Manusia manawu i rara dosa
3
1 Ule iamo binata anu mapande meakalangi lako i ope-ope binata, anu nateru ni PUE Ala. Ule etu mekune i towawine etu, nauli, “Mamonsopae, baria komi napaliu ni Pue Ala mangkoni sinangka wua nu kau anu ria i bonde ei?”2 Mesono towawine etu, nauli, “Baria mamonso, ope-ope wua nu kau anu ria i bonde ei, pensani kikoni, 3 ngkalina ngkida wua nu kau anu ria i tongo-tongo nu bonde ei, baria kami napaliu ni Pue Ala mangkoni wuana, ai baria pensani kipetui, lawi ane kipetui ba kikoni, sangangaa mamate kami.”
4 Mesono ule etu, nauli, “Etu baria mamonso. Baria komi ina mamate. 5 I Pue Ala manguli ewa etu, lawi Nainsani ane nikoni wua nu kau etu, pekirimi ina tebungkasi, ai ane tebungkasimo pekirimi, ina simbela komi ai i Pue Ala, ina niinsani mampopontani apa anu malompe ai apa anu madaa.”
6 Naita nu towawine etu, wua nu kau etu merae ai matomo rakoni. Nauli nu rarana, “Malompe mpuu ane kuinsani sinangka-nangkana.” Etumo mpane napupukimo wua nu kau etu mpane nakoni, ni tempo etu ria tomoanena simbela-mbela ai ia mewali nakiraka mbui tomoanena nakoni. 7 Awetu roomo rakonira wua nu kau etu, pekirira kasaliu tebungkasi, ai lako rainsanirada peloara. Etumo mpane mangala sira tawe nu kau ara rapopombedai-daira, rapopotukora wotora.
8 Awetu sindulaumo eo, raeperamo i PUE Ala molulumako i rara nu bonde etu, mewali mentawunimo sira i olo nu puu-puu nu kau, lawi rapekirira bona ntena sira naita ni PUE Ala. 9 Agaiana i PUE Ala moronde i Adama, Nauli, “Imbada iko?”
10 Mesono i Adama, nauli, “Awetu kuepe kariaMu i bonde ei, mewali maeka aku, lawi meloa aku, etumo mpane mentawuni aku.”
11 Napekune ni PUE Ala, “Ima anu mangulika iko peloamu? Babila nikonimumo wua nu kau anu baria Kupaliuka iko nukoni?”
12 Mesono i Adama, nauli, “Towawine anu Nukiraka aku kuporanga, iamo anu mokiraka aku wua nu kau etu, mpane kukoni.”
13 Napekune mbui ni PUE Ala i towawine etu, “Mangkiada mpane nubabei ewa etu?”
Mesono towawine etu, nauli, “Ule anu moakalangi aku, mpane kukoni wua nu kau etu.”
Pesuku ni Pue Ala
14 Roo awetu, i PUE Ala mololita i ule etu, Nauli,
“Nakeni nu babeiamu etu,
sangangaa rasuku iko.
Lako i ope-ope binata,
iko ngkida anu rasuku.
Mepuu ei-ei duduumu mamate,
sangangaa mendele iko ai taimu,
ai awu nu tana anu mewali pangkonimu.
15 Iko ai towawine etu, ina Kupopombeiwali komi.
Pemuleana ai pemuleamu mombekasisi sira.
Pemuleana ina morige woomu,a
mpane iko ina motilo todeana.”
16 Mpane mololita mbui i PUE Ala i towawine etu, Nauli,
“Ina Kutambai kaduana nuepe
i tempomu mampaiwoto ai i tempomu moana.
Agaiana nauda ewa etu nuepe,
batena ngkida nuunde sawoto-woto ai tomoanemu,
ai mengkoru iko si ia.”
17 Roo awetu, napololitaka ni PUE Ala i Adama, Nauli,
“Nakeningka nupeulaina lolita nu towawinemu,
mpane nukoni wua nu kau anu baria Kupaliuka iko nukoni, tana ei tegane.
Mewali sangangaa maruminsi pobagomu lako i tana ei duduumu mamate,
bona pensani nupansumbai pangkonimu anu sondo nupotuwu.
18 Owo ai dui ina tuwu i wongko nu tana,
tinuda anu tuwu saduduana i pada anu ina mewali pangkonimu.
19 Sangangaa mapari nuepe mobago,
mpane lako nusumbada pangkonimu.
Ewa etumo katuwumu duduumu mamate,
lawi lako i awu nu tana iko Kuteru,
ina mesola mpesola iko mewali awu nu tana.”
20 Lako ni se etu, i Adama mosanga towawinena i Hewa,b lawi iamo anu mewali rapotina nu ope-ope tau anu tuwu i dunia. 21 Roo awetu, i PUE Ala mobabeika i Adama ai towawinena, pesampi lako i kolimba nu binata, mpane rapakera pesampi etu.
I Adama ai i Hewa naliwu ni Pue Ala lako i bonde Paradesi
22 Roo awetu, nauli ni PUE Ala, “Ei-ei, sira etu simbelamo ewa Kita, rainsaniramo mampopontani anu malompe ai anu madaa, mewali sangangaa Tapopensuwu sira lako i bonde Paradesi ei, bona baria sira mangkoni wua nu kau ngkatuwu, bona baria sira ina tuwu duduuna kasae-saeana.” 23 Etumo mpane Napopensuwu sira ni PUE Ala lako i bonde Paradesi, mpane natudu ni PUE Ala i Adama mampobago tana, lawi lako i tana ia nateru ni PUE Ala. 24 Awetu naliwumo sira ni PUE Ala, natudu ni PUE Ala basangkia kerub mokampai boboka pesuaa mbai mataeo Bonde Paradesi, ai samata guma anu moapu anu menggoli-nggoli kaimba-imbaana, mokampai dala i boboka pesuaa. Etumo mpane baria mogalo sadua tau anu pensani mesua ai mogompilisi kau ngkatuwu etu.