Cɔ̃nfɩrmmã 21

Drɔkuɔlflããri nǝ̃ ɲũũrũũflĩɛ̃gu

Mǝ̃́ fǝ̃ǝ̃ ǹ-da drɔkuɔlflããri nǝ̃ ɲũũrũũflĩɛ̃gu, nã̀ã wa drɔkuɔldĩɛ̃lãdi nǝ̃ ɲũũrũũdĩɛ̃lgǝgɩ̀ yáá gùu guu nã, nǝ̃ lwaakɩnkandɩ́ ba dɩ̀ sɩriɛ hlo.

2 Mǝ̃́ da lǝrii mãã dìi kra dɩ̀ dǝ ǹ-hã Dũnnũw, dìí mãã Serusalɛm lǝflããri, dìi tɩgɩnǝ̃ǝ̃ nã́ã́ ciɛnĩĩ-i, wùu mǝ̃gaa wù hla ǹ-ba wù fennãã blanĩĩw nã, dɩ̀ hɩr dɩ̀ hlǝ drɔkuɔlɩ nã, Dũnnũw tuɔra.

3 Mǝ̃́ nɔ̃ yaldarǝ nã dìi hlǝ drɔkuɔlɩ nã nǝ̃ fãngããgu, nã̀ã ba dɩ̀ waa wà: «Dũnnũ bũũkuɔlɩ-i nnĩĩ cwaaba sǝ̃ǝ̃nã!

Wù ji jiraa nǝ̃-ba, bà ji ba wù bluuba, nǝ̃ wùú nǝ̃ wù hla, wùú mãã Dũnnũw nǝ̃-ba, wù ji ba bà Dũnnũw.

4 Wù ji hinĩɛ̃ ɲiɲirãmmã min bà yinɲã nã, kúúgɩ̀ síì ba dìɛ hlo, nǝ̃ blaagu, nǝ̃ kɔ̃mũɔ̃gu, nǝ̃ jaamã, nã̀ã wa kuu wo kuuw nǝ̃n yáá dìɛ dĩɛ̃lãmmã nã, gɩ̀ tíɛ́.»

5 Wùú nǝ̃n yáá wùu jiraa yuuntasǝ'n guujirakuugɩ nã, wú waa wà: «Ne, mǝ̃̀ ver mǝ̃̀ ce ɲinɲã min ɲããflãnɲã.»

Nã̀ã waa hlo wà: «Yal-dǝ, nã̀ã wa cãwanĩɛ̃ gáà sulam-i, nǝ̃ gá ba gà saa curoẃ hũɔ̃-ga.»

6 Nã̀ã fǝ̃ǝ̃ ǹ-waa nǝ̃-m wà: «Dɩ̀ jáa ce!

Mã́ã-i Alfaw nǝ̃ Omegaw, dulli nǝ̃ faalɩmmã.

Hũnɲũɔ̃sǝrɩ-ń ba gùú tiiw nã, mǝ̃̀ ji hã-yǝ nǝ̃ hũmmãã mãã mã̀ hlǝ nũmǝ̃nãsǝ'n hũnnaalw nã, wú ɲũɔ̃ mǝ̃ǝ̃lǝ̃ǝ̃.

7 Wùú mãã wù ji gbǝ̃ǝ̃ nã, wù ji tuu sùɔ́ gúɔ̀, mǝ̃̀ ji ba wù Dũnnũw nǝ̃ wú ba mǝ̃̀ bíɛ́w.

8 Nǝ̃ gbǝrnããba-lǝ, nǝ̃ bàá mãã bà sǝ̃n hũɔ̃ cɔ̃m, [nǝ̃ diicĩɛ̃rǝntaaba,] nǝ̃ bàá mãã bà ce gàá mãã Dũnnũẁ sǝ̃n caa wú da-ga nǝ̃ wù yinɲã, nǝ̃ cokuoraaba, nǝ̃ durkũmnããba, nǝ̃ kaaraaba, nǝ̃ siijãnããba, nǝ̃ kwasǝnããba min, bà ga da bà yuɔri dǝ̃ǝ̃m'n lwaagɩ nã mãã gɩ̀ caa nǝ̃ naarjũmmã.

Gɩ̀-i kúúgɩ hǝ̃ǝ̃lnãw.»

Serusalɛm lǝflããri

9 Mɛlɛgɛw dɩn mɛlɛgɛ nɩrhǝ̃ǝ̃l báà sǝ̃ǝ̃nã, bàá mãã bà yáá bàa fuɔ ɲããɲũɔ̃ɲin nɩrhǝ̃ǝ̃lw nã, ɲã̀ã́ mãã ɲã̀ã yu nǝ̃ narfaalaa nɩrhǝ̃ǝ̃lw, wú juo ba wù waa cɔ̃mmã nǝ̃-m, nã̀ã waa wà: «Jo, mǝ̃̀ ji pɩgaa-n nǝ̃ ciɛnĩĩw, Tũmblɩ'n ciɛw.»

