Cɔ̃nfɩrmmã 18

Gɩ̀-lǝ gɩ̀ furũũgɩ nã, mǝ̃́ da mɛlɛgɛdiɛ wù hɩr wù hlǝ drɔkuɔlɩ nã.

Wù yáá nǝ̃ fãngããgǝ̃ngããdagǝ, nǝ̃ wù gbɩgbaamgǝ̃ngããmã́ ba mã̀ caalaa ɲũũrũũgɩ nã.

2 Wú hiil wù yalli ǹ-kaasǝ nǝ̃ fãngããgu wà: «Dɩ̀ dúrúu, [dɩ̀ dúrúu,] Babilɔn lǝgǝ̃ngããri!

Dɩ̀ jáa ba tãntɔ̃nãã'n wancɔmmã, tãntɔ̃nããba min wancĩĩmã, nǝ̃ hũɔ̃rɔ̃nãmbaa mãã bà síì gbǝ̃ǝ̃ ǹ-jãn Dũnnũw nǝ̃-ba, nǝ̃ bà cɔ̃mmã́ ba mã̀ã bla bà nã, bà wancĩĩmã.

3 Sulammã nã, coplaaga min, gà ɲṹɔ̃lã́ Dũnnũ hyadũpiirǝ'n kwãmmã dɩ̀ suurnhlan cɔ̃mmã nã, cuu yuntaabà díilá bà hla durkũmsǝrɩ nã nǝ̃-yǝ, nǝ̃ wù ɲinkuusǝncindii mãã dìi maa gɩ̀ sùɔ́gu, dìí cɔ̃mmã nã-i cuu cǝrcieraabá da gbaasǝri.»

4 Mǝ̃́ fǝ̃ǝ̃ ǹ-nɔ̃ yaldarǝ nã hlo dìi hlǝ drɔkuɔlɩ nã dɩ̀ waa wà: «Hlǝ́rà dɩ̀ kusunã, mã́ã cwaa, ɲi báa ji tuu guɔ dɩ̀ gaacĩɛ̃yaga nã, nǝ̃ ɲi báa ji kã ɲí da narba ɲì min nǝ̃-yǝ.

5 Nã̀ã wa dɩ̀ gaacĩɛ̃yagà súguráa gà ɲĩɛ̃ nã fuwɔ ǹ-ga hi drɔkuɔli, nǝ̃ Dũnnũẃ kãnãã dɩ̀ wanyuɔrɔmmã nã.

6 Plã́ã̀-dǝ nã́ã́ dɩ̀ plã nĩĩguu mãã, nǝ̃ ɲí hã-dǝ nǝ̃ dɩ̀ gaacie'n pãl'n yinhǝ̃ǝ̃lw.

Dɩ̀ círíi ǹ-dii gùú guuɲũɔ̃kuugɩ nã, hlã́ã̀-yǝ nǝ̃ gɩ̀ yinɲã hǝ̃ǝ̃lɲã.

7 Dɩ̀ yáá dɩ̀ buusa dɩ̀ hla nã nĩĩguu mãã, nã̀ã caa ɲinkuusǝncin dɩ̀ hla nã, píɛlà ywaruugu nǝ̃ yigaɲǝ̃ǝ̃gǝgu dɩ̀ drɔ dugɔ nĩĩgu.

Nã̀ã wa dɩ̀ waa dɩ̀ hiɛga nã wà: “Mǝ̃́ nǝ̃ mã̀ã jiraa cayuuntii'n tammã, mǝ̃̀ sǝ blakuuciɛ, nã̀ã ba mǝ̃̀ síì ba blaagɩ nã ǹ-da,”

8 gɩ̀-lǝ gɩ̀ cɔ̃mmã nã, yuugɩ dɩn kusuugɩ nã, gùú narbaa mãã bà tɩgɩnǝ̃ǝ̃ dɩ̀ yuunã, bà ji suu dɩ̀ nã: kúúgu, nǝ̃ blaagu, nǝ̃ nũmmã, nǝ̃ dɩ́ ba dɩ̀ ji guu nã nǝ̃ dǝ̃ǝ̃mã.

