2
1 Ewa etumo i Pue Ala moteru langi ai dunia, ai sinangka isina. 2-3 I eo kapitu, i Pue Ala mengkaroomo lawi sopomo bagoNa. Etumo mpane Nawati eo kapitu etu, ai Napopontani lako i eo anu Napake mobago.4 Ewa etumo tunturakana, tempo i PUE Ala moteru dunia ai langi ai sinangka anu ria i rarana.
Bonde i Paradesi
Tempo ni PUE Ala moteru langi ai dunia, 5 baria mani ria tinuda anu membuliti, lawi i Pue Ala baria mani mampopendolu uda, ai baria mani ria tau anu mampobago tana. 6 Agaiana ue mepuumo mensuwu lako i lapi nu tana mai, mangulele mopakasii tana anu mbai i wongko.
7 Lako ni se etu, i PUE Ala moterumo sadua tomoane lako i awu nu tana, mpane natawuika ni PUE Ala inosa i rara nu ongena, anu mopakatuwu ia, mewali tuwu mpuumo ia.
8 Roo awetu, i PUE Ala moparia sambua bonde i Paradesi mbai mataeo, ai ni se etumo tomoane anu roomo niteruNa etu, Napopeari. 9 I PUE Ala mopatuwu mampopengaa puu nu kau anu merae, ai anu malompe rakoni wuana. I tongo-tongo nu bonde etu tuwu sampuu kau ngkatuwu, mpane anu karompuuna kau kanoto rara anu mamponotoka tau apa anu malompe ai apa anu madaa.
10 Ria sambua ue anu moili i Paradesi, anu mopakasii bonde etu. Awetu i raoa nu bonde, ue etu moili tegaa mewali iba mpenga. 11 Anu kaisa sangana Piso, uena moili motoleliki tana Hawila. 12 I se etu tesumba bulawa anu malompe mpii, nompi ai watu-watu paramata. 13 Anu kadua sangana Gihon, uena moili motoleliki tana Kus. 14 Anu katolu sangana Tigris, uena moili mbai i mataeo tana Asur, mpane anu kaiba sangana Efrat.
15 I PUE Ala mampopeari manusia i bonde Paradesi etu, bona mampobago ai mokadipuraka bonde Paradesi etu. 16 Mongkoramo i PUE Ala i manusia, Nauli, “Ope-ope wua nu kau anu ria i bonde ei, pensani nukoni. 17 Agaiana, wua nu kau anu mamponotoka tau apa anu malompe ai apa anu madaa, baria pensani nukoni, lawi ane nukoni, i eo pangkonimu nu wuana, i eo etu mbui ina mamate iko.”
18 Mpane nauli mbui ni PUE Ala, “Baria malompe manusia tuwu saduduana. Ina Kubabei rangana anu sintoto, bona motulungi ia.” 19 Nadoa ni Pue Ala tana saudi, Napopewali binata anu tuwu i lore, ai anu tuwu i laerawa. Sinangka binata aretu nakeni ni PUE Ala i lio nu manusia etu bona naita sira, mpane napakanoto sangara. Mepuu lako ni se etu, ope-ope binata anu ria i lore ai i laerawa rasanga sira. 20 Ewa etumo manusia etu mosanga binata anu ria i lore ai binata anu ria i laerawa, agaiana baria ria anu sintoto naporanga, ai anu modurei ia.
21 Etumo mpane i PUE Ala mopakaleta mposo manusia etu, ai tempona mani maleta mposo, naala ni PUE Ala sangkau usuna, mpane pangalaaNa etu, Natuko ai isi. 22 Lako i wuku nu usu etu, i PUE Ala moteru sadua towawine, mpane Nakeni i manusia etu. 23 Mewali ni tempo etu, manusia etu mololita, nauli,
“Eimo ia anu simbela ai aku,
wukuna lako i wukuku ai isina lako i isiku.
Rasanga ia towawine lawi radoa ia lako i tomoane.”a
24 Etumo mpane sadua tomoane mopalengi tuamana ai tinana, tuwu ai towawinena, ai mewali sira sadua.
25 Tomoane ai towawinena etu, meloa sira, agaiana baria sira maea.