Pewalina
I Pue Ala moteru langi ai dunia ai sinangka isina
1
1 Mpolinguruna i Pue Ala moteru langi ai dunia. 2 Ni tempo etu, dunia baria mani molense, nalaboa nu ue mani ai madedi mpara mani, agaiana Inosa ni Pue Ala mokale liliu i wongko nu ue etu. 3 Mewali, mongkoramo i Pue Ala, Nauli, “Sangangaa ria pewangka!” Mewali mpuumo pewangka. 4 Naita ni Pue Ala pewangka etu malompe. Mewali Napopogaamo pewangka lako i kamadedi. 5 Pewangka Nasanga “Mabaa.” Kamadedi Nasanga “Kawengi.” Liumo kawengi mewalimo mabaa. Etumo eo kaisa.6 Roo awetu, mongkoramo mbuimo i Pue Ala, Nauli, “Sangangaa ria laerawa, anu mampopogaa ue anu i wongko ai ue anu i woi.” 7 Mewali mpuumo laerawa, etumo mpane ria ue i wongko ai ria ue i woi. 8 Anu mampopogaa ue etu, nasanga ni Pue Ala, “Langi.” Liumo kawengi mewalimo mabaa. Etumo eo kadua.
9 Roo awetu, mongkoramo mbuimo i Pue Ala, Nauli, “Ue anu ria i woi langi sangangaa moili i sambua pearia bona teita tana.” Mewali mpuumo ewa etu. 10 Tana anu mabangi etu, Nasanga ni Pue Ala “Lore”, mpane poterusua ue Nasanga “Tasi.” Naita ni Pue Ala lore ai tasi etu malompe pewalina. 11 Mewali mongkoramo mbuimo i Pue Ala, Nauli, “Tana sangangaa nakatuwui nu sinangka anu tuwu i tana. Malompe anu motumbe ba anu moati wuana.” Mewali mpuumo ewa etu. 12 Mewali tana mampopensuwu sinangka tinuda anu motumbe ai anu moati ai sinangka puu nu kau anu wuana moati. Naita ni Pue Ala ope-opena aretu malompe. 13 Liumo kawengi mewalimo mabaa. Etumo eo katolu.
14-15 Mongkoramo mbuimo i Pue Ala, Nauli, “Sangangaa ria i langi anu mosimbaki dunia, bona tegaa mabaa ai kawengi, etumo ina mopakanoto tempo, pepuaa eo, pepuaa pae.” Awetu mpuumo pewalina. 16 I Pue Ala moteru rombua pesimbaki anu mabose iamo eo anu mokuasai mabaa ai wula anu mokuasai kawengi. I raoa eo ai wula, Nateru mbui maisi betue. 17 Ope-ope anu mesimbaki aretu, naboli ni Pue Ala i langi bona mosimbaki dunia 18 ai mokuasai kawengi ai mabaa. Naita ni Pue Ala pesimbaki aretu malompe pewalina. 19 Liumo kawengi mewalimo mabaa. Etumo eo kaiba.
20 Mewali mongkora mbuimo i Pue Ala, Nauli, “Ue sangangaa moparia mampopengaa anu tuwu i rara ue, mpane i laerawa mampopengaa tosi anu meloko-loko.” 21 Mewali naterumo ni Pue Ala binata anu mabose i tasi ai sinangkana anu tuwu i rara ue, ai sinangka pinatuwu anu mokapi. Naita ni Pue Ala ope-opena aretu malompe pewalina. 22 Mewali mongkora mbuimo i Pue Ala mowati binata aretu bona memule-mule sira kalalaua maisi mpii i tasi, mpane tosi kalalaua tetambai i laerawa. 23 Liumo kawengi mewalimo mabaa. Etumo eo kalima.
24 Mongkora mbuimo i Pue Ala, “Tana sangangaa mampopensuwu mampopengaa binata anu tuwu i lore, anu manondo ai anu maila, malompe anu mabose, malompe anu kokoi.” Mewali mpuumo ewa etu. 25 Naterumo ni Pue Ala sinangka binata anu maila, anu manondo ai sinangka binata anu mendele i dunia. Naita ni Pue Ala ope-opena aretu malompe pewalina. 26 Mongkora mbuimo i Pue Ala, Nauli, “Ei-ei ina Tateru manusia anu simbela pangkeniakana ewa Kita. Sira ina mokuasai sinangka pinatuwu anu ria i langi ai i dunia. Malompe bau i tasi, tosi i laerawa, binata i lore malompe anu maila awetu mbui anu manondo.” 27 Mewali nateru mpuumo ni Pue Ala manusia anu simbela ewa pangkeniakaNa. Nateru sira tomoane ai towawine. 28 Roo awetu Nawati sira, Nauli, “Memule-mulemo komi bona pemuleami mampearii ai makuasa i sumalele dunia. Kukiraka komi bago mokadipuraka sinangka bau i ue, tosi, ai sinangka binata anu tuwu i lore. 29 Kono i pangkonimi, Kukiraka komi sinangka tuda-tuda anu moati, ai anu mowua. 30 Agaiana kono i sinangka tosi ai binata anu maila ntanina, Kukiraka owo ai kau anu motawe mewali pangkonira.” Awetu mpuumo pewalina. 31 Naita ni Pue Ala sinangka anu Nateru aretu malompe mpii pewalina. Liumo kawengi mewalimo mabaa. Etumo eo kaaono.