I Abram naronde ni Pue
12
1 I PUE mongkora si Abram, Nauli, “Palengimode tanamu, pokamu sira, tombi nu tuamamu, mpane laumode i tana anu ina Kutudoka iko.2 Ina maisi pemuleamu,
ai pemuleamu aretu ina memule-mule sira.
Ina Kuwati iko, ai sangamu ina tolele i sumalele dunia,
ai iko ina mewali pewati.
3 Ina Kuwati tau sira anu mowati iko,
ai ima anu mogane iko, tau etu mbui ina Kugane.
Ai nakeningka ikona,
ina Kuwati ope-ope tau i dunia.”
4-5 I Abram mopalengi tana Haran, sintoto ai sawaa ni PUE si ia. Tinuwuna pitu mpulu lima mpae. Mangoka ia lau i tana Kanaan, simbela-mbela ai i Sarai towawinena, i Looti pinoanana, awetu mbui sinangka anu-anuna, batuana sira anu nasumba i tana Haran ope sira nakeni. Awetu sira dongka i tana Kanaan, 6 naparesa ni Abram tana etu, duduuna teduu ia i kau mabose i tana anu rasanga More, gompi i kota Sikem. (Ni tempo etu toKanaan meari mani sira i pearia etu.)
7 Mewali ni tempo etumo, i PUE mampatongawa si Abram, mpane mololita, Nauli, “Eimo tana anu ina Kukiraka pemuleamu.” Mewali ni se etu, i Abram mobabeimo sambua potunua popenombana si PUE, anu mampatongawamo si ia. 8 Roo awetu napapulo polumakoana mbai monsau, i pearia anu mobulu-bulu mbai mataeo kota Betel. Ni se etu nababei saogu bambaru i olo nu kota Betel ai kota Ai. Betel mbai kalimpaa eo, mpane Ai mbai mataeo. Ni se etu mbui nababei saogu potunua popenomba, mpane menomba ia si PUE. 9 Roo etu rapapulora mbui polumakoara, lau sira monontosi tana Negeb mbai monsau tana Kanaan.
I Abram i tana Masiri
10 Agaiana ni tempona meari ni tana Kanaan, tana Kanaan narumpa nu tempo maoro anu maruminsi. Etumo mpane napapulo mbuimo polumakoana mbai monsau tana Kanaan bona meari ia i tana Masiri mewali tosandarena. 11 Awetu ina mesuamo sira i tana Masiri, mololita ia i towawinena i Sarai, nauli, “Iko etu melumbu peraemu. 12 Ane raita iko nu toMasiri, manotomo luwu karaulira iko etu towawineku, mewali nakeni nu peraemu, sangangaa rapopatera aku, mpane iko ina rakadipurakara lompe. 13 Mewali malompe mani, ane nuuli iko etu toiku, bona baria aku rapopatera, ai bona rakadipurakara lompe aku, nakeningka ikona.”
14 Mewali awetu sira mesua i tana Masiri, raita nu toMasiri i Sarai melumbu mpii peraena. 15 Basangkia sira anu mobago i tombi kadatua, raitara i Sarai melumbu mpii peraena, mewali lau sira si datu, rapadongkara si datu kariana towawine anu merae mpii. Etumo mpane napoperonde ni datu bona rakenira ia mesua i rara nu tombi kadatuana. 16 Nakeningka i Saraina, datu i Masiri mokadipuraka lompe i Abram, mpane nakiraka i Abram dimba, towau, japi, kalide ai onta, ai batua tomoane ai towawine.
17 Agaiana nakeningka nidoa ni datu i Sarai, napoposaki ni PUE tau anu ria i tombi kadatua etu. 18 Etumo mpane, naronde ni datu i Abram mpane napekune, nauli, “Apa tunggaiamu mpane nubabei ewa ei? Mangkiada mpane nuwunikai katowawinemu ia? 19 Mangkiada mpane nuulida toimu ia, mpane nupatumbeika kudoa kupopewali towawineku? Ei towawinemu, doamode mpane kalambumode komi!” 20 Mewali naposawaakamo ni datu basangkia dua sira tauna anu mobago i tombi kadatua etu, bona lau sira mopatiati i Abram ai towawinena. Mewali malambu mpuumo sira lako i tana Masiri, rakeniramo ope-ope anu-anura.