Nã̀ã wa Yitii Dũnnũw mãã wù járrá dɩ̀ sugolli, wú nǝ̃ fãngããgu.»

9 Cuu yuntaaba minw mãã bà díilá bà hla durkũmsǝrɩ nã nǝ̃-dǝ, nã̀ã duu dɩ̀ ɲinkuusǝnɲã nã, bà ji ba bà kaal, nã̀ã ba bà higinãã dɩ̀ cɔ̃mmã nã, gùú nã mãã bà ji da lǝrii mãã dìi tii nã, dɩ̀ ɲũɔ̃sǝri.

10 Bà ga hiraa yergaa dɩ̀ ywaruu'n sɔ̃l'n cɔ̃mmã nã, nã̀ã waa wà: «Hujãncɔ̃mmã!

Hujãncɔ̃mmã!

Lǝgǝ̃ngããrii mãã Babilɔn lǝri, nã̀ã ba lǝrii mãã nǝ̃ fãngããgu!

Ǹ sugojaruugɩ̀ híí bǝ̃ǝ̃gɩ dɩn kusuugɩ nã!»

11 Cuu cǝrcieraa yo, bá nǝ̃ kaaluugɩ nã nã̀ã ba yigaɲǝ̃ǝ̃gǝgɩ nã dɩ̀ cɔ̃mmã nã, nã̀ã wa curo'n sǝ̃n sǝ̃ǝ̃ bà cǝrɲinɲã hlo,

12 sãnã ɲinɲã, kwaplahuhoradǝ'n ɲinɲã, tɩntrãkuusiɛ'n ɲinɲã, kɩɲǝ̃mbiikuusiɛ'n ɲinɲã, nǝ̃ kuulaajũmkuusǝmmã: mããblanãmmã, mããsɩsĩɛ̃mmã, mlǝǝr mlǝǝr mǝ̃gãmmã, nǝ̃ mããbumbɛ̃mmã, nǝ̃ dan'n plaaga minw mãã ɲã̀ hũũgɩ̀ dwal, nǝ̃ wariɛ'n plaaga minw mãã bàa ce-ga nǝ̃ gbĩɛ̃l'n ɲirǝ̃ǝ̃gu, nǝ̃ dakuusinɲã, nǝ̃ kwabyããri, nǝ̃ kwalli, nǝ̃ ɲã̀ã́ mãã bàa ce-ɲã nǝ̃ tɩntrãfɩnfiɛga,

13 nǝ̃ tubiɲin'n biidaga tùú, [nǝ̃ ɲinhũdudwalunɲã] nǝ̃ latɩkolo nɔ̃mmã, nǝ̃ miir nɔ̃mmã, nǝ̃ wusunããw, nǝ̃ ɛrsɛ̃ kwãmmã, nǝ̃ nɔ̃mmã, nǝ̃ ble jũnkuumã, nǝ̃ dũmmã, nǝ̃ ninɲã, nǝ̃ tũmba, nǝ̃ sǝ̃nsonããba, nǝ̃ wotoroba, nǝ̃ lwɛba, cwaa'n yuflaabaa.

14 «Ǹ yáá ǹ caa gùú ɲinɲã nǝ̃ ǹ hiɛga min, ɲã̀ tíɛ́ ǹ-hal ǹ nã; gbaasǝ díɛ̀dɩ min nǝ̃ dɩ̀ faagɩ̀ váaláa ǹ nã, nǝ̃ ń ba ǹ síì ver ǹ-da-ɲã hlo.»

15 Wariɛ gáà cǝrcieraabaa mãã bà cíé cǝruugu nǝ̃-yǝ ǹ-gbaala, bà ga hiraa yergaa, dɩ̀ ywaruu'n sɔ̃l'n cɔ̃mmã nã.

Bà ga kaal, nã̀ã ba bà ga ba yigaɲǝ̃ǝ̃gǝgɩ nã;

16 bà ga ba bà waa wà: «Hujãncɔ̃mmã!

Hujãncɔ̃mmã!

Lǝgǝ̃ngããrii mãã dɩ̀ yáá dìi dii kuulaajũmblanãmmã, nã̀ã ba wuusɩsĩɛ̃yǝw, nǝ̃ wuubumbɛ̃mw, nã̀ã tuɔluɔ nã nǝ̃ sãnãw, nǝ̃ tɩntrãkuusiɛga, nǝ̃ kɩɲǝ̃mbiikuusiɛga!

