Solompio i Babeli
11
1 Mpolinguruna ope-ope tau i dunia, basara simbela asa. 2 Awetu lau sira mbai mataeo, rasumbara sambua lembo i tana Sinear, mpane i se etumo sira meari. 3 Mololita sira sadua i tosaduana, raulira, “Hia, mobabei kita watu tela, mpane tatunu duduuna makoo.” Rababeira mpuumo watu tela etu, mpane rapatimamara taru anu ina rapopodaira watu tela etu. 4 Raulira, “Hia, tawangumo sambua kota anu solompiona dongka i langi wuntuna, bona tepakabose kita ai sangata tolele, ai baria kita masawu-sawu i sumalele dunia.” 5 Tongora mowangu kota ai solompiona etu, mendolumo i PUE mampeita apa anu nababei nu manusia aretu. 6 Mewali mongkora i PUE, Nauli, “Sira ei tau santina, ai basara sampangka, ai anu rababeira ei pepuuaana lako i apa anu rapepekirira. Ane rapatumbeika liliu sira, baria luwu masae ina rabukura mobabei apa ngkida peundea nu pekirira. 7 Aginamo mendolumo Kita, Tapoposisisala basara, bona basa nu tosaduana baria nainsani nu tosaduana.” 8 Ewa etumo, i PUE mosawu-sawu sira i sumalele dunia, ai mengkaroomo sira mowangu kota etu. 9 Etumo mpane kota etu rasanga Babeli,a lawi i se etu i PUE mampopontani-ntani basara ai Nasawu-sawu sira i sumalele dunia.Pemulea ni Sem
10 Eimo pemulea ni Sem. Rompae lako i karoonamo dunia ei nalaboa nu ue, awetu tinuwu ni Sem sangatu mpae, mampemuleka ia sadua tomoane, sangana i Arpaksad. 11 Roo ia mampemuleka i Arpaksad, tuwu mani ia lima atu mpae, ai ria mani mbui anana anu ntanina. 12 Tempona tinuwu ni Arpaksad tolu mpulu lima mpae, mampemuleka ia sadua tomoane, sangana i Sela. 13 Roo ia mampemuleka i Sela, tuwu mani ia iba atu tolu mpae, ai ria mani mbui anana anu ntanina.
14 Tempona tinuwu ni Sela tolu mpulu mpae, mampemuleka ia sadua tomoane, sangana i Eber. 15 Roo ia mampemuleka i Eber, tuwu mani ia iba atu tolu mpae, ai ria mani mbui anana anu ntanina.
16 Tempona tinuwu ni Eber tolu mpulu iba mpae, mampemuleka ia sadua tomoane, sangana i Peleg. 17 Roo ia mampemuleka i Peleg, tuwu mani ia iba atu tolu mpulu mpae, ai ria mani mbui anana anu ntanina.
18 Tempona tinuwu ni Peleg tolu mpulu mpae, mampemuleka ia tomoane, sangana i Rehu. 19 Roo ia mampemuleka i Rehu, tuwu mani ia rongatu sasio mpae, ai ria mani mbui anana anu ntanina.
20 Tempona tinuwu ni Rehu tolu mpulu rompae, mampemuleka ia sadua tomoane, sangana i Serug. 21 Roo ia mampemuleka i Serug, tuwu mani ia rongatu pitu mpae, ai ria mani mbui anana anu ntanina.
22 Tempona tinuwu ni Serug tolu mpulu mpae, mampemuleka ia sadua tomoane, sangana i Nahor. 23 Roo ia mampemuleka i Nahor, tuwu mani ia rongatu mpae, ai ria mani mbui anana anu ntanina.
24 Tempona tinuwu ni Nahor rompulu sasio mpae, mampemuleka ia sadua tomoane, sangana i Tera. 25 Roo ia mampemuleka i Tera, tuwu mani ia sangatu sampulu sasio mpae, ai ria mani mbui anana anu ntanina.
26 Tempona tinuwu ni Tera pitu mpulu mpae, mampemuleka ia tolu dua tomoane, sangara iamo i Abram, i Nahor, ai i Haran.
Pemulea ni Tera
27 Eimo pemulea ni Tera. I Tera tuama ni Abram, Nahor, ai i Haran. I Haran mampemuleka tomoane sangana i Looti. 28 I Haran mamate i tana kabubua nu raana iamo i kota Ur i Babeli, tempona tuamana tuwu mani. 29 I Abram mosamboko i Sarai, mpane i Nahor mosamboko i Milka ana ni Haran. Ai i Haran ria mani anana anu ntanina, sangana i Yiska. 30 Agaiana i Sarai malalo.
31 I Tera ai anana i Abram, ai tumpuna i Looti, awetu mbui i Sarai towawine ni Abram simbela-mbela sira lambu lako i kota Ur i Babeli. Tunggaiara ina lau sira i tana Kanaan. Agaiana awetu sira dongka i Haran, meari sira i se etu. 32 Tempora meari ni Haran, i Tera tuamara mamate. Tinuwuna rongatu lima mpae.