I Hagar ai i Ismael
16
1 Masaemo i Abram ai i Sarai mombekadipuraka, agaiana baria mani sira moana. Mewali ria sadua anantowawine toMasiri batua ni Sarai, sangana i Hagar. 2 Nauli ni Sarai si Abram, “Baria aku napopemule ni PUE, mewali nuperou batuaku ei. Babila memule mbotoda ia bona anana kupoana.” Mewali napeulaimo ni Abram peundea ni Sarai. 3 Mewali natendamo ni Abram i Sarai ai i Hagar. Tempo etu, sampulu mpaemo sira meari i tana Kanaan. 4 Merou mpuumo i Abram ai i Hagar, etumo mpane mampaiwotomo i Hagar. Awetu nainsani pampaiwotona, mampemabosemo ia, ai bariamo ia mobila i Sarai.5 Etumo mpane mololita i Sarai si Abram, nauli, “Kukirakamo iko i Hagar batuaku, ai sungkaina nainsani pampaiwotona, bariamo aku nabila, babeiana etu salamu. I PUE saduduaNa anu ina mobotusi kara-karata ei.”
6 Mesono i Abram, nauli, “I Hagar batuamu, apa ngkida anu nubabeika ia, baria mangkia, iko wopae.” Mewali mepuu lako ni se etu napopesiasi ni Sarai i Hagar, etumo mpane i Hagar malambu lako ni se etu.
7 Kalambu ni Hagar tempo etu, lau napomberumpaka ia nu malaeka ni PUE, gompi i pentumbua nu ue i pada lori, i dala anu lau i pada lori Sur. 8 Nauli nu malaeka etu, “Hagar batua ni Sarai, lako imba iko mai, ai ina imba iko lau?”
Nasonoi ni Hagar, nauli, “Lambu aku lako si Sarai tuaku.”
9 Nauli nu malaeka etu, “Pesolamode si ia, mpane nupeulai peundeana.” 10 Mpane nauli mbui nu malaeka etu mopadongka bambari lako si PUE, si Hagar, “Ina Kupopemule-mule iko, duduuna pemuleamu sira baria pensani raimba kaisira. 11 Bariamo masae ina moanamo iko, sadua anakoi tomoane, nusanga ia luwu i Ismael, lawi i rara nu kaparimu, napetingai ni PUE potumangimu. 12 Agaiana anamu etu ina tuwu ewa sambaa kalide anu maila. Ima ngkida tau ina naewa, ai awetu mbui tau sira, ima ngkida sira ina moewa ia, ai baria ia mosintuwu ai pokana sira.”
13 Nauli nu rara ni Hagar, “Mamonsopae, mangitamo aku i Pue Ala anu mampokakaia aku.” Etumo mpane nasanga i PUE, anu mololitamo ai ia, “El-Roi”. 14 Etumo mpane tibubu anu ria i olo nu Kades ai Bered rauli nu tau “Tibubu Lahai-Roi”.