Ue makunsu liliu duduuna lore mabangimo
8
1 I Noho ai sinangka anu ria i kapala etu, batena i rara mpekambi ni Pue Ala. Etumo mpane napariamo ni Pue Ala pambui bona mowui-wui ue duduuna kalalaua makunsu. 2 Ope-ope mata ue anu i woi dunia mai, ai anu i langi mai, natuko asa ni Pue Ala. Mengkaroomo uda, 3 ai awetu liumo sangatu lima mpulu eo, ue kalalauamo makunsu. 4 Mewali i kasampulu pitu eona ni wula kapitu, kapala etu tesompe i sambua wowo nu bulu anu rasanga Ararat. 5 Awetu ni eo kaisa wula kasampulu, wowo-wowo nu bulu raitamo lawi ue kalalauamo makunsu.6 Awetu liumo iba mpulu eo, nabungkasimo ni Noho sambua pelogaa i kapala etu, 7 mpane napawia sambaa tosi kaloa, agaiana tosi kaloa etu baria ia mesola i kapala etu, wule meloko wilau wimai duduuna ue makunsu mpiimo luwu. 8 Roo awetu, napawia mbui sambaa tosi manggebodo bona nainsani ba makunsu mpii mpuumo ue ba baria mani. 9 Agaiana lawi ue baria mani makunsu mpii, manggebodo etu baria ia pensani memua, etumo mpane mesola mpesola mai manggebodo etu i kapala. Mewali, naona ni Noho palena modoko nu tosi manggebodo etu, napopesua i rara nu kapala etu. 10 Mepuu lako ni se etu, napetumaka mani ni Noho pitu eo, mpane napawia mpesola tosi manggebodo etu, 11 ai awetu eo ina malimpamo, tosi manggebodo etu mesola mpesola mai, mamposama ia sampeka tawe nu kau saitun anu mabou mani. Manotomo i rara ni Noho kamakunsuna mpiimo ue. 12 Kaliliuana lako ni se etu, napegia mani mbui ni Noho pitu eo, mpane lako napawia mbuida manggebodo etu, agaiana tosi etu bariamo mesola.
13 Ni eo kaisa wula kaisa, ue makunsu mpiimo, ni tempo etu tinuwu ni Noho aono atu sampae. Mewali nabungkasimo ni Noho ata nu kapala etu, naita tana mabangimo. 14 Ni eo karompulu pitu wula kadua, dunia mabangimo.
15 Mewali mongkoramo i Pue Ala si Noho, Nauli, 16 “Pensuwumode lako i rara nu kapala etu, simbela-mbela ai towawinemu, anamu sira ai towawinera, 17 mpane nupopensuwu mbui sinangka tosi ai binata anu ria i rara nu kapalamu, bona pensani sira memule-mule i sumalele dunia.” 18 Mensuwu mpuumo i Noho sampoanakara lako i rara nu kapala etu. 19 Awetu mbui sinangka tosi ai binata anu ria i rara nu kapala etu, mensuwu sira sampangka-sampangka mangula pangka-pangkana.
I Noho mosusu popenombana si Pue
20 Awetu i Noho mensuwu mai lako i kapala, nawangu sambua potunua popenomba si PUE, mpane nadoa sinangka tosi ai binata anu baria rapalia napopenomba si PUE, natunu i potunua popenomba etu. 21 Popenomba ni Noho ni tempo etu nadoko ni PUE, etumo mpane nabotusi ni PUE, nauli nu raraNa,
“Bariamo ina Kusuku dunia ei
nakeningkadaana babeia nu manusia,
naudapae mepuu lako kokoi sira madaa pekirira,
bariamo ina Kupakaropu sinangka anu tuwu i dunia,
ewa anu lako naroo nipopewaliKu ei.
22 Ane ria mani dunia ei,
batena ngkida ria tempona mantuda,
ai ria tempona mopupu wua anu ratuda,
ria tempona malengi,
ria tempona marameda,
ria tempona keuda,
ria tempona keeo,
ai batena ria mabaa ai kawengi.”