Cɔ̃nfɩrmmã 14

Tũmblɩw nǝ̃ cwaabaa mãã wù sǝ̃ǝ̃ wù hiil-ba

Mǝ̃́ ne, ǹ-ne ǹ-da Tũmblɩw wùu hiraa Siyɔ̃ tãnũũgɩ nã, wùú nǝ̃ cwa toyur tũndii yin gwasiɛl nǝ̃ nũɔ̃sɔ̃ nǝ̃ bà hǝ̃ǝ̃lbaa (144 000) mãã bà yáá nǝ̃ wù yiiri nǝ̃ wù Tǝ yiiri dìi yal bà sãnũnɲã nã.

2 Mǝ̃́ nɔ̃ yaldarǝ nã drɔkuɔlɩ nã dɩ̀ du nã́ã́ hũngǝ̃ngãm'n dul-i, nã́ã́ Dũnnũ nãlɛ̃mgǝ̃ngãm dúú.

Mǝ̃̀ nṹɔ̃́ gùú dulli, dɩ̀ yáá hlo nã́ã́ bĩĩɲɩmǝ̃ǝ̃l mǝ̃́ǝ̃lã̀ wù guumǝ̃ǝ̃lgǝgu.

3 Bà yáá bà hyar hlǝ̃ǝ̃flĩɛ̃dagǝ yuuntasǝ'n guujirakuu'n yigagɩ nã, nũmǝ̃nãɲinɲã nnǝ̃ǝ̃ ɲã́ã̀ yigagɩ nã nǝ̃ vũnvãnããba.

Curo'n sáá wù ji gbǝ̃ǝ̃ ǹ-kal hlǝ̃ǝ̃ gúɔ̀, nǝ̃-ń ba ǹ sǝ̃n wa cwa toyur tũndii yin gwasiɛl nǝ̃ nũɔ̃sɔ̃ nǝ̃ bà hǝ̃ǝ̃lbaa (144 000) mãã bà sǝ̃́ǝ̃lã́ ǹ-hiil bà yunɲã cuuw nã.

4 Bà-i, bàá mãã bà sáa bla bà hla nǝ̃ canããba.

Nã̀ã wa bà sáa fǝ̃ǝ̃ cacɔ̃mmã ǹ-da.

Bà duu Tũmblɩw nã, wu-ń ba wù kã sùɔ́ wo sùɔ́.

Bà sǝ̃́ǝ̃lã́ ǹ-hiil bà yunɲã cwaaba sǝ̃ǝ̃nã; bà-lǝ bá nǝ̃ nã́ã́ dũm'n yuɔrdĩɛ̃lããdii mãã bà hã Dũnnũw nǝ̃ Tũmblɩw nǝ̃-dǝ.

5 Kwasǝrɩ̀ sáa da bà nũɔ̃gɩ nã ǹ-da, [nã̀ã wa] bà sǝ nǝ̃ wanyuɔrɔm.

Mɛlɛgɛba siɛlbà waa sugojarcɔ̃mmã

6 Mǝ̃́ da mɛlɛgɛdiɛ [hlo] wùu yuu drɔgu, drɔkuɔlɩ nã.

Wù yáá nǝ̃ fɩraa cɔ̃ndudwalɩmdamã wù ji tu-mã nǝ̃ cuucwaaba, nǝ̃ coplaaga min, nǝ̃ nũɔ̃ntaaba min, nǝ̃ tammã min, nǝ̃ yiɛntaaba min.

7 Wù yáá wùu hiil yalli wù waa wà: «Sṹwã̀ Dũnnũw nã, nǝ̃ ɲí bũũ-yǝ, nã̀ã wa wù sugojar bǝ̃ǝ̃gɩ̀ híí.

Bṹũlã̀ wùú mãã wù nǝ̃́ǝ̃lã́ drɔkuɔli nǝ̃ ɲũũrũũgu, nǝ̃ lwaakɩnkandi, nǝ̃ hũnnaalaaba.»

8 Mɛlɛgɛba hǝ̃ǝ̃lnãdiɛ, wú duu wù nã, nã̀ã ba wù waa wà: «Dɩ̀ dúrúu, [dɩ̀ dúrúu,] Babilɔn lǝgǝ̃ngããri, dìí mãã dɩ̀ cíé coplaaga min gá ɲũɔ̃ Dũnnũ hyadũpiirǝ'n kwãmmã, dɩ̀ suurnhlan cɔ̃mmã nã!»

9 Nǝ̃ mɛlɛgɛba siɛlnãdiɛ, wú duu bà nã, nã̀ã hiil wù yalli ǹ-ba wù waa wà: «Curow-ń bũũ jerguyow nǝ̃ wù yɩryɩrw mãã bàa cesǝ-yǝ, nã̀ã hũɔ̃ wù nɩsɩmmã́ ba wù sãnũũgɩ nã yindagǝ nã wù nãkruɔgɩ nã,

10 wùú yo, wù ji ɲũɔ̃ Dũnnũ hyadũpiirǝ'n kwãmmã, mã̀ã́ mãã mã̀ cíirí ǹ-dii wù hyadũguuɲũɔ̃kuugɩ nã nǝ̃ mã̀ sáa gaala nã, nǝ̃ wú ba wù ji ywar dǝ̃ǝ̃mã nã, nǝ̃ naarjũmmã nã, Dũnnũ mɛlɛgɛba yigagɩ nã, nǝ̃ Tũmblɩ'n yigagɩ nã.

