Dandi ni Pue Ala si Noho
9
1 Roo awetu, i Pue Ala mowati i Noho simbela-mbela ai anana sira, Nauli, “Pemule-mulemode komi, duduuna maisi pemuleami bona buke dunia ei. 2 Sinangka binata, malompe tosi, malompe anu i rara ue, awetu mbui anu i lore, ina maeka si komi. Sinangka binata aretu, Kukiraka komi bona nikuasai. 3 Ope-opena etu Kukiraka si komi mewali pangkonimi. Awetu mbui ewa pinambula sira anu malewau. 4 Ngkalina ngkida anu baria pensani nikoni iamo bau anu keraa mani, lawi katuwu ria i rara nu raa.a 5 Ima ngkida tau ba binata anu mampopate manusia ina rasuku mamate. 6 Manusia rateru ina simbela ai Aku, etumo mpane ima anu mampopate singka manusiana, ia mbui ina napopate nu singka manusiana. 7 Mewali sangangaa memule-mule komi bona pemuleami maisi i dunia.”8 Roo awetu, mongkora mbuimo i Pue Ala si Noho ai i anana sira, Nauli, 9 “Ei-ei modandi Aku si iko ai i pemuleamu sira, 10 ai i sinangka binata anu tuwu, ewa tosi, ai binata anu i lore, anu mensuwu simbela-mbela ai iko lako i rara nu kapala mai. 11 Eimo dandiKu si komi: sinangka anu tuwu i dunia, bariamo ina Kupakaropu ai ue. Lawi ane ria mani dunia ei, bariamo ina Kugero ai ue. 12 Ei-ei ina Kupatongawa dandiKu anu baria mokasopoa si komi ai i sinangka anu tuwu i dunia. 13 Ina Kuparia mparagia i gawu, mewali sambua katongawaana podandiKu i manusia anu ria i dunia. 14 Bela-belana Kutuko langi ai gawu, batena ngkida mparagia etu raita, 15 ina Kukaendo dandiKu si komi, ai i sinangka anu tuwu i dunia, baria ina malinga raraKu. 16 Awetu Kuita mparagia, batena ngkida ina Kukaendo dandiKu anu baria mokasopoa i sinangka anu tuwu i dunia. 17 Etumo katongawaana dandiKu i sinangka anu tuwu i dunia.”
I Noho ai anana sira
18 Ana ni Noho pensuwura lako ni rara nu kapala mai iamo i Sem, i Ham ai i Yafet. (I Ham iamo tuama ni Kanaan). 19 Ana ni Noho anu tolu dua aretu, siramo ulububu nu sinangka tau i dunia. 20 I Noho sadua topobonde, iamo anu mpolinguruna motuda anggoro. 21 Sambela tempo, i Noho manginu anggoro duduuna malangu. Nakeningkalanguna, nalonsu ope-ope pesampina, mpane lau ia maturu i rara nu bambaruna. 22 Awetu naita ni Ham peloa nu tuamana, lau naulika i Sem ai i Yafet. 23 Awetu napadongka ni Ham peloa nu tuamara, i Sem ai i Yafet mandoa santau juba, raposampara mpane molumako ntaliku sira mesua i rara nu bambaru nu tuamara. I tempora mokomoi tuamara petotokira i pearia anu ntanina, baria sira pebai mototoki tuamara. 24 Awetu matonto kalanguna, ai nainsanimo kaadiwana babeia nu anana anu torapotoi si ia, 25 nauli ni Noho,
“Nakeni nu babeia ni Ham, i Kanaan sangangaa tegane!
Sira ina mewali batua nu poka-pokana,
mewali batua anu tepaiwoi mpii.”
26 Mpane nauli mbui ni Noho,
“Toia i PUE anu napenombai ni Sem!
Agaiana i Kanaan ina mewali batua ni Sem.
27 Kuperade si Pue Ala,
bona Napakaemba pearia ni Yafet,
pemuleana meari sira simbela-mbela ai pemulea ni Sem,
agaiana i Kanaan ina mewali batua ni Yafet.”