Cɔ̃nfɩrmmã 17

Babilɔn lǝ'n durummã

Nǝ̃ mɛlɛgɛ nɩrhǝ̃ǝ̃lbaa mãã bà yáá bàa fuɔ ɲããɲũɔ̃ɲin nɩrhǝ̃ǝ̃lw nã, bà sǝ̃ǝ̃nã, wù diinẃ juo wanãã nǝ̃-m, nã̀ã waa wà: «Jo, mǝ̃̀ ji pɩgaa-n nǝ̃ cijalgǝ̃ngãw mãã wù suur wù hla wù sugolli, wùú mãã wùu jiraa hũngǝ̃ngãmmã drɔ.

2 Cuu yuntaabà díilá bà hla durkũmsǝrɩ nã nǝ̃ wɩ̀-i, nǝ̃ cuu cwaabá ɲũɔ̃ wù suurnhlan kwãmmã́ blǝ-ba.»

3 Gɩ̀-i, Dũnnũ Yuflǝẃ juo hiil mǝ̃̀ yuflǝw, nǝ̃ mɛlɛgɛẃ fǝ̃ǝ̃ ǹ-tuu ǹ-kã nǝ̃-m jerkwaardarǝ nã, mǝ̃́ da cijaldiɛ wùu jiraa jerguyodiɛ drɔ wuubumbɛ̃mw, nǝ̃ yiriɛgaa mãã gà waa gà jãn Dũnnũw nã, gàa yal ǹ-suu wù cãndɩ nã, nǝ̃ wú ba wù yáá nǝ̃ yun nɩrhǝ̃ǝ̃l nǝ̃ yenĩɛ̃ nũɔ̃sɔ̃w.

4 Cijal wáà yáá wùu dii kuulaasɩsĩɛ̃yǝw mãã nǝ̃ ɲããbumbɛ̃mãnɲã, wùú tuɔluɔ nǝ̃ sãnãw, nǝ̃ tɩntrãkuusiɛga, nǝ̃ kɩɲǝ̃mbiikuusiɛga.

Wù yáá wùu fuɔ sãnã guuɲũɔ̃kuudagǝ nã wù nãkruɔgɩ nã, gùu yu nǝ̃ cɔ̃mmãã mãã mã̀ã bla Dũnnũw nã, nǝ̃ wù suurnhlan dɩganɲã.

5 Yirdaarɩ̀ yáá dìi yal wù sãnũũgɩ nã, dìí mãã cɔ̃nŋmǝ̃ǝ̃rǝ̃mdamã: «Babilɔn lǝgǝ̃ngããri, dìí mãã canããbaa mãã bà suur bà hla, nǝ̃ cɔ̃mmãã mãã mã̀ã bla Dũnnũw nã cuuw nã, ɲã̀ ɲũw.»

6 Mǝ̃́ da cijal wáà wùu ɲũɔ̃ Kɩrsa bluu'n twammã́ blǝ-yǝ, mã̀ã́ mãã Yesu sulamntaa'n mǝ̃gãmmã.

Mǝ̃̀ gáa da-yǝ, gɩ́ mǝ̃gaa ǹ-tugulǝǝ mǝ̃̀ nã.

7 Mɛlɛgɛẃ waa nǝ̃-m wà: «Bii cíé dɩ́ tugulǝǝ ǹ nã?

Mǝ̃̀ ji fɩr cijal'n cɔ̃nŋmǝ̃ǝ̃rǝ̃mmã nǝ̃ jerguyow mãã wùu tuu-yǝ, wùú mãã nǝ̃ yun nɩrhǝ̃ǝ̃l nǝ̃ yenĩɛ̃ nũɔ̃sɔ̃w ǹ-ja-n.

8 Ǹ díɛ́ gùú jerguyow, wù yáá dìɛ, nǝ̃ wù sɩriɛ hlo.

Wù ji yuguraa ǹ-hlǝ jũɔ̃nulǝǝgɩ nã, ǹ-kãã guu nã.

Cuu cwaabaa mãã bà yiriɛgà sáá gàa yal nũmǝ̃nãsǝ'n sɛbɛw nã cuu nǝ̃ǝ̃m'n bǝ̃ǝ̃guu dìi, dɩ̀ ji tugulǝǝ bà nã ǹ-da wà jerguyow yáá dìɛ, nǝ̃ wù sɩriɛ hlo, nã̀ã ba wù ji ver ǹ-hillaa hlo.

