Cɔ̃nfɩrmmã 20

Sɩtãn vaamã nǝ̃ wù nǝ̃nǝ̃m'n cɔ̃mmã

Mǝ̃́ fǝ̃ǝ̃ ǹ-da mɛlɛgɛdiɛ wù hɩr wù hlǝ drɔkuɔlɩ nã.

Wù yáá wùu fuɔ jũɔ̃nulǝǝ'n kanɩgablɩrɩ nã, nǝ̃ jɔrgɔgǝ̃ngããdiɛ.

2 Wú blǝ wuufuulǝyǝw, waalcũncuruɔw mãã tiilǝtiiw nǝ̃ Sɩtãnw, ǹ-vaa-yǝ nǝ̃ jɔrgɔ báà bii tonnũɔ̃sɔ̃ trãngwaahǝ̃ǝ̃l kusuugɩ nã (1 000),

3 nã̀ã nǝ̃ǝ̃ ǹ-dii-yǝ jũɔ̃nulǝǝgɩ nã.

Wú suu wanjãnɩmmã nã, nã̀ã gbǝ-mã wù yuu'n yiɛgu, wu báa da ǹ-vuuraa coplaaga nã hlo, fuwɔ ǹ-ji da bii tonnũɔ̃sɔ̃ trãngwaahǝ̃ǝ̃lw wùu ta (1 000).

Gɩ̀-lǝ gɩ̀ furũũgɩ nã, gɩ̀ saa bá nǝ̃nǝ̃ǝ̃ wù nã bǝ̃ǝ̃dagǝ fiyãã.

4 Gɩ̀ furũũgɩ nã, mǝ̃́ da yuuntasǝ'n ɲããjiraɲinɲã, nǝ̃ bàá nǝ̃n yáá bàa jiraa ɲã̀ drɔ, bàá mãã bà yáá bàa jã ǹ-bǝr bà yunɲã Yesu siɛrnãsǝ'n cɔ̃mmã nã, nǝ̃ Dũnnũ cãwan'n cɔ̃mmã nã.

Bà-lǝ bà minw-i bà sáá bàa kuulǝǝ ǹ-bũũ jerguyow, nǝ̃ wù yɩryɩrw mãã bàa cesǝ-yǝ, nǝ̃ bà sáa hũɔ̃ wù nɩsɩmmã́ ba bà sãnũnɲã nã yindagǝ nã bà nãkrɔnɲã nã.

Mǝ̃́ da bà yuflaaba hlo, bàa ver ǹ-jo nũmǝ̃nãsǝrɩ nã.

Bà yáá bàa jiraa yuuntasǝrɩ nã nǝ̃ Kɩrsaw bii tonnũɔ̃sɔ̃ trãngwaahǝ̃ǝ̃l kusuugɩ nã (1 000), nã̀ã ba bàa da fãngããgu ǹ-ba bà ji jar sugolli.

5 [Cugutaa'n dɩgaliɛẁ síì ver ǹ-jo nũmǝ̃nãsǝrɩ nã, nã́ã́ bii tonnũɔ̃sɔ̃ trãngwaahǝ̃ǝ̃l wáà sáa ta (1 000).]

Gɩ̀-i cugutaa'n nĩĩmdĩɛ̃lãmmã.

6 Bàá mãã bà ji tuu guɔ cugutaa'n nĩĩmdĩɛ̃lãmmã nã, bà yunɲã̀ dwállá, nǝ̃ bá ba yiyalɩmmã nã!

Kúúgɩ hǝ̃ǝ̃lnãw sǝ nǝ̃ fãngããgu bà drɔ, nǝ̃ bà ji ba Dũnnũ puruɔntaaba nǝ̃ Kɩrsa puruɔntaaba, nã̀ã ba bà ji jiraa yuuntasǝrɩ nã nǝ̃-yǝ bii tonnũɔ̃sɔ̃ trãngwaahǝ̃ǝ̃l (1 000) kusuugɩ nã.

