Tũmblɩ'n cataagǝgu
19
Gɩ̀-lǝ gɩ̀ furũũgɩ nã, mǝ̃́ nɔ̃ yaldarǝ nã drɔkuɔlɩ nã, nǝ̃ fãngããgu nã́ã́ cohuɔdagǝ yal-i, dɩ̀ waa wà: «Aleluya!
Korɩmmã, nǝ̃ buusammã, nǝ̃ fãngããgɩ́ nǝ̃ yì Dũnnũ saa-i.
2 Ũwũũ, wù sugojaruugɩ́ nǝ̃ gùu ba sulammã nã̀ã sũɔ̃l, nã̀ã wa wù hlã casuurnhlatigǝ̃ngãw nǝ̃ yuɔrɔmmã, wùú mãã wù bǝ̃ǝ̃lǝ̃ǝ̃ cuu cwaaba nã nǝ̃ wù durkũmsǝri.
Wù híilá wù mããcieraa'n mããjaamã ǹ-yugu bà twam'n cɔ̃mmã wù saa, mã̀ã́ mãã wù yáá wùu tũnũũ mã̀ nã.»
3 Bá waa yinhǝ̃ǝ̃lnãw wà: «Aleluya!
Nǝ̃ lǝ díɛ̀ ɲũɔ̃sǝrɩ́ ba dɩ̀ yuguraa fuwɔ fɩraa.»
4 Vũnvãnãã gur nǝ̃ bà nnǝ̃ǝ̃ba nǝ̃ nũmǝ̃nãɲinɲã nnǝ̃ǝ̃ɲã́ kuulǝǝ, nã̀ã bũũ Dũnnũw mãã wùu jiraa wù yuuntasǝ'n guujirakuugu drɔ ǹ-ba bà waa wà: «Kwaya!
Aleluya!»
5 Yaldarǝ hlǝ yuuntasǝ'n guujirakuugɩ nã, nã̀ã waa wà: «Bṹũlã̀ yì Dũnnũw, wù mããcieraa ɲimãã min, ɲimãã mãã ɲi sɔ̃ wù nã, baasaalaa nǝ̃ baagǝ̃ngãã!»
6 Nǝ̃ mǝ̃́ nɔ̃ yaldarǝ nã́ã́ cohuɔdagǝ dǝl-i.
Dɩ̀ yáá dɩ̀ hlǝ hũngǝ̃ngããm'n dulli, nǝ̃ Dũnnũ nãlɛ̃mmã mãã mã̀ du nǝ̃ fãngããgu, nã̀ã ba dɩ̀ waa wà: «Aleluya!
Nã̀ã wa Yitiiw, yì Dũnnũw mãã Fãngããgɩmintiiw, wù kárrá wù yuuntasǝrɩ nã.
7 Yáalà yí ba dudwalɩmmã nã, nǝ̃ kweyi-kweyiw nã, nã̀ã ba yí bũũ Dũnnũ yiiri, nã̀ã wa Tũmblɩ'n cataagǝ'n bǝ̃ǝ̃guu híí nnĩĩ, nǝ̃ ciɛnĩĩẃ ba wùu tɩgɩnǝ̃ǝ̃ wù hla nã.
8 Bà hlã-yǝ nǝ̃ kuulaablanãyǝdiɛ wù caalaa, nã̀ã ba yiyalɩmmã nã, wú dii.»
Sulammã nã, kuulaablanãyǝ wáà, Kɩrsa bluu'n gaaciegaa mãã gàa sũɔ̃l, gà-i.
9 Mɛlɛgɛẃ fǝ̃ǝ̃ ǹ-waa nǝ̃-m wà: «Yal: “Bàá mãã bà járrá-ba Tũmblɩ'n cataagǝ'n paaruugɩ nã, bà yunɲã̀ dwállá!”»
Nã̀ã fǝ̃ǝ̃ ǹ-pya nã wà: «Cãwanĩɛ̃ gáà, Dũnnũ cãwaahuhoriɛ-i.»
10 Mǝ̃́ duruu wù vyanɲã taara ǹ-bũũ-yǝ, nǝ̃ wù waa nǝ̃-m wà: «Blǝ ǹ hla nã nǝ̃ dɩ̀ celli!
Mǝ̃́ nǝ̃ mã̀ã ba ǹ nãmããcier-i, ɲí nǝ̃ ǹ cwanããba mãã nǝ̃ Yesu siɛrnãsǝri.
Bũũ Dũnnũw, nã̀ã wa Yesu siɛrnãsǝrii blǝ́rà Dũnnũ tanhiilaa'n yigagu.»
Bà gbǝ̃ǝ̃ jerguyow nã nǝ̃ tanhiilkwasǝnĩĩw nã
11 Gɩ̀ furũũgɩ nã, mǝ̃́ da drɔkuɔlɩ́ ciɛl, nǝ̃ sǝ̃nsuupɩpladiɛẃ hillaa.
Wùú mãã wù yáá wùu yugo-yǝ, bà be-yǝ wà «Yalntii nǝ̃ Wuuhuhoryǝ», wù jar sugolli nã̀ã ba wù ce byaari nǝ̃ sũɔ̃lɩmmã.
12 Wù yinɲã̀ yáá nã́ã́ dãncaalam-i, nã̀ã ba wù yáá nǝ̃ yuuntasǝ'n hucubincin wù yuugɩ nã.
Yirdaarɩ̀ yáá dìi yal wù drɔ, dìí mãã curo'n sǝ̃n fǝ̃ǝ̃-dǝ nã́ã̀ wùú sǝ.
13 Wù yáá wùu dii kuulaadiɛ, bàa ɲĩɛ̃-yǝ twammã nã.
Wù yiirɩ-i «Dũnnũ Cãwandi».
14 Drɔkuɔl'n sɩrǝǝsɩbà yáá bà duu wù nã, bàa yugo sǝ̃nsopɩpliɛba drɔ, nã̀ã dii kuulaablanãpɩpliɛdaba, bàá mãã yiyalɩmmã nã.
15 Dãngunãdiɛẁ yáá wù hlǝ wù nũɔ̃gɩ nã, wùú mãã wù jã, [nǝ̃ nɔ̃nɲã hǝ̃ǝ̃lɲã] ǹ-ba wù mũũ coplaaga.
Wù ji blǝ bà yigagu nǝ̃ kwal'n yuuntasǝ'n guruugu, nǝ̃ wùú nǝ̃ wù hla, wú ba wù ji kumã ɛrsɛ̃w, Fãngããgɩmintii Dũnnũ hyadũpiirǝbɩblaa'n ɛrsɛ̃ bikumãfuugɩ nã.
16 Wù yáá nǝ̃ yirdarǝ dìi yal wù kuulaaw drɔ nǝ̃ wù kasaarɩ nã wà: «Yuntaa'n yuuntiiw, nǝ̃ yitaa'n Yitiiw».
17 Mǝ̃́ da mɛlɛgɛdiɛ [hlo] wùu hiraa bǝ̃ǝ̃gu drɔ.
Wú hiil wù yalli ǹ-kaasǝ nǝ̃ fãngããgu nǝ̃ diɛrnɲinɲã minw mãã ɲã̀ yáá ɲã̀ yuu velvel drɔgu wà: «Jówà, tɩgii ɲì ɲĩɛ̃ Dũnnũ paaruugǝ̃ngãã'n cɔ̃mmã nã
18 ǹ-da ǹ-wuu yuntaa'n kũɔ̃mã, nǝ̃ sɩrǝǝsɩba yuntaa'n kũɔ̃mã, nǝ̃ sɩrǝǝsɩba kũɔ̃mã, nǝ̃ sǝ̃nsonãã'n kũɔ̃mã, nǝ̃ bàá mãã bà yugo-ba, nǝ̃ cwaaba min kũɔ̃mã, bàá mãã bà hla nã, nǝ̃ bàá mãã lwɛba, baasaalaaba nǝ̃ baagǝ̃ngĩɛ̃ba.»
19 Nǝ̃ mǝ̃́ fǝ̃ǝ̃ ǹ-da jerguyow, nǝ̃ cuu yuntaaba, nǝ̃ bà sɩrǝǝsɩbàa tɩgii bà ji ce byaari nǝ̃ wùú mãã wù yáá wùu yugo sǝ̃nsuuw nǝ̃ wù sɩrǝǝsɩba.
20 Bá blǝ jerguyow nǝ̃ tanhiilkwasǝnĩĩw mãã wù yáá wù ce cɔ̃nnurommã ǹ-da ǹ-vuuraa bàá nã mãã jerguyo'n nɩsɩmmã̀ yáá bà nã, nã̀ã bũũ wù yɩryɩrw mãã bàa cesǝ-yǝ.
Gɩ̀ bà hǝ̃ǝ̃lba min, bá nǝ̃ǝ̃ ǹ-dii-ba nũmǝ̃nã, dǝ̃ǝ̃m'n lwaagɩ nã mãã gɩ̀ caa nǝ̃ naarjũmmã.
21 Bá ko bà dɩgaliɛ nǝ̃ dãngunãw mãã wù yáá wù hlǝ wùú mãã wùu yugo sǝ̃nsuuw wù nũɔ̃gɩ nã, nǝ̃ diɛrnɲin ɲã́ã̀ min, ɲã́ wuu wù kũɔ̃mã ǹ-ye.