I Abram motulungi i Looti
14
1 Ni tempo etu, ria iba dua datu anu makuasa iamo i Amrafel datu lako i Sinear, i Ariok datu lako i Elasar, i Kedorlaomer datu lako i Elam, ai i Tideal datu lako i Goim. 2 Iba dua datu aretu mosintuwu sira mombeala moewa lima dua datu anu mosintuwu mbui iamo i Bera datu lako i Sodomo, i Birsa datu lako i Gomora, i Sinab datu lako i Adma, i Semeber datu lako i Seboim, ai datu lako i Bela anu rauli mbui Soar. 3-4 I rarana sampulu rompae, lima dua datu aretu naparenta sira ni Datu Kedorlaomer. Agaiana i pae kasampulu toluna poparenta ni Datu Kedorlaomer, bariamo sira madota naparenta, meewamo sira si ia. Etumo mpane ni pae kasampulu toluna etu, lima dua datu aretu mosintuwumo sira ai mogulu sira surudadora i lembo Sidim, anu ei-ei mewalimo Tasi Mate. 5 I kasampulu iba mpaena, Datu Kedorlaomer ai sinangka datu samposintuwuna, dongka sira moewa lima dua datu aretu. Rapepuura mombeala moewa basangkia ntina ntanina anu mabose. Mpolinguruna monangi sira toRefaim i Asiterot-Karnaim, toSusim i Ham, toEmim i Sawe-Kiryataim, 6 ai toHori anu meari i bulu-bulu Edom anu rauli mbui Seir. ToHori etu rawulai sira, duduura dongka i El-Paran i wiwi pada lori. 7 Roo sira mewulai, mesola sira lau i En-Mispat anu ei-ei rasanga Kades, mpane makuasa sira i tana Amale ai monangi sira toAmori anu meari i Haseson-Tamar.8 Tongona ewa etu, datu anu lako i Sodomo, Gomora, Adma, Seboim ai lako i Bela, roomo sira moatoro surudadora i lembo Sidim, mpane mombeala 9 moewa lima dua datu anu lako i Elam, Goim, Sinear, Elasar, mewali lima dua datu moewa iba dua datu. 10 I lembo Sidim etu, nakariangi maisi tibubu anu moisi aspal, mewali awetu datu lako i Sodomo ai i Gomora melangka, manawu sira i rara nu tibubu aretu, agaiana tolu dua datu anu ntanina, baria sira mangkia-ngkia, melangka sira lau i bulu. 11 Iba datu anu menangi etu, mamperampai sira ope-ope anu-anu, anu ria i Sodomo ai Gomora tepesua pangkoni. 12 Ratawanira mbui i Looti pinoana ni Abram, simbela-mbela ai ope-ope anu-anuna, lawi i Looti meari i Sodomo.
13 Agaiana ria sadua anu melangka, anu baria rasumbara ratawanira, mewali ia etumo anu mampetumbui si Abram toIbrani etu, kaapana anu mewali. I Abram meari ia i penombaa gompi i puu-puu nu kau anu mabose, pearia penombaa etu anu ni Mamre sadua toAmori. I Mamre ai pokana sira iamo i Eskol ai i Aner, sira aretu simada ni Abram. 14 Awetu naepe ni Abram pinoanana etu ratawani, nagulu ope-ope tauna anu mapande mombeala, kaisira tolu atu sampulu walu dua, mpane sira mowulai iba dua datu aretu, duduuna dongka i kota Dan. 15 Ni se etu nagaa-gaa ni Abram nu tauna sira, mewali basangkia gaara, mpane awetu i kawengina, rabungkara iwalira, mewali iwalira etu manangi sira. Rawulaira iwalira etu, duduuna dongka i Hoba mbai moure kota Damsik. 16 Sinangka anu-anu, anu nirampaki nu iwalira etu rarampakira mpesola, awetu mbui i Looti ai sinangka anu-anuna, tepesua mbui towawine sira, ai tau anu ntanina anu nitawani nu iwalira.
I Melkisedek mowati i Abram
17 Awetu i Abram roo mombeala monangi Datu Kedorlaomer ai datu-datu samposintuwuna. Mesolamo ia mpane nadupa ia nu datu nu toSodomo i lembo Sawe anu rauli mbui Lembo Datu. 18 Mpane i Melkisedek datu Salema anu mewali tadulako menomba si Pue Ala anu makuasa, mangkeni ia roti ai anggoro nakenika i Abram. 19 Mpane ia mowati i Abram, nauli, “Kuperade si Pue Ala anu moteru langi ai dunia bona mowati iko! 20 Tetoia i Pue Ala anu makuasa anu mokiraka iko penangi lako i iwalimu.” Roo awetu i Abram mosusu si Melkisedek sampulu parasee lako i sinangka anu-anu, anu rarampakira mpesola mai.
21 Roo awetu, nauli nu datu toSodomo si Abram, “Doamode anu-anu anu rarampaki etu, agaiana kuperade bona bula raramu mampopesola ope-ope tauku sira anu kuparenta.”
22 Agaiana nauli ni Abram, “Modandi aku i lio ni PUE anu makuasa, anu moteru langi ai dunia, 23 baria ina kudoa mogalo saudi sinangka anu-anumu, nauda mogalo sambotu lero ba sambotu soo nu sandale, bona baria iko ina pensani manguli ka ikona anu mopakapebuku aku. 24 Baria aku madota mandoa ba mogalo apa lako i anu-anumu bona kutumpui. Anu kudoko batena ngkida apa anu nakonimo nu tauku sira. Agaiana ewa samposintuwuku sira, ewa i Aner, i Eskol, ai i Mamre, kuperade bona pensani sira mandoa tibora.”