Pemulea nu ana ni Noho
10
1 Eimo pemulea nu ana ni Noho anu rasanga i Sem, i Ham ai i Yafet. Awetu roomo dunia ei nalaboa nu ue, memule sira, anara tomoane iamo:2 I Yafet mampemuleka i Gomer, i Magog, i Madai, i Yawan, i Tubal, i Mesek, ai i Tiras. 3 Pemulea ni Gomer iamo toAskenas, toRifat ai toTogarma. 4 Pemulea ni Yawan iamo toElisa, toSpanyol,a toSiprus,b ai toRodes. 5 Sira etumo ulububu nu tau anu meari i wiwi nu tasi, ai i lewuto-lewuto. Aretu asamo sira pemulea ni Yafet, santina-santina sira meari sira i tanara saduduara, ai montani-ntani basara.
6 Pemulea ni Ham iamo i Kus, i Masiri, i Libia ai i Kanaan. 7 Pemulea ni Kus iamo toSeba, toHawila, toSabta, toRaema, toSabiteka, ai pemulea ni Raema, iamo toSyeba ai toDedan. 8 I Kus anana tomoane sangana i Nimrod. I Nimrodmo anu mpolinguruna mewali tau anu maroso i dunia. 9 Nakenimpetulungi ni PUE, i Nimrod mewali topoasu anu mapande, etumo mpane nauli nu tau, “Kusarumaka bona mewali iko ewa i Nimrod.” 10 Mpolinguruna kadatuana iamo kota Babeli, kota Erek ai kota Akad anu ria i tana Sinear. 11 Lako i tana etu, i Nimrod lau i tana Asur, mpane ia mowangu kota Niniwe, Rehobot-Ir, Kala, 12 ai kota Resen anu ria i olo nu kota Niniwe ai Kala. Aretumo kota-kota anu mabose. 13 Pemulea ni Masiri iamo toLidia, toAnamim, toLehabim, toNaftuhim, 14 toPatrusim, toKasluhim, ai toKapitorim. ToKasluhim etumo ulububu nu toPelisiti.
15 Ana ni Kanaan anu torapowutu rasanga i Sidon, anu torapotoi i Het. 16 I Kanaan etu mbui anu mewali ulububu nu toYebusi, toAmori, toGirgasi, 17 toHewi, toArki, toSini, 18 toAwadi, toSemari, ai toHamati. Sira aretumo anu masawu duduuna tanara maemba. 19 Tompo nu tanara, mepuu lako i kota Sidon duduuna dongka i tana Gerar ai Gasa mbai monsau, mpane mbai mataeo, tompo nu tanara dongka-dongka i kota Sodomo, Gomora, Adma, Seboim, duduuna gompi i kota Lasa.
20 Sira etumo pemulea ni Ham. Santina-santina sira meari i tanara, mpane basara montani-ntani. 21 I Sem powutu ni Yafet, iamo ulububu nu ope-ope toIbrani. 22 Pemulea ni Sem iamo i Elam, i Asur, i Arpaksad, i Lud ai i Aram. 23 Pemulea ni Aram iamo toUs, toHul, toGeter, ai toMas. 24 I Arpaksad mampemuleka i Sela, mpane i Sela mampemuleka i Eber.c 25 Ana ni Eber rodua tomoane, torapowutu rasanga i Peleg,d lawi ni tempo etu, i dunia ei tau tetibo-tibo sira mangula basara. Anu torapotoi sangana i Yoktan. 26 Pemulea ni Yoktan iamo toAlmodad, toSelef, toHasar-Mawed, toYerah, 27 toHadoram, toUsal, toDikla, 28 toObal, toAbimael, toSeba, 29 toOpir, toHawila ai toYobab. Ope-opena aretu pemulea ni Yoktan. 30 Pariolo nu tanara mepuu lako i tana Mesa duduuna dongka i tana Separ anu mobulu-bulu mbai mataeo. 31 Sira aretumo pemulea ni Sem, meari sira santina-santina i tanara, ai basara montani-ntani. 32 Etumo sira pemulea ni Noho, anu mampemuleka santina-santina tau i dunia ei, awetu roomo dunia ei nagero ni Pue Ala ai ue.