Cɔ̃nfɩrmmã 15

Nar nɩrhǝ̃ǝ̃lw

Mǝ̃́ da cɔ̃npɩgamdamã hlo drɔkuɔlɩ nã, mã̀ã́ mãã mããgǝ̃ngããmã, nã̀ã ba mã̀ tugulǝǝ: mɛlɛgɛ nɩrhǝ̃ǝ̃lw yà blǝ nar nɩrhǝ̃ǝ̃lw, baafaalbaba, nã̀ã wa Dũnnũ hyadũpiirǝgɩ̀ suu nǝ̃ bà-i.

2 Mǝ̃́ da hlo nã́ã́ lwaakɩnkandii mãã dɩ̀ daraa, dìi gaala nã nǝ̃ dǝ̃ǝ̃mã.

Bàá mãã bà yáá bàa gbǝ̃ǝ̃ jerguyow nã, nǝ̃ wù yɩryɩrw mãã bàa cesǝ-yǝ, nǝ̃ wù yir'n nũɔ̃gu, bà yáá bàa hiraa lwaakɩnkan díɛ̀ drɔ, bàa fuɔ Dũnnũ bĩĩɲɩba nã.

3 Bà yáá bà hyar Musa hlǝ̃ǝ̃gu, wùú mãã Dũnnũ mããcierw, nǝ̃ Tũmblɩ'n hlǝ̃ǝ̃gu bà waa wà: «Ǹ gaaciegá nǝ̃ gaagǝ̃ngĩɛ̃ga, nã̀ã ba gà tugulǝǝ, Yitii Dũnnũ yíi mãã Fãngããgɩmintiiw!

Ǹ hlũsǝrɩ́ nǝ̃ dìi sũɔ̃l, nã̀ã ba sulammã, coplaa'n yuuntii!

4 Yitii, halii ji gbǝ̃ǝ̃ ǹ-ba wù síì sɔ̃ ǹ nã, nã̀ã bũũ ǹ yiiri?

Nã̀ã wa yíì dɩndɩn-i Dũnnũw, nǝ̃ cuu coplaaga min, gà ga juo bũũ-n, nã̀ã wa ǹ gaaciegaa mãã gàa sũɔ̃l, gà cúrúɔ.»

5 Gɩ̀-lǝ gɩ̀ furũũgɩ nã, mǝ̃́ ne ǹ-da Dũnnũ bũũduugu mãã Dũnnũ siɛrnãsǝ'n kuɔli, dìi cugur drɔkuɔlɩ nã.

6 Mɛlɛgɛ nɩrhǝ̃ǝ̃lbaa mãã bà yáá bàa fuɔ nar nɩrhǝ̃ǝ̃lw nã, bá hlǝ Dũnnũ bũũduugɩ nã; bà yáá bàa dii kuulaapɩpliɛba mãã yalla, nã̀ã ba bà caalaa, nã̀ã hĩɛ̃sã sãnã kuulaayiɛdagǝ bà dǝ̃ngũnɲã nã.

7 Nũmǝ̃nãɲinɲã nnǝ̃ǝ̃ ɲã́ã́ sǝ̃ǝ̃nã, gɩ̀ dɩngɩ́ hã mɛlɛgɛ nɩrhǝ̃ǝ̃l báà nǝ̃ sãnã ɲããɲũɔ̃ɲin nɩrhǝ̃ǝ̃lw, ɲã̀ã yu nǝ̃ Dũnnũw mãã nũmǝ̃nãw fuwɔ fɩraa wù hyadũpiirǝgu.

8 Dũnnũ bũũduugɩ́ yu nǝ̃ ɲũɔ̃sǝri, Dũnnũ yuuntasǝ'n gbɩgbaam'n cɔ̃mmã nã nǝ̃ wù fãngããgu, nǝ̃ curoẃ ba wù sáá wù ji gbǝ̃ǝ̃ ǹ-jãn Dũnnũ bũũduugɩ nã, nã́ã̀ mɛlɛgɛ nɩrhǝ̃ǝ̃l báà nar nɩrhǝ̃ǝ̃lẁ sáá wùu suu.