10 Dũnnũ Yuflǝẃ juo hiil mǝ̃̀ yuflǝw, nǝ̃ mɛlɛgɛẃ fǝ̃ǝ̃ ǹ-tuu ǹ-kã nǝ̃-m tãnũũkɩnkanpɩpuɔlaadagǝ drɔ, nã̀ã pɩgaa-m nǝ̃ lǝrii mãã dìi kra dɩ̀ dǝ ǹ-hã Dũnnũw, Serusalɛm lǝri, dìi ba dɩ̀ hɩr dɩ̀ hlǝ drɔkuɔlɩ nã, Dũnnũw tuɔra.

11 Dɩ̀ yáá dɩ̀ caalaa nǝ̃ Dũnnũ faa'n gbɩgbaamã.

Dɩ̀ caalammã̀ yáá mã̀ hlǝ tɩntãnkuusǝdǝ'n caalammã, sasɩpɩ tɩntãndii mãã dɩ̀ daraa nã́ã́ dɔtrã-i.

12 Dɩ̀ yáá dìi caliɛ nǝ̃ dofũũlgǝ̃ngããdɩdaalaadagǝ, dìí mãã nǝ̃ dũndɔ̃lĩɛ̃ nũɔ̃sɔ̃ nǝ̃ gà hǝ̃ǝ̃lga, nǝ̃ mɛlɛgɛ nũɔ̃sɔ̃ nǝ̃ bà hǝ̃ǝ̃lbà ba gɩ̀ dũndɔ̃lĩɛ̃ga nã; yiriɛgà yáá gàa yal gà drɔ: gàá mãã Isɩrayɛl nũɔ̃ntaa nũɔ̃sɔ̃ nǝ̃ bà hǝ̃ǝ̃l yaga.

13 Dũndɔ̃lĩɛ̃ga siɛlgà yáá bǝ̃ǝ̃'n pal'n yiɛgu, nǝ̃ gà siɛlgà ba bǝ̃ǝ̃'n pal'n yiɛ'n ɲiɲũɔ̃yiɛgu, nǝ̃ gà siɛlgà ba bǝ̃ǝ̃'n pal'n yiɛ'n nãdĩĩyiɛgu, nǝ̃ gà siɛlgà ba bǝ̃ǝ̃'n jãnɩm'n yiɛgu.

14 Lǝ'n dofũũl'n taarɩ̀ yáá nǝ̃ dojiiya'n tɩntrã nũɔ̃sɔ̃ nǝ̃ gà hǝ̃ǝ̃l, gàá mãã gà yáá nǝ̃ Tũmblɩ'n tĩɛ̃taa nũɔ̃sɔ̃ nǝ̃ bà hǝ̃ǝ̃l yiriɛ nũɔ̃sɔ̃ nǝ̃ gà hǝ̃ǝ̃lga.

15 Wùú nǝ̃n yáá wù wanãã nǝ̃-m, wù yáá nǝ̃ sãnã tǝrdarǝ wù guufikuugu, wù ji fi lǝri, nǝ̃ dɩ̀ dũndɔ̃lĩɛ̃ga, nǝ̃ dɩ̀ dofũũli.

16 Lǝrɩ̀ yáá nǝ̃ tãngbǝrǝ̃nɲã nnǝ̃ǝ̃ ɲã̀ vanãã, nǝ̃ dɩ̀ daamã́ ba mã̀ vaa nǝ̃ dɩ̀ hanãmmã.

Mɛlɛgɛẃ fi lǝri nǝ̃ tǝǝri, ǹ-da ^astadɩ yin nũɔ̃sɔ̃ nǝ̃ gà hǝ̃ǝ̃l, ǹ-ji da yin tonnũɔ̃sɔ̃ trãngwaahǝ̃ǝ̃l (12 000); dɩ̀ daamã, nǝ̃ dɩ̀ hanãmmã, nǝ̃ dɩ̀ haarɩmmã̀ yáá mã̀ vaa.

17 Wú fi dofũũl yo, nãkrɔgbaa'n yin nũɔ̃sɔ̃ nǝ̃ gà hǝ̃ǝ̃l, ǹ-ji da yin nũɔ̃sɔ̃ nǝ̃ gà hǝ̃ǝ̃l, ǹ-vaa nǝ̃ cwaa'n guufikuuguu mãã mɛlɛgɛẁ yáá wù fi nǝ̃-gǝ.