11 Bà ywaruu'n dǝ̃ǝ̃m'n ɲũɔ̃sǝrɩ́ ba dɩ̀ yuguraa fuwɔ fɩraa, nǝ̃ bá ba bà sǝ nǝ̃ fiisaagu bǝ̃ǝ̃nã nǝ̃ yisuɔ, bàá mãã bà bũũ jerguyow nǝ̃ wù yɩryɩrw mãã bàa cesǝ-yǝ, nǝ̃ bà minw mãã bà hũɔ̃ wù yiirɩ́ nɩsɩ bà nã.»

12 Kɩrsa bluuba mãã bà blǝ Dũnnũẁ kárrá gùú hlũsǝrɩ nã, nã̀ã ba bàa hũɔ̃ Yesu cɔ̃mmã, nnĩĩ-i vaanhlanãẃ nǝ̃ guɔ nã bà saa.

13 Nǝ̃ mǝ̃́ nɔ̃ yaldarǝ drɔkuɔlɩ nã dɩ̀ waa wà: «Yal wà: “Bàá mãã bà kúú Yitii'n hlũũgɩ nã, bà yunɲã̀ dwállá kuɔkuɔgu nǝ̃ gɩ̀ hla!

Ũwũũ, Dũnnũ Yuflǝẁ waa-dǝ, nĩĩgɩ-i bá nǝ̃ fiisaagɩ nã bà mããcegbǝ̃ǝ̃m'n cɔ̃mmã nã, nǝ̃ bà gaaciegá ba gà duu bà nã.”»

Dũtɩgigǝgu

14 Mǝ̃́ ne, ǹ-ne ǹ-da yiiluupɩplaadagǝ, nǝ̃ yiiluupɩplaa gúɔ̀ drɔ, curodiɛ yà jiraa wùú mãã wù hlǝ curo'n blɩw.

Sãnã yuuntasǝ'n hucuugɩ̀ yáá wù yuugɩ nã, nǝ̃ wú fuɔ kũnkuɔjãyǝdiɛ wù nãkruɔgɩ nã.

15 Mɛlɛgɛdiɛ hlǝ hlo Dũnnũ bũũduugɩ nã, nã̀ã hiil wù yalli ǹ-kaasǝ nǝ̃ wùú nǝ̃n yáá wùu jiraa yiiluugu drɔ wà: «Tuu ǹ kũnkuɔw ń hã, nã̀ã wa hãl'n bǝ̃ǝ̃gɩ̀ híí, ɲũũrũũgɩ̀ híí tɩgimmã nã.»

16 Wùú mãã wù yáá wùu jiraa yiiluugɩ nã, wú nǝ̃nǝ̃ǝ̃ wù kũnkuɔw nã ɲũũrũũgɩ nã, ǹ-hã ǹ-tɩgii cuucwaaba.

17 Mɛlɛgɛdiɛ fǝ̃ǝ̃ ǹ-hlǝ hlo Dũnnũ bũũduuguu mãã drɔkuɔlɩ nã, wùú yo, wùu blǝ kũnkuɔjãyǝdiɛ.

18 Nǝ̃ mɛlɛgɛdiɛ hlo, wùú mãã nǝ̃ fãngããgu dǝ̃ǝ̃mã drɔ, wú hlǝ siijãnkuu'n suɔgɩ nã, nã̀ã hiil wù yalli ǹ-ba wù wanãã nǝ̃ wùú mãã wù yáá wùu fuɔ kũnkuɔjãyǝw nã, wù waa wà: «Tuu ǹ kũnkuɔjãyǝw ń bǝr ɲũũrũũ ɛrsɛ̃ sunɲã, nã̀ã wa gɩ̀ ɛrsɛ̃ẁ bíé.»

19 Mɛlɛgɛẃ nǝ̃ǝ̃ ǹ-kra wù kũnkuɔw nã ɲũũrũũgu.

Nã̀ã bǝr ɲũũrũũ ɛrsɛ̃ sunɲã, nã̀ã cirii-yǝ Dũnnũ hyadũpiirǝ'n ɛrsɛ̃ bikumãfuugɩ nã.

20 Bá kumã ɛrsɛ̃w ɛrsɛ̃ bikumãfuugɩ nã lǝ'n taasǝ̃ǝ̃nǝ̃ǝ̃gu.

Twammã́ hlǝ ǹ-yuguraa, fuwɔ ǹ-ga hi kuuguu mãã bà blǝ sǝ̃nsonãã'n nɔ̃nɲã nǝ̃-gǝ, ǹ-hal culo gundii bà siɛlba nã (300).