I Kai ai i Habeli
4
1 Posamboko ni Adama ai Hewa mampemuleka sira i Kai.a Ni tempo etu i Hewa mololita, nauli, “Nakenimpetulungi ni PUE si aku, moana aku sadua anakoi tomoane.” 2 Basangkia kasaena, moana mbuimo i Hewa sadua tomoane anu rasangara i Habeli. Mewali awetu sira mabosemo, i Habeli mewali toporewu dimba, ai i Kai mewali topobonde. 3 Sambela tempo, i Kai mangala sanggaa lako i wua nu tuda-tudana, mpane napopenomba si PUE. 4 Awetu mbui i Habeli mandoa sambaa ulu ana nu dimbana nasambale, mpane anu malompena mpii napopenomba si PUE. I Habeli ai popenombana nadoko ni PUE. 5 Agaiana i Kai ai popenombana baria nadoko ni PUE. Etumo mpane i Kai makoo liona ai maruminsi karumpuna.6 Mewali mololita i PUE si ia, nauli, “Mangkiada mpane makooda liomu ai marumpu iko? 7 Kamonsona ane malompe babeiamu, sangangaa matono iko. Agaiana ane baria iko mobabei babeia anu malompe, napari-pari nu dosa mokuasai raramu, mewali sangangaa nuewa duduuna nunangi.”
8 Roo awetu, nauli ni Kai si Habeli, “Maingko, lau kita i bonde.” Awetu sira dongka i bonde, narugii toina mpane napopate.
9 Mekune i PUE si Kai, nauli, “Imbara i Habeli toimu?”
Mesono i Kai, nauli, “Baria kuinsani, akudapae topokampai nu toiku?”
10 Nauli ni PUE, “Mangkiada mpane nubabei babeia anu madaa etu? Raa nu toimu anu mabubu i tana, meraroa si Aku bona babeiamu anu madaa etu ina Kusurungi. 11 Mewali ei-ei:
Teganemo iko, Kuliwumo iko lako i tana ei,
lawi tana ei nakabubuimo raa nu toimu anu nupopate.
12 Ane nu pantuda-ntudai tana ei,
tuda-tudamu baria ina mowua.
Sangangaa mewali iko topokakasao,
anu baria manoto peariamu i dunia.”
13 Mesono i Kai, nauli,
“Sukua etu mantimi gaga,
baria kubuku mokolo sukua etu.
14 Nuliwumo aku lako i pearia ei,
karao lako i lioMu.
Ina mewali aku topokakasao,
anu kaimba-imbaana baria manoto peariaku i dunia ei.
Mewali ima ngkida anu mampomberumpaka aku,
tau etu ina mampopate aku.”
15 Agaiana, nauli ni PUE, “Baria! Ane rapopate iko, tau anu mampopate iko etu ina mansumba pesuku pitu mbela karuminsina lako i apa anu nababeika iko.” Roo awetu, i PUE mamboli pampekatandai si Kai, bona sinangka tau anu momberumpa ai ia, baria sira ina pebai mampopate ia. 16 Roo awetu, lambumo i Kai lako i lio ni PUE, mpane meari ia i tana mbai mataeo bonde Paradesi, i tana anu rasanga “Nod”.
Pemulea ni Kai
17 Posamboko ni Kai ai towawinena, mampemuleka sira sadua tomoane anu rasanga i Heno. Roo awetu, i Kai mowangu sambua kota. Kota etu nasanga Heno simbela ai sanga nu anana etu. 18 I Heno mampemuleka i Irad, i Irad mampemuleka i Mehuyael, i Mehuyael, mampemuleka i Metusael, i Metusael mampemuleka i Lamek. 19 I Lamek rodua towawinena sangara i Ada ai i Sila. 20 I Ada mampemuleka i Yabal. Pemulea ni Yabal aretumo tau anu mamporewu binata, ai meari sira i bambaru anu rababeira lako i kolimba nu binata. 21 Toina rasanga i Yubal. Pemulea ni Yubal etumo anu mpolinguruna manginsani mokecapi ai motulali. 22 I Sila mampemuleka i Tubal-Kai, ai pemulea ni Tubal-Kai etumo anu mpolinguruna mobabei sinangka parewa anu lako i tambaga ai besi. Toi ni Tubal-Kai towawine, rasanga i Naama.
23 Sambela tempo, mololita i Lamek i rodua towawinena etu, nauli,
“Ada ai Sila nipetingai pololitaku!
Sadua anantomoane roomo kupopate,
lawi narugii ai nabelai aku.
24 Ane ria sadua tau mampopate i Kai,
rasurungi pitu mbela karuminsina.
Agaiana aku, ane rapopesiasi aku nu tau,
i tau etu ina rasurungi pitu mpulu pitu mbela karuminsina lako i pampopesiasina aku.”
I Set ai i Enos
25 I Adama ai i Hewa mampemuleka mani mbui sira sadua tomoane, mewali ni tempo etu, nauli ni Hewa, “Nakiraka aku ni Pue Ala sadua anaku, pasuru ni Habeli anu nipopate nu powutuna i Kai.” Etumo mpane anana etu nasanga i Set. 26 I Set mampemuleka sadua tomoane anu rasanga i Enos, ai ni tempo etumo, tau mepuu mokabelai sanga ni PUE ane tempora menomba.