7 Bii tonnũɔ̃sɔ̃ trãngwaahǝ̃ǝ̃l wáà (1 000) wu-ń ji ta, bà ji hiil Sɩtãnw wù kasoduugɩ nã

8 nǝ̃ wú hlǝ ǹ-ba wù vuu coplaaga mãã cuu yanɲã nnǝ̃ǝ̃ɲã nã, Gɔgɩ yiɛgu nǝ̃ Magɔgɩ yiɛgu, ǹ-da ǹ-tɩgii-ba byaarɩ nã; bá nǝ̃ bàa ɲũrũɔ̃ nã́ã́ lwaakɩnkan'n hlɔ̃mpier-i.

9 Bá hlǝ ǹ-suu ɲũũrũũgɩ min, nã̀ã caliɛ Kɩrsa bluu'n kuɔyaga nã nǝ̃ lǝrii mãã dɩ̀ dwal Dũnnũw nã.

Nǝ̃ dǝ̃ǝ̃mdamã, [mã̀ã́ mãã mã̀ hlǝ́rá Dũnnũw nãã,] mã́ hɩr ǹ-hlǝ drɔkuɔlɩ nã ǹ-wuu-ba.

10 Tiilǝtiiw mãã wù yáá wù vuu-ba, bá nǝ̃ǝ̃ ǹ-dii-yǝ dǝ̃ǝ̃m'n lwaagɩ nã, nǝ̃ naarjũmmã nã, jerguyow nǝ̃ tanhiil kwasǝnĩĩw mãã gùú sùɔ́gu.

Bà ga ba ywaruugɩ nã bǝ̃ǝ̃nã nǝ̃ yisuɔ, fuwɔ fɩraa.

Sugojarfaalaagu

11 Mǝ̃́ da yuuntasǝ'n guujirakukɩnkandagǝ pier pier gɩ̀ nã, nǝ̃ wùú mãã wù yáá wùu jiraa gɩ̀ drɔ.

Ɲũũrũũgu nǝ̃ drɔkuɔlɩ́ kwar ǹ-hal wù nã, nǝ̃ bà sáa da wanjiram'n sùɔ́gu ǹ-hã-ɲã hlo.

12 Gɩ̀ furũũgɩ nã, mǝ̃́ da cugutaaba, baagǝ̃ngĩɛ̃ba nǝ̃ baasaalaaba, bàa hiraa yuuntasǝ'n guujirakuu'n yigagɩ nã.

Bá cugur sɛbɛba.

Nǝ̃ sɛbɛdiɛẃ cugur hlo: nũmǝ̃nãsǝ'n sɛbɛw.

Bá jar cugutaaba ǹ-vaa nǝ̃ bà gaaciega, nǝ̃ dìí nǝ̃n yáá dìi yal sɛbɛ báà kusuugɩ nã.

13 Lwaakɩnkandɩ̀ yáá dìi wuu bàa, dɩ́ hiil-ba, kúúgu nǝ̃ cugutaa'n wanjiram'n sùɔ́ yo, ɲã́ hiil ɲã̀ cugutaaba, nǝ̃ bá jar curo wo curo ǹ-vaa nǝ̃ wù gaacie'n tammã.

14 Bá fǝ̃ǝ̃ ǹ-nǝ̃ǝ̃ ǹ-dii kuugu nǝ̃ cugutaa'n wanjiram'n sùɔ́gu dǝ̃ǝ̃m'n lwaagɩ nã.

Dǝ̃ǝ̃m'n lwaagɩ-i kúúgɩ hǝ̃ǝ̃lnãw.

15 Bà minw mãã bà yiriɛgà sáa yal nũmǝ̃nãsǝ'n sɛbɛw nã, bá nǝ̃ǝ̃ ǹ-dii-ba dǝ̃ǝ̃m'n lwaagɩ nã.