I Abram ai i Looti mogaa
13
1 Tempo ni Abram mensuwu lako i tana Masiri, lau monontosi tana Negeb simbela-mbela ia towawinena ai sinangka anu-anura, i Looti meula mbui si sira. 2 I Abram tau anu pebuku mpii, ria dimbana, towauna, japina, mpane ria mbui pera ai bulawana. 3 Lako i tana Negeb, i Abram molumako lako i pearia sambua, melimba lau i pearia sambuana monontosi kota Betel ai kota Ai, pobambaruana ni banimpia, 4 i potunuana popenombana ni banimpia. Ni se etumo ia menomba si PUE.5 I Looti, towawinena ai anana sira meula mbui si Abram. Ai mangkeni mbui ia dimbana, towauna, japina, batuana sira, ai bambaruna. 6 Etumo mpane tana i se etu, baria sondo padana rapeariira rodua, lawi pinatuwura maisi gaga. 7 Mewali, sambela tempo, toporewu ni Abram ai toporewu ni Looti, mobungka sira. I tempo etu toKanaan ai toFeris meari mani i se etu. 8 Nakenimpobungka nu toporewura, nauli ni Abram si Looti, “Kita ei tau anu mopoka, baria malompe toporewumu ai toporewuku mobungka. 9 Mewali ane malompe, mogaa ngkimo kita. Ope-ope tana ei pensani nupearii. Ane iko lau i se etu, aku lau i pearia anu ntanina.”
10 Nalelewi ni Looti, naita lembo Yarade dongka i kota Soar. Lembo etu maisi uena ewa ue anu ria i bonde Paradesi,a ai ewa karudu nu tana Masiri. (Etu mewali lako baria mani nagero ni PUE kota Sodomo ai Gomora). 11 Kasopoana napelisi ni Looti anu napearii, iamo ope-ope lembo Yarade, mewali laumo ia i se etu. Ewa etumo lolitakana i Abram ai i Looti mogaa. 12 I Abram baria ia melimba lako i tana Kanaan, agaiana i Looti mobabei ia bambaruna i lembo, gompi i kota Sodomo. 13 Kota Sodomo etu napearii nu tau anu maruminsi kadaana babeiara, madosa sira si PUE.
I Abram melimba lau i Hebron
14 Awetu i Looti lambumo lako i tana Kanaan, nauli ni PUE si Abram, “Lako i peongkoamu ei, nutotoki ngkarao lau leli-leli. 15 Ope-ope tana anu nuita aretu, ina Kukiraka iko ai pemuleamu sira bona nitumpui duduuna kasae-saeana, 16 ai ina Kupopemule-mule iko, bona pemuleamu baria pensani raimba kaisira. Adiwa kabariana pensani awu nu tana raimba, awetu mbui kaworira pemuleamu. 17 Ei-ei, lumakoimode ope-ope tana ei, lawi ina Kukirakamo iko.” 18 Roo awetu, i Abram molimba bambaruna, mpane meari ia i penombaa i puu-puu nu kau anu mabose, anu ratuda i Mamre gompi i Hebron. Ni se etumo nawangu saogu potunua popenomba, napake menomba si PUE.