Pue Ala ai i Abram
17
1 Awetu tinuwu ni Abram sasio mpulu sasio mpae, i PUE mopatongawa wotoNa si Abram mpane mololita Ia, Nauli, “Aku eimo Pue Ala anu makuasa.a Mengkoru iko si Aku, ai peulaimode sinangka peundeaKu. 2 Ina modandi Aku si Iko, ai ina Kupopemule-mule iko.” 3 Ni tempo etu, molingkudu i Abram motumpa menomba si Pue Ala. Tongona molingkudu, mololita i Pue Ala si ia, Nauli, 4-5 “Eimo dandiKu si iko. Ina mewali iko rapoulububu mawori ntina tau. Etumo mpane sangamu bariamo i Abram, agaiana Kubalikimo i Burahima. 6 Ina Kupopemule-mule iko, ai ina ria lako i olo nu pemuleamu aretu, basangkia dua anu ina mewali datu. Pemuleamu baria teimba kaisira, ai ina mewali mbui sira basangkia ntina. 7 Ina Kupabukei dandiKu si iko ai i pemuleamu sira. DandiKu etu baria ina mokasopoa duduuna kasae-saeana. Akumo i Pue Ala anu nupenombai, ai anu napenombai nu pemuleamu sira, i luwuna.* 8 Ina Kukiraka iko ai pemuleamu sira tana ei, anu ei-ei nupearii ewa tau anu mesua meari i tana ei. Sumalele tana Kanaan, ina natumpui nu pemuleamu sira duduuna kasae-saeana, ai Akumo i Pue Ala anu ina rapenombaira.”*9 Mololita mbuimo i Pue Ala si Burahima, Nauli, “Sangangaa nubabei katongawaana dandiKu ei, awetu mbui pemuleamu ai pemulea nu pemuleamu sira. 10 Iko ai pemuleamu anu tomoane sira sangangaa ratindi.* 11-12 Mepuu ei-ei, sangangaa nutindi sinangka anakoi tomoane, mepuu lako walu eomo tinuwura, awetu mbui ewa batuamu sira anu rapoanakamo i rara nu tombimu, ba batuamu anu nubaluki, lawi petindi etu mewali sambua katongawaana podandita. 13 Ope-ope tau sangangaa ratindi, lawi etumo anu mewali sambua katongawaana podandiKu i rara nu wotomi, anu baria mokasopoa. 14 Tomoane anu baria ratindi, sangangaa ratende ia lako i poka-pokana, lawi ia sadua tau anu baria mampeulai dandiKu.”
15 Roo awetu, Nauli mbuimo ni Pue Ala si Burahima, “Ineemo nuronde sanga nu towawinemu i Sarai, agaiana mepuu ei-ei, sangana nurondemo i Sara.b 16 Ina Kuwati ia, ai ina moana ia sadua anakoi tomoane, anu ina Kukiraka iko mewali nupoana. Ai ina Kuwati ia mewali tina nu tau basangkia ntina. I olo nu pemuleana ina ria basangkia dua sira ina mewali datu.”
17 Mewali motumpamo i Burahima menomba si Pue Ala, agaiana i rara mpotumpana etu, mantawa ia i rarana, mpane nauli mbui nu rarana, “Mesua i akalapae sadua tomoane anu tinuwuna sangatu mpaemo, ina ria mani pemuleana? Ai baria mbui mesua i akala, i Sara anu tinuwuna sasio mpulu mpaemo ina moana mani.” 18 Mewali mololita ia si Pue Ala, nauli, “Ane malompe, i Ismael ngkimo anu ina modoko sinangka anu Nudandikamo aku.”
19 Agaiana nasonoi ia ni Pue Ala, “Baria. I Sara towawinemu ina moana ia sadua anakoi tomoane, ai ina nusanga ia i Isaki. Apa anu Kudandimo, dandi etu ina mewali i anakoi etu, ai i pemuleana luwu. Dandi etu baria ina mokasopoa. 20 Ai ewa pamperademu kono si Ismael, ia mbui ina Kuwati, ai ina Kupopemule ia, ai anana sira ina Kupopewali tadulako nu sampulu rontina tau, ai pemulea nu anana sira, ina Kupopewali santina tau anu mabose. 21 Agaiana dandiKu ina Kupabukei si Isaki anamu, anu ina napoanaka ni Sara pae mai, tempona simbela ai tempo anu ewa ei.” 22 Roo i Pue Ala mongkora ewa etu, Napalengimo i Burahima.
23 Mewali ni eo etu mbui, i Burahima mampeulai sawaa ni Pue Ala, mewali napopetindimo anana i Ismael ai ope-ope tomoane anu i rara nu tombina, tepesua ewa batuana anu rapoanakamo i rara nu tombina, awetu mbui ewa batuana anu nabaluki. 24 Tempo ni Burahima ratindi, tinuwuna sasio mpulu sasio mpae, 25 mpane i Ismael anana tempona ratindi, tinuwuna sampulu tolu mpae. 26 Ratindi sira simbela-mbela ni eo etu, 27 ai ope-ope sira batuana tomoane.