Ue mopakaiwu dunia
7
1 Mewali ni tempo etu, mongkoramo i PUE si Noho, Nauli, “I olo nu tau i dunia ei, iko ngkida tau anu mampeulai peundeaKu. Mewali pesuamode komi santina i rara nu kapala etu. 2-3 Mpane nupopesua mbui sinangka tosi ai binata ntanina anu baria rapalia pitu mboko lako i pangka-pangkana, ane anu rapalia samboko ngkida lako i pangka-pangkana. Nupeulaimo anu Kuuli ei bona sinangka-nangkana, baria sira tuna ai bona memule-mule sira. 4 Lawi pitu eo mani ina Kupopendolumo uda, i rarana iba mpulu eo iba mpulu mbengi kasaena, bona sinangka anu tuwu i dunia anu niteruKumo, ope sira tuna.” 5 Ope-ope anu nasawaaka ia ni PUE napeulai asa.6 Tempona ue molaboa dunia, tinuwu ni Noho aono atu mpae. 7 Mewali i Noho ai towawinena, anana sira ai towawinera, mesuamo sira i rara nu kapala etu, bona baria sira napakaiwu nu ue. 8-9 Sambaa ntuama ai sambaa ntina lako i pangka-pangkana tosi ai binata ntanina malompe anu baria rapalia ewa etu mbui anu rapalia mesua i rara nu kapala simbela-mbela ai i Noho, sintoto ai sawaa ni Pue Ala. 10 Awetu kapitu eona lako i pongkora ni PUE si Noho, dongkamo ue mabose mopakaiwu dunia.
11 Awetu tinuwu ni Noho, aono atu mpae, ni eo kasampulu pitu wula kadua, sinangka mata ue tebungkasi lako i rara nu tana mai, 12 ai mendolumo uda i rarana iba mpulu eo iba mpulu mbengi kasaena. 13 Ni eo etu mbui i Noho mesua i rara nu kapala etu, simbela-mbela ai tolu anana, iamo i Sem, i Ham ai i Yafet, simbela-mbela ai towawinera. 14 Simbela-mbela ai sira, mesua mbui tosi ai binata anu ntanina, malompe anu manondo, awetu mbui anu maila anu mabose ai anu kokoi. 15 Sambaa ntuama, sambaa ntina lako i pangka-pangkana binata, mesua i rara nu kapala, simbela-mbela ai i Noho, sintoto ai sawaa ni PUE 16 Awetu opemo sira mesua, natuko ni PUE boboka nu kapala etu.
17-18 Mewali i rarana iba mpulu eo iba mpulu mbengi, ue kalalauamo tetambai pemponena. Etumo mpane kapala etu motinantomo i wongko ue. 19 Nakeningkatetambaina liliu ue etu, sinangka bulu anu mawane maiwumo napakaiwu nu ue. 20 Kawane nu ue ni tempo etu pitu mete lako i wowo nu bulu anu mawane mpii. 21-23 Ewa etumo i Pue Ala mopakatuna sinangka anu tuwu i dunia, mepuu lako i manusia, duduuna dongka i sinangka binata, malompe anu tuwu i laerawa, malompe anu tuwu i tana. Batena i Noho ai sinangka anu ria simbela-mbela ai ia i rara nu kapala etu, anu tuwu. 24 I rarana sangatu lima mpulu eo, ue baria makunsu mopakaiwu dunia ei.