9 Nnĩĩ-i, yigakaalagǝgɩ̀ saa gɩ́ da, ǹ-da ǹ-fǝ̃ǝ̃ cɔ̃mmã.

Yun nɩrhǝ̃ǝ̃l wáà, tãnũn nɩrhǝ̃ǝ̃l-i, ɲã̀ã́ mãã cijalẁ járrá ɲã̀ drɔ.

10 Nǝ̃ yuntaa nɩrhǝ̃ǝ̃l-i hlo: bà ndiibà dúrúu, wù dɩnẃ jiraa yuuntasǝrɩ nã, nǝ̃ wudiɛẁ sáa hi ǹ-jo.

Nǝ̃ wu-ń jo, wù sǝ̃n saa wú ba dìɛ ǹ-hǝ̃ǝ̃sǝ.

11 Nǝ̃ jerguyo-lǝ, wùú mãã wù yáá dìɛ, nã̀ã ba wù sɩriɛ hlo, wùú nǝ̃ wù hla, wú nǝ̃ wùu ba yuntaa nɩrsiɛlnãdiɛ-i; wú nǝ̃ nɩrhǝ̃ǝ̃lba sǝ̃ǝ̃nã, nã̀ã ba wù maar guumã.

12 Ǹ díɛ́ gùú yenĩɛ̃ nũɔ̃sɔ̃w, yuntaa'n nũɔ̃sɔ̃-i, bàá mãã bà sáa hi ǹ-da yuuntasǝri, nǝ̃ bà ji da fãngããgu ǹ-jiraa yuuntasǝrɩ nã nǝ̃ jerguyow bǝ̃ǝ̃dagǝ nã fiyãã.

13 Bá nǝ̃ kãnɩmmã dɩnmã, nã̀ã ba bà hã jerguyow nǝ̃ bà fãngããgu nǝ̃ bà fãngããsǝri.

14 Bà ji ce byaari nǝ̃ Tũmblɩw, nǝ̃ Tũmblɩẃ gbǝ̃ǝ̃ bà nã, nã̀ã wa wɩ̀-i yitaaba min Tiiw, nǝ̃ yuntaaba min Yuuntiiw.

Wù bíé bàá mãã, nã̀ã ne ǹ-hiil-ba, nǝ̃ bá ba yalntasǝrɩ nã, nã̀ã ba nǝ̃-yǝ, bàá yo, bà ji gbǝ̃ǝ̃ bà nã.»

15 Nã̀ã fǝ̃ǝ̃ ǹ-waa nǝ̃-m wà: «Ǹ díɛ́ gùú hũmmã, mã̀ã́ mãã cijalw mãã wù suur wù hla, wù járrá mã̀ drɔ, yiɛntaa-i, nǝ̃ cohuɔnɲã, nǝ̃ coplaaga, nǝ̃ tammã.

16 Ǹ díɛ́ gùú yenĩɛ̃ nũɔ̃sɔ̃w nǝ̃ jerguyow, cijalw mãã wù suur wù hla, wù cɔ̃mmã̀ ji bla bà nã; bà ji ɲǝ̃ǝ̃ ǹ-hũɔ̃ wù nãkrɔɲinɲã min, nã̀ã ya wú ba turkwaari, bà ji wuu wù kũɔ̃mã, nã̀ã hyã-yǝ nǝ̃ dǝ̃ǝ̃mã.

17 Nã̀ã wa Dũnnũẁ díilá-dǝ bà hiɛga nã, bá suu wù mãã wù caa wú ce dìi, ǹ-ba nǝ̃ kãnɩmmã dɩnmã, nã̀ã hã jerguyow nǝ̃ bà yuuntasǝri, fuwɔ ǹ-ji da Dũnnũ cãwanĩɛ̃gàa ji suu.

18 Nǝ̃ ǹ díɛ́ gùú cijalw, lǝgǝ̃ngãr-i, dìí mãã dìi jiraa yuuntasǝrɩ nã cuu yuntaaba drɔ.»