Cɔ̃nfɩrmmã 16

Ɲããɲũɔ̃n nɩrhǝ̃ǝ̃lw mãã wù tũnũũ

Mǝ̃́ fǝ̃ǝ̃ ǹ-nɔ̃ yaldarǝ nã nǝ̃ fãngããgu, dìi hlǝ Dũnnũ bũũduugɩ nã, nã̀ã ba dɩ̀ waa nǝ̃ mɛlɛgɛ nɩrhǝ̃ǝ̃lw wà: «Kã́ã̀ ɲi ga tũnũũ Dũnnũ hyadũpiirǝ'n ɲããɲũɔ̃n [nɩrhǝ̃ǝ̃lw] ɲũũrũũgɩ nã.»

2 Mɛlɛgɛdĩɛ̃lẃ ta ǹ-kãã tũnũũ wù guuɲũɔ̃gu ɲũũrũũgɩ nã, tapǝ̃ǝ̃bɩblaadagǝ, gùú mãã gɩ̀ jaa, gɩ́ hlǝ cwaaba nã mãã jerguyo'n nɩsɩmmã̀ yáá bà nã, nǝ̃ bá ba bà yáá bà bũũ wù yɩryɩrw mãã bàa cesǝ-yǝ.

3 Mɛlɛgɛba hǝ̃ǝ̃lnãẃ tũnũũ wù guuɲũɔ̃gu lwaakɩnkandi drɔ, mã́ juo ba twammã, nã́ã́ cugutii'n twam-i; nũmǝ̃nãɲinɲã min nǝ̃n yáá lwaakɩnkandɩ nã, ɲã́ kurǝǝ.

4 Mɛlɛgɛba siɛlnãẃ tũnũũ wù guuɲũɔ̃gu lwanɲã nǝ̃ hũnnaalaaba drɔ, ɲã́ juo ba twammã.

5 Gɩ̀-i mǝ̃́ nɔ̃ mɛlɛgɛw mãã wù ne hũm'n cɔ̃mmã wù waa wà: «Ń nǝ̃ nã̀ã sũɔ̃l, yíi mãã dìɛ, nã̀ã ba ǹ yáá dìɛ, yíi mãã Dũnnũw, nã̀ã wa ǹ járrá sugol díɛ̀.

6 Bà tṹnṹũ Kɩrsa bluu'n twammã nǝ̃ Dũnnũ tanhiilaa'n mǝ̃gammã nã, nǝ̃ ń hã-ba nǝ̃ twammã bá ɲũɔ̃; bà saa nǝ̃ gɩ̀ piirɩmmã.»

7 Nǝ̃ mǝ̃́ fǝ̃ǝ̃ ǹ-nɔ̃ yaldarǝ dɩ̀ hlǝ siijãnkuugɩ nã dɩ̀ waa wà: «Ũwũũ, Yitii Dũnnũw mãã Fãngããgɩmintiiw, ǹ sugojaruugɩ́ nǝ̃ gùu sũɔ̃l nã̀ã ba sulammã.»

8 Mɛlɛgɛba nnǝ̃ǝ̃nãẃ tũnũũ wù guuɲũɔ̃gu bǝ̃ǝ̃gu drɔ, nǝ̃ gɩ́ da fãngããgu ǹ-ba gɩ̀ hyã cwaaba nǝ̃ gɩ̀ dǝ̃ǝ̃mã.

9 Vuvǝ̃ǝ̃mcindarǝ hyã cwaaba, nǝ̃ bá ba bà waa bà jãn Dũnnũw nã, wùú mãã nǝ̃ fãngããgu nar báàba drɔ, nǝ̃ bà sáa nǝ̃nǝ̃ǝ̃ nã̀ã tuu ǹ-tu ǹ-ba bà bũũ Dũnnũw.

10 Mɛlɛgɛba ndiinãẃ tũnũũ wù guuɲũɔ̃gu jerguyo'n yuuntasǝ'n guujirakuugu drɔ, nǝ̃ wù yuuntasǝrɩ́ juo suu nã nǝ̃ dudũũmã.

Jaamã́ ce cwaabá ba bà wuu bà ɲirãnɲã,

11 nã̀ã ba bà waa bà jãn Dũnnũw nã, wùú mãã drɔkuɔlɩ nã, bà jaam'n cɔ̃mmã nã nǝ̃ bà tapãnbɩblanɲã, nǝ̃ bà sáa nǝ̃nǝ̃ǝ̃ bà gaaciega nã nã̀ã tuu ǹ-tu.