18 Dofũũlɩ̀ yáá dìi mã nǝ̃ sasɩpɩ tɩntrãga, nǝ̃ lǝrɩ̀ ba dìi mã nǝ̃ sãnãw mãã wù sǝ nǝ̃ dɩgaagu, nã̀ã ba wù daraa.

19 Lǝ'n dofũũl'n dotariɛgà yáá gàa tuɔluɔ nǝ̃ tɩntrãkuusiɛ'n plaaga min: Dotardĩɛ̃lãdɩ̀ yáá dìi tuɔluɔ nǝ̃ sasɩpɩ tɩntãndi, dɩ̀ hǝ̃ǝ̃lnãẃ tuɔluɔ nǝ̃ safir tɩntãndi, nǝ̃ dɩ̀ siɛlnãẃ tuɔluɔ nǝ̃ kaliseduwan tɩntãndi, nǝ̃ dɩ̀ nnǝ̃ǝ̃nãẃ tuɔluɔ nǝ̃ emerɔdɩ tɩntãndi,

20 nǝ̃ dɩ̀ ndiinãẃ tuɔluɔ nǝ̃ sardowan tɩntãndi, nǝ̃ dɩ̀ nãndiennãẃ tuɔluɔ nǝ̃ kornalin tɩntãndi, nǝ̃ dɩ̀ nɩrhǝ̃ǝ̃lnãẃ tuɔluɔ nǝ̃ kɩrsolitɩ tɩntãndi, nǝ̃ dɩ̀ nɩrsiɛlnãẃ tuɔluɔ nǝ̃ beril tɩntãndi, nǝ̃ dɩ̀ densǝnãẃ tuɔluɔ nǝ̃ topasɩ tɩntãndi, nǝ̃ dɩ̀ nũɔ̃sɔ̃nãẃ tuɔluɔ nǝ̃ kɩrsopɩrasɩ tɩntãndi, nǝ̃ dɩ̀ nũɔ̃sɔ̃ nǝ̃ dɩ̀ diinnãẃ tuɔluɔ nǝ̃ yasɛ̃tɩ tɩntãndi, nǝ̃ dɩ̀ nũɔ̃sɔ̃ nǝ̃ dɩ̀ hǝ̃ǝ̃lnãẃ tuɔluɔ nǝ̃ ametɩsɩtɩ tɩntãndi.

21 Dũndɔ̃lĩɛ̃ nũɔ̃sɔ̃ nǝ̃ gà hǝ̃ǝ̃lgà yáá kɩɲǝ̃mbiikuusiɛ nũɔ̃sɔ̃ nǝ̃ gà hǝ̃ǝ̃l-i; Dũndɔ̃l wo dũndɔ̃l, dɩ̀ yáá dìi ce nǝ̃ kɩɲǝ̃mblɩkuusǝdǝdi dɩndi.

Lǝ'n hlũũguu mãã gùu hanãã, gɩ̀ yáá sãnãw mãã wù sǝ nǝ̃ dɩgaagu, wù daraa.

22 Mǝ̃̀ sáa da Dũnnũ bũũduugu lǝ'n kusuugɩ nã, nã̀ã wa Yitiiw, Fãngããgɩmintii Dũnnũw-i wù bũũduugu, nǝ̃ Tũmblɩ yo.

23 Lǝ'n dugɔẁ sǝ bǝ̃ǝ̃gɩ nã, yindagǝ nã hiraagu ǹ-da ǹ-hiil gbɩgbaamã ǹ-hã-dǝ, nã̀ã wa Dũnnũ faa'n gbɩgbaamã̀ hiil gbɩgbaamã mã̀ hã-dǝ, nǝ̃ Tũmblɩẁ ba dɩ̀ lampaw.

24 Coplaagà ji ba gà wáà wù gbɩgbaamã nã, nǝ̃ cuu yuntaabá ba bà jo nǝ̃ bà gbaasǝri dɩ̀ nã.

25 Yuu'n síì ba dìɛ, gùú nã mãã dɩ̀ flagà ji suu, nã̀ã wa yisuɔgɩ̀ síì ba dìɛ hlo.

26 Bà ga jo nǝ̃ coplaa'n gbaasǝri, nǝ̃ bà dalaagu dɩ̀ nã.

27 Dɩgaa'n kuu'n síì jãn dɩ̀ nã, yindagǝ nã curow mãã wù dii wù hla cɔ̃mmã nã mãã mã̀ã bla Dũnnũw nã, yindagǝ nã kwasǝrɩ nã; bàá mãã bà yiriɛgà yállá Tũmblɩ'n nũmǝ̃nãsǝ'n sɛbɛw nã, bàá dɩndɩn ga jãn.