Gbaasǝcindɩ̀ gúulá nã, bǝ̃ǝ̃gɩ dɩn kusuugɩ nã!»

17 Batosũɔ̃rããba nǝ̃ bà minw mãã bà huɔl nǝ̃-ba, nǝ̃ hũm'n mããcieraaba, nǝ̃ bàá mãã bà da bà nũɔ̃gu lwaakɩnkandɩ nã, bà yáá bàa hiraa yergaa

18 ǹ-da lǝrii mãã dɩ̀ caa dɩ̀ ɲũɔ̃sǝri, nã̀ã ba bà kaasǝraa wà: «Lǝ hadii yáá dɩ̀ ji gbǝ̃ǝ̃ ǹ-fi dɩ̀ hla nǝ̃ lǝgǝ̃ngããri?»

19 Bà yáá bà piɛ huruugu bà yunɲã nã, nã̀ã ba bà kaasǝraa kaaluugu nǝ̃ yigaɲǝ̃ǝ̃gǝgɩ nã wà: «Hujãncɔ̃mmã!

Hujãncɔ̃mmã!

Lǝgǝ̃ngããri mãã dɩ̀ gbaasǝrɩ̀ gbáalá bà minw mãã nǝ̃ batoba lwaakɩnkandi drɔ, dɩ̀ gúulá nã bǝ̃ǝ̃gɩ dɩn kusuugɩ nã!»

20 Ɲimãã mãã drɔkuɔlɩ nã, bláà kweyi-kweyiw nã dɩ̀ cɔ̃mmã nã!

Nǝ̃ ɲimãã mãã Kɩrsa bluuba, nǝ̃ wù tĩɛ̃taaba nǝ̃ wù tanhiilaaba, ɲimãã yo, bláà ɲì ce kweyi-kweyiw, nã̀ã wa Dũnnũẁ járrá dɩ̀ sugolli ǹ-hã-ɲã́ã̀ nǝ̃ diidwaldǝdi.

21 Gɩ̀-i mɛlɛgɛdiɛ, wùú mãã nǝ̃ fãngããgu, wú tuu tɩntãndarǝ dɩ̀ hlǝ nãmlãgǝ̃ngããri, nã̀ã nǝ̃ǝ̃ ǹ-dii-dǝ lwaakɩnkandɩ nã nã̀ã waa wà: «Gùú tammã dɩnmã nã-i bà ji nǝ̃ǝ̃ ǹ-mugunãã Babilɔn lǝri, dìí mãã lǝgǝ̃ngããri, nǝ̃ bá ba bà síì da-dǝ hlo.

22 Bà síì nɔ̃ bĩĩɲɩmǝ̃ǝ̃lãã bĩĩɲɩ dulli, nǝ̃ ɲããmǝ̃ǝ̃lããba, nǝ̃ fyãhulǝǝba, nǝ̃ yenbuurǝǝba ǹ saa hlo.

Bà síì da nãkrɔmããcierw dɩn yo ǹ saa, wùú mãã wù mǝ̃gaa ɲinɲã wù suur, nǝ̃ curo'n síì nɔ̃ nãmlã'n dulli ǹ saa hlo.

23 Fitɩn gbɩgbaamã̀ síì caalaa ǹ saa hlo, nǝ̃ curo'n síì nɔ̃ ciɛnĩĩw nǝ̃ blanĩĩ'n yallɩ nã hlo.

Dɩ̀-lǝ dɩ̀ ji hi, nã̀ã wa ǹ cǝrcieraabà yáá cuu cogǝ̃ngĩɛ̃ba, nǝ̃ ǹ kaaraagɩ́ dii coplaaga min vaalammã nã,

24 nã̀ã wa ǹ saa, bà díɛ́ Dũnnũ tanhiilaa'n twammã, nǝ̃ Kɩrsa bluu'n mǝ̃gãmmã, nǝ̃ bà minw mãã bà kúó-ba ǹ-jãn siimã ɲũũrũũgu.»