Kadaa nu manusia
6
1 Awetu manusia tetambai kaisina i sumalele dunia, mampemuleka sira anara towawine. 2 Ana ni Pue Ala,a mangita anantowawine nu manusia aretu merae, etumo mpane radoara rapotombikara, ima ngkida anu raundera.3 Mewali mepuu lako ni se etu, mongkoramo i PUE, Nauli, “InosaKu bariamo ina ria liliu i manusia duduuna kasae-saeana, batena ngkida sira ina mamate, ai tinuwura baria ina melumbu lako i sangatu rompulu mpae.” 4 Ni tempo lako baria mani ue molaboa dunia ai awetu liumo, riamo manusia anu mabose ai mawane mpii i dunia, sira etumo pemulea nu ana ni Pue Ala anu mosamboko ai anantowawine ana nu manusia. Pemuleara etumo anu mewali tadulako-tadulako anu maroso, anu tolele ai anu teadai ni tempo banimpia.
5 Naita ni PUE maruminsi kadaa nu tau i dunia, ope-ope pampekirira baria ria anu malompe. 6 Mewali i PUE menonso moteru ai mampopeari sira i dunia, mawiora raraNa. 7 Etumo mpane nabotusi ni PUE, Nauli, “Ina Kupakaropu manusia anu roomo Kuteru rindou, awetu mbui sinangka tosi ai binata anu meari i lore, lawi menonso Aku moterumo sira.” 8 Agaiana, batena i Noho ngkida anu mopakatono rara ni PUE.
I Noho
9-10 Eimo lolitaka ni Noho. Anana tolu paka tomoane, sangara i Sem, i Ham ai i Yafet. I Noho tau anu manoto rarana, baria madaa babeiana, katuwuna mosintuwu ai i Pue Ala. 11 Agaiana ope-ope tau ntanina madaa sira i petotoki ni Pue Ala, lawi imba-imba ngkida naita ni Pue Ala kamasekera. 12 I Pue Ala mangita dunia ei buke kadaa ngkida, lawi ope-ope manusia mangula peundea nu rarara anu madaa.
13 Mewali mongkora i Pue Ala si Noho, Nauli, “Roomo Kubotusi, ina Kupakaropu manusia ai sinangka binata anu ria i dunia, lawi dunia buke ai babeia nu manusia anu madaa. 14 Babeimode kapala lako i kau anu maroso, mpane nubabei mbui lonta-lonta i rarana, mpane i raoana ai i rarana, sangangaa nutaru. 15 Karate nu kapala etu, nubabei sangatu tolu mpulu tolu mete, kabosena rompulu romete, kawanena sampulu tolu mete. 16 Nubabei atana, mpane olo nu ata ai rindina sangangaa iba mpulu iba senti mete, kapala etu nubabei tolu unsu. Nubabei mbui bobokana mbai tumpipina. 17 Lawi ina Kuparia ue anu ina molaboa dunia bona mopakatuna ope-ope anu tuwu i dunia. 18 Agaiana kono si iko ina Kubabei podandi. Mesua iko luwu i rara nu kapala etu simbela-mbela ai towawinemu, awetu mbui anamu sira ai towawinera. 19-20 Sangangaa nupopesua i rara nu kapalamu etu, samboko-samboko tosi ai binata anu meari i lore, bona baria sira matuna. 21 Nukeni mbui mampopengaa pangkoni, malompe pangkonimi, awetu mbui pangkoni nu binata aretu.” 22 Ope-ope anu nasawaaka ni Pue Ala si ia, napeulai asa.