12 Mɛlɛgɛ nãndiennãẃ tũnũũ wù guuɲũɔ̃gu lwaagǝ̃ngããgɩ nã, gùú mãã Efratɩw, nǝ̃ gɩ́ kuul ǹ-hiil hlũũgu ǹ-hã yuntaaba mãã bà hlǝ bǝ̃ǝ̃'n pal'n yiɛgu.

13 Mǝ̃́ da tãntɔ̃nããba siɛldaba nã́ã́ maalagbarnãã-i, bà hlǝ wuufuulǝyǝ'n nũɔ̃gɩ nã, nǝ̃ jerguyo'n nũɔ̃gɩ nã, nǝ̃ tanhiilkwasǝnĩĩ'n nũɔ̃gɩ nã.

14 Sɩtãn yuflaa-i, bàá mãã bà ce cɔ̃npɩgammã, nã̀ã ba bà kã cuu yuntaaba min nãã ǹ-da ǹ-tɩgii-ba byar'n cɔ̃mmã nã, Fãngããgɩmintii-Dũnnũ yuugǝ̃ngãã'n cɔ̃mmã nã.

15 – «Ne, mǝ̃̀ jo nã́ã́ ŋmãllĩĩ-i.

Wùú nǝ̃n ba nũmǝ̃nãw, nã̀ã ba wù blǝ wù kuulanãmba nã, ǹ-ba wù síì wáà nǝ̃ turkwaari, nã̀ã ya bá da wù ciiri, wù yuugɩ̀ dwállá!» –

16 Bá tɩgii-ba gùú sùɔ́guu mãã bà be-gǝ Hebru tammã nã wà Arɩmãgedɔ̃.

17 Mɛlɛgɛ nɩrhǝ̃ǝ̃lnãẃ pisɩrĩɛ̃ wù guuɲũɔ̃gu saluugɩ nã, nǝ̃ yaldaarɩ́ hlǝ nǝ̃ fãngããgu Dũnnũ bũũduuguu mãã drɔkuɔlɩ nã; dɩ̀ yáá dìi hlǝ yuuntasǝ'n guujirakuugɩ nã, ǹ-waa wà: «Dɩ̀ jáa ce!»

18 Dũnnũ ɲĩɛ̃sǝmmã, nǝ̃ yaliɛdaga, nǝ̃ Dũnnũ nãlɛ̃mmã, nǝ̃ ɲũũrũũgɩ́ mǝ̃gaa ǹ-saaraa, gùú saarammãã mãã mã̀ tuugɩ̀ sáa hi ǹ-ce ǹ-da, ǹ-tuu gùú bǝ̃ǝ̃guu mãã curoẃ nǝ̃ ɲũũrũũgɩ nã.

19 Lǝgǝ̃ngããrɩ́ buruɔ tiɛmã siɛlmã, nǝ̃ coplaa'n liɛgá hɩr.

Dũnnũẃ kãnãã Babilɔn lǝgǝ̃ngãr'n cɔ̃mmã nã, ǹ-ce dɩ́ ɲũɔ̃ wù hyadũpiirǝbɩblaa'n ɛrsɛ̃ kwãm'n guuɲũɔ̃kuugɩ nã.

20 Lwaakɩnkandii mãã dìi caliɛ gùú hlɔ̃mmã nã, mã̀ min mã́ guu nã, nǝ̃ cwaabá ba bà sǝ̃n da tãnũnɲã hlo.

21 Dɔtrããdaga, gàá mãã dɩdiin dɩsɩmmã̀ yáá nã́ã́ culo gwaahǝ̃ǝ̃l tuu-i, gá hlǝ drɔkuɔlɩ nã ǹ-duruu cwaaba drɔ.

Nǝ̃ cwaabá fǝ̃ǝ̃ ǹ-ba bà waa bà jãn Dũnnũw nã dɔtrã'n nar wáà cɔ̃mmã nã, nã̀ã wa nar wáà yáá wùu gbǝ̃ǝ̃ ǹ-car.