Pemulea ni Adama
5
1 Eimo lolitakana pemulea ni Adama. Tempo ni Pue Ala moteru manusia, Nateru sira ina simbela ewa Ia. 2 Manusia etu Nateru tomoane ai towawine. Nawati sira mpane Nasanga, “Manusia”. 3 Awetu tinuwu ni Adama sangatu tolu mpulu mpae, mampemulekamo sira sadua tomoane, lensena ina simbela ai tuamana, anara etu rasangara i Set. 4 Mepuu lako ni se etu, i Adama tuwu mani walu atu mpae, ai ria mani mbui basangkia anara anu ntanina tomoane ai towawine. 5 Tinuwu ni Adama sasio atu tolu mpulu mpae, lako mamateda ia.6 Awetu tinuwu ni Set sangatu lima mpae, mampemuleka ia sadua tomoane sangana i Enos. 7 Mpane tuwu mani i Set walu atu pitu mpae, ai ria mani anana anu ntanina. 8 Mewali tinuwu ni Set sasio atu sampulu rompae, lako mamateda ia.
9 Awetu tinuwu ni Enos sasio mpulu mpae, mampemuleka ia sadua tomoane sangana i Kenan. 10 Mpane tuwu mani i Enos walu atu sampulu lima mpae, ai ria mani anana anu ntanina. 11 Mewali tinuwu ni Enos sasio atu lima mpae, lako mamateda ia.
12 Awetu tinuwu ni Kenan pitu mpulu mpae, mampemuleka ia sadua tomoane sangana i Mahalaleel. 13 Mpane tuwu mani i Kenan walu atu iba mpulu mpae, ai ria mani anana anu ntanina. 14 Mewali tinuwu ni Kenan sasio atu sampulu mpae, lako mamateda ia.
15 Awetu tinuwu ni Mahalaleel aono mpulu lima mpae, mampemuleka ia sadua tomoane sangana i Yared. 16 Mpane tuwu mani i Mahalaleel walu atu tolu mpulu mpae, ai ria mani anana anu ntanina. 17 Mewali tinuwu ni Mahalaleel, walu atu sasio mpulu lima mpae, lako mamateda ia.
18 Awetu tinuwu ni Yared sangatu aono mpulu rompae, mampemuleka ia sadua tomoane sangana i Heno. 19 Mpane tuwu mani i Yared walu atu mpae, ai ria mani anana anu ntanina. 20 Mewali tinuwu ni Yared sasio atu aono mpulu rompae, lako mamateda ia.
21 Awetu tinuwu ni Heno aono mpulu lima mpae, mampemuleka ia sadua tomoane sangana i Metusala. 22 Mpane tuwu mani i Heno tolu atu mpae. Katuwuna mosintuwu ia ai i Pue Ala ai ria mani mbui anana anu ntanina. 23 Mewali tinuwu ni Heno tolu atu aono mpulu lima mpae. 24 Nakenimposintuwuna ai i Pue Ala, etumo mpane naore ia ni Pue Ala tuwu-tuwu.
25 Awetu tinuwu ni Metusala sangatu walu mpulu pitu mpae, mampemuleka ia sadua tomoane sangana i Lamek. 26 Mpane tuwu mani i Metusala pitu atu walu mpulu rompae, ai ria mani mbui anana anu ntanina. 27 Mewali tinuwu ni Metusala sasio atu aono mpulu sasio mpae, lako mamateda ia.
28 Awetu tinuwu ni Lamek sangatu walu mpulu rompae, mampemuleka ia sadua tomoane. 29 Ni tempo etu mololita ia, nauli, “Anakoi ei ina mopakalene kita, ane tempota mobago mantimi mampobago tana anu nagane ni PUE.” Etumo mpane i Lamek mosanga anana etu i Noho.a 30 Mpane tuwu mani i Lamek lima atu sasio mpulu lima mpae, ai ria mani mbui anana anu ntanina. 31 Mewali tinuwu ni Lamek pitu atu pitu mpulu pitu mpae, lako mamateda ia.
32 Awetu tinuwu ni Noho lima atu mpae, mampemuleka ia tolu dua tomoane, iamo i Sem, i Ham, ai i Yafet.