Dandi ni Pue Ala si Abram
15
1 I PUE mampatongawa si Abram, Nauli, “Inee iko maeka, Abram. Ina Kupakarao lako si iko sinangka anu mepakarugi, ai ina mabose pesurungiKu.”2-3 Agaiana nauli ni Abram, “PUE anu makuasa, baria aku Nupopemule. Tau anu motumpui sinangka anu-anuku luwu ane mamatemo aku, wule i Elieser batuaku toDamsik. Mewali apamo bunduna pesurungiMu si aku?”
4 Roo awetu i PUE mongkora mbuimo si Abram, Nauli, “Baria batuamu anu ina motumpui sinangka anu-anumu, agaiana ana wotomu anu ina motumpui.” 5 Nakeni ni PUE i Abram lau i raoa, mpane nauli ni PUE si ia, “Tirangaito langi mpane nupetandaka moimba betue anu i langi rindete, adiwa kaisina betue i langi, awetu mbui luwu kaisina pemuleamu, duduuna baria pensani raimba kaisina.”
6 Napotuu ni Abram apa anu Naulika ia ni PUE, etumo mpane nadoko ia ni PUE sadua tau anu mopakatono raraNa.*
7 Mewali mololita mbuimo i PUE si ia, Nauli, “Akumo i PUE anu monini iko mensuwu lako i tana Ur i Babeli, bona Kukiraka iko tana ei mewali nutumpui.”
8 Agaiana napekune ni Abram, nauli, “O PUE anu Makuasa anu kupenombai. Adiwamo ka kuinsanina tana etu ina mewali kutumpui?”
9 Nasonoi ia ni PUE, Nauli, “Nudoaka Aku sambaa japi tinana, sambaa towau tinana, sambaa dimba tuamana, tinuwura tolu-tolu mpae, mpane nuala mbui sambaa tosi tokuku, ai sambaa tosi manggebodo.” 10 Nadoa mpuumo ni Abram binata aretu, napopate sira mpane naboka romboka. Roo awetu, anu naboka aretu napopombelio sira nadede rontere, agaiana tosi aretu baria sira naboka. 11 Bau aretu napengkatoangi nu tosi anu mangkoni bau, agaiana naliwu sira ni Abram.
12 Awetu eo ina malimpamo, i Abram maleta mposo, mewali ungangkidamo kadedi mpara motuko ia, mewali maruminsi kaekana.
13 Mololita i PUE si Abram, Nauli, “Bona nuinsani, pemuleamu sira ina mewali tau anu mesua i tana ntanina, ai ina rapobatua sira, ai rapopesiasi sira i rarana iba atu mpae kasaena. 14 Agaiana tau anu mampobatua ai anu mampopesiasi sira etu, ina Kusuku, ai pemuleamu sira mopalengi tana nu tau aretu, maisi anu-anura anu ina rakenira. 15 Iko saduduamu ina mandoe tinuwumu, ai ina malompe kamatemu duduumu rapaiwu. 16 Awetu kaiba lapinamo pemuleamu aretu, ina mesola mpesola sira i tana Kanaan ei, agaiana lako baria mani maruminsi kadaara nu toAmori baria sira ina Kutudu lambu bona sintoto sira rasuku.”
17 Awetu kawengimo, naita ni Abram gate apu anu morambu ai sulo anu tuwu, mpane melempo i olo nu bau anu naboka-boka aretu. 18 Ni tempo etu mbui i PUE modandi si Abram, Nauli, “Modandi Aku ina mokiraka pemuleamu sira ope-ope tana anu i se ei, mepuu lako i tompo nu tana Masiri duduuna dongka i ue Efrat, 19 tepesua mbui tana nu toKeni, toKenas, toKadmon, 20 toHet, toFeris, toRefaim, 21 toAmori, toKanaan, toGirgasi, ai